ගැඹුරු පීඩන අවපාතය අද රාත්‍රියේ ශ්‍රී ලංකා වෙරළට..

Jan 9, 2026 at 07:28 AM

|

Lanka Leader

ගිනිකොන බෙංගාල බොක්ක මුහුදු ප්‍රදේශයේ පවතින ගැඹුරු පීඩන අවපාතය අද (09දා) සවස 5.30ත් රාත්‍රි 11.30ත් අතර කාලය තුළ හම්බන්තොට සහ කල්මුණේ අතරින් ශ්‍රී ලංකා වෙරළ තීරයට ඇතුළුවීමට බොහෝ දුරට හැකියාව පවතින බව කාලගුණ විද්‍යා දෙපාර්තමේන්තුවේ අධ්‍යක්‍ෂ ජනරාල් අතුල කරුණානායක මහතා ඊයේ (08දා) පැවසීය. මෙම පද්ධතියේ බලපෑම ඉරිදා (11දා) තෙක් පැවතිය හැකි යැයි ද හෙතෙම කීය.

මෙම පද්ධතිය ඊයේ (08දා) පෙරවරු 5.30 වනවිට ගැඹුරු පීඩන අවපාතයක් දක්වා වර්ධනය වී පොතුවිල් සිට කිලෝමීටර් 420ක් ගිනිකොන දෙසින් කේන්ද්‍රගතව පැවතුණි. ඊයේ පෙරවරු 10.00 පමණ වනවිට එම පද්ධතිය පොතුවිල් සිට කිලෝමීටර් 300ක පමණ ගිනිකොන දෙසින් ස්ථානගත වී පැවති බවද ඒ මහතා පැවසීය.

විශේෂයෙන් මෙහි බලපෑම හේතුවෙන් ගැඹුරු සහ නොගැඹුරු මුහුදු ප්‍රදේශවල ධීවර හා නාවික කටයුතුවල නැවත දැනුම් දෙනතුරු නොයෙදෙන ලෙස ද ඒ මහතා ඉල්ලා සිටියේය. මුහුදු ප්‍රදේශවල ඇතැම් විට පැයට කිලෝමීටර් 70-80 වැනි වේගයකින් සුළං හැමිය හැකි බවත් මුහුදේ රළ මීටර් 02ත් 03ත් වැනි ඉහළ යෑමක් සිදුවිය හැකි බවත් ඒ මහාත කීය. එම නිසා දැනට මෙම මුහුදු ප්‍රදේශවල ධීවර හා නාවික කටයුතුවල යෙදී සිටී නම් ආරක්‍ෂිත ස්ථාන වෙත පැමිණෙන ලෙස ද දැනුම් දී ඇත.

කාලගුණ විද්‍යා දෙපාර්තමේන්තුව නිකුත් කර ඇති රතු නිවේදන අනුව නැඟෙනහිර පළාතේ අම්පාර සහ මඩකළපුව යන දිස්ත්‍රික්කවල ඇතැම් ස්ථානවලට විටින් විට වැසි හෝ ගිගුරුම් සහිත වැසි ඇතිවිය හැකිය. ඇතැම් ස්ථානවල මිලිමීටර් 150ට වැඩි තද වැසි ද ඇතිවිය හැකිය. කොළඹ ඇතුළු දිස්ත්‍රික්ක කිහිපයක සුළඟේ වේගය පැයට කිලෝමීටර් 50-60 දක්වා ඉහළ යා හැකිය.

මුලතිව්, වව්නියාව, කිලිනොච්චිය, පොළොන්නරුව සහ ත්‍රිකුණාමලයට විටින් විට ඇතැම් ස්ථානවලට මිලිමීටර් 100ත් 150ත් අතර තද වැසි ඇතිවිය හැකිය. යාපනය, මන්නාරම මෙන්ම ඌව පළාතේ මොනරාගල සහ බදුල්ල යන දිස්ත්‍රික්කවල සහ මධ්‍යම පළාතේ නුවරඑළිය සහ මාතලේ දිස්ත්‍රික්කවල විටින් විට ඇතැම් ස්ථානවලට මිලිමීටර් 100ට වැඩි තද වැසි ඇතිවිය හැකිය.

මෙහි බලපෑම හේතුවෙන් පැල්පත්වල හා තාවකාලික ඉදිකිරීම්වලට හානිවීම, වහලවල ඇති තහඩු උළු ආදිය ගැලවීම, විදුලි සහ දුරකථන රැහැන්වලට හානිවීම, ගස්වල අතු කැඩීයෑම සහ මාර්ග අසල විශාල ගස් ගැලවී යෑම, වී වගා බිම්, කෙසෙල්, පැපොල් වැනි වගාවන්වලට හානි වීම, ක්‍ෂණික ගංවතුර තත්ත්වයන් ඇතිවීම සහ වෙරළාසන්න පහත් ගොඩබිම් ප්‍රදේශ මුහුදු ජලයෙන් යටවිය හැකි බවද කාලගුණ විද්‍යා දෙපාර්තමේන්තුව පවසයි.

බලපෑමෙන් මිදීම සඳහා වෙරළ ආසන්න තාවකාලික පදිංචිකරුවන් ආරක්‍ෂිත ස්ථානවලට ගමන් කිරීම, කඳුකර ප්‍රදේශවල (විශේෂයෙන් නාය අවදානමක් සහිත ප්‍රදේශවල) සහ ගංගා ආශ්‍රිත පහත් බිම්වල ජීවත් වන ජනතාව මේ සම්බන්ධයෙන් විමසිලිමත්වීම, කඳුකර ප්‍රදේශවල මාර්ග භාවිතා කර රථවාහන පදවන්නන් මේ සම්බන්ධ දැනුවත් වීම සහ ගිගුරුම් සහිත වැසි පවතින අවස්ථාවල රැහැන් දුරකථන සහ විදුලි උපකරණ භාවිතයෙන් වැළකීමට කටයුතු කළ යුතු බවද එම දෙපාර්තමේන්තුව තවදුරටත් කියා සිටී.

වාරිමාර්ග දෙපාර්තමේන්තුවට අයත් ප්‍රධාන ජලාශ 73න් 29ක් ඊයේ (08දා) වාන් දැමීම හෝ දොරටු විවෘත (දොරටු විවෘත කිරීම 17) කිරීම සිදුකර ඇතැයි ද මධ්‍ය පරිමාණ ජලාශ 24ක් (02 දොරටු විවෘත කිරීම) වාන් දැමීම වාරි මාර්ග දෙපාර්තමේන්තුව දැනුම් දී තිබිණි. එම ජලාශවල සමස්ත ජල ධාරිතාවය සියයට අසූදෙකයි දශම හයක් (82.6%) ලෙස ද වාර්තා වී තිබිණි.

කාලගුණ විද්‍යා දෙපාර්තමේන්තුව ලබාදී ඇති පුරෝකතනයන් අනුව ඌව, නැඟෙනහිර, මධ්‍යම, උතුරු මැද හා උතුර යන පළාත් තුළ පිහිටි ගංගා ද්‍රෝණිවලට වැඩි වර්ෂාපතනයක් ලැබීමට ඉඩ ඇති නිසා අම්පාර, මඩකළපුව, පොළොන්නරුව, අනුරාධපුරය, ත්‍රිකුණාමලය, වව්නියාව හා යාපනය යන දිස්ත්‍රික්කවල පිහිටි ගංගා ද්‍රෝණිවල ගංවතුර තත්ත්වයක් ඇතිවීමේ අවදානමක් පවතින නිසා එම දිස්ත්‍රික්ක තුළ පිහිටි ගංගා නිම්න ආශ්‍රිත පහත් බිම්වල හා ගංගා ආසන්නයේ ජීවත් වන ජනතාව දැඩි අවධානයෙන් සිටින ලෙස ද එම දෙපාර්තමේන්තුව ඉල්ලා තිබිණි.