විදුලි ගාස්තු වැඩි කරන යෝජනාවට පාර්ශ්ව රැසක විරෝධය..

Jan 3, 2026 at 11:15 AM

|

Lanka Leader

මේ වසරේ පළමු කාර්තුවට අදාළ විදුලි ගාස්තු සංශෝධන යෝජනාව ලංකා විදුලිබල මණ්ඩලය විසින් මහජන උපයෝගීතා කොමිසම වෙත යොමු කර තිබෙන අතර ඊට පාර්ශ්ව කිහිපයකින්ම එල්ල වන්නේ දැඩි විරෝධයකි.

ඒ අනුව සියයට 11.57 කින් විදුලි ගාස්තුව ඉහළ දැමීමටයි එමගින් යෝජනා කර ඇත්තේ.

වසරකදී කාර්තුවකට වරක් විදුලි බිල සංශෝධනයක් සිදුවන අතර ඒ අනුව අවසන් වරට විදුලි බිල සංශෝධනය කෙරුණේ ඉකුත් ජුනි මාසයේයි.

ඒ සියයට 15 කින් වන අතර ඉන් පසුව අවසන් කාර්තුව සඳහා සියයට 06 ක පමණ විදුලි ගාස්තු ඉහළ නැංවීමක් යෝජනා කළ ද ඊට අවසර හිමි නොවිණි.

එවැනි පසුබිමක නව වසරේ පළමු කාර්තුවට අදාළ විදුලි ගාස්තු සංශෝධන යෝජනාවලිය ලංකා විදුලි බල මණ්ඩලය විසින් මහජන උපයෝගීතා කොමිසම වෙත යොමු කර තිබේ.

ඒ අනුව මෙම වසරේ ජනවාරි සිට මාර්තු මාසය දක්වා සියයට 11.57ක මිල ඉහළ දැමීමක් එමගින් යෝජිතයි.

මෙලෙස විදුලි බිල ඉහළ දැමීමට හේතුවන කරුණු කිහිපයක් ද ලංකා විදුලි බල මණ්ඩලය මගින් සිය යෝජනාවලියේ සඳහන් කර තිබේ.

විදුලි බිල ඉහළ දැමීම සලකා බලන මාස 3 තුළ ජල විදුලි බලාගාර ආශ්‍රිත ජලාශවලට ලැබෙන වර්ෂාව ප්‍රමාණවත් නොවීම, විදුලි බල මණ්ඩලයේ පවතින ණය, ඉන්ධන මිලේ වෙනස්වීම මෙන්ම විදුලි සංශෝධන පනත අනුව විශ්‍රාම ගන්නා විදුලි සේවකයින්ට ගෙවනු ලබන වන්දි මුදල ද මෙහි මූල්‍ය වියදමක් ලෙස ඇතුළත් කර තිබේ.

එම විදුලි ගාස්තු සංශෝධන යෝජනාව අනුව ගෘහස්ථ කාණ්ඩයේ මාසික විදුලි පරිභෝජනය ඒකක 0 සිට 30 දක්වා රුපියල් 4. 50 ක්ව පැවැති ඒකක ගාස්තුව 5. 29 ක් දක්වා ඉහළ දැමීමට අපේක්ෂිතයි.

ඒකක 31 සිට 60 දක්වා රුපියල් 8 ක්ව පැවැති ඒකක ගාස්තුව නව සංශෝධනයට අනුව රුපියල් 9. 41 කින් ඉහළ දැමීමට යෝජිතව ඇති අතර ඒකක 0 සිට 60 දක්වා රුපියල් 12 යි ශත 75 ක්ව පැවැති ඒකක ගාස්තුව රුපියල් 15 දක්වා ඉහළ දැමීමටයි යෝජනා කර ඇත්තේ.

ඒකක 61 සිට 90 දක්වා දැනට පවතින රුපියල් 18. 50 ක ඒකක ගාස්තුව ඉහළ දැමීමට යෝජනා කර ඇත්තේ රුපියල් 21. 76 කින්.

ඒකක 91 සිට 120 දක්වා කාණ්ඩයේ මෙතෙක් පැවැති රුපියල් 24ක ඒකක ගාස්තුව 28. 23 දක්වාත් ඉහළ දැමෙනු ඇති.

දැනට මාස තුනක් සඳහා බලපැවැත්වෙන විදුලි ගාස්තු සංශෝධන කාල සීමාව මාස 6 ක් දක්වා දීර්ඝ කිරීම සම්බන්ධයෙන් ද අවධානය යොමුව ඇති බව සදහන්.

මේ අතර යෝජිත විදුලි ගාස්තු සංශෝධනයට පාර්ශව කිහිපයකින්ම විරෝධයද එල්ල වේ.