වීරයෝ හදන රටක්

Dec 31, 2025 at 12:13 PM

|

Lanka Leader

2025 දෙසැම්බර් මස 28 වැනි දා ඉරිදා “ඇත්ත” පුවත්පතේ පළ කර තිබෙන “චීන පෙරැළිය” ලිපි මාලාවේ 24 වැනි කොටස

නීති-රීති, යහපත් පාලනයක්, විධිමත් අධ්‍යාපනයක්, හොඳ ආර්ථික ක්‍රමයක් තිබුණු පමණින් ජාතියක් ශක්තිමත් වෙන්නේ නෑ. ඒ අරමුණ සාක්‍ෂාත් කරගන්න නම් මේ කටයුතු වෙනුවෙන් කැපවුණු මිනිස්සු ඉන්නත් ඕන. ඒ වැඩේ කරලා දෙන අය අතර ඉස්සරහින් ම වීරයෝ ඉන්නවා. වීරයෙක් කියලා කියන්නේ තමන්ගේ පුද්ගලිකත්වය සමාජය වෙනුවෙන් කැප කරන කෙනෙක්. සමහර මිනිස්සු සමාජය වෙනුවෙන් තමන්ගේ ජීවිතයත් පූජා කරනවා. තවත් සමහරු සමාජය වෙනුවෙන් තමන්ගේ මුළු ජීවිත කාලය ම කැප කරනවා. මෙන්න මෙහෙම අයට අපි වීරයෝ කියලා කියනවා.

වීරයකුගේ චරිතය තුළින් මිනිස්සු අගය කරන කතන්දරයක් කියැවෙනවා. මෙහෙම කතන්දර තේරුම්ගන්න ලේසියි. පොඩි ළමයින්ට, අකුරු දන්නේ නැති අයට පවා මේ කතන්දර තේරෙනවා. පාඩම් පොතක තියෙන න්‍යාය, ප්‍රවාද, ලොකු තර්ක විතර්කවලට වඩා මේ කතා ඉතා හොඳින් ජනගත වෙනවා. මිනිස්සු මේ වීර චරිත ගැන කතන්දර තමන්ගේ ළමයින්ටත් කියලා දෙනවා. ඒ ආදර්ශ හිතට ඇරැගෙන ලොකු මහත්වෙන අය ඒවාට අනුව ජීවත්වෙන්න උත්සාහ කරනවා.

වීර කතා සන්නිවේදනය තනි තනි පුද්ගල මට්ටමිනුත් සමාජයක් විදිහට සංවිධානාත්මකවත් කරන්න පුළුවන්. තනි තනිව කරන සන්නිවේදනයට වඩා සංවිධානාත්මකව කරන සන්නිවේදනය බලවත්. එහෙම කාර්යයක් වෙනුවෙන් විශාල ශ්‍රමයක්, විවිධ හැකියාවන් සහ ප්‍රමාණවත් ධනයක් වැය කිරීමේ හැකියාව සංවිධානගත ක්‍රමයට තියෙනවා. ඉතින් සංවිධානාත්මක ක්‍රමයේ දී පිළි රූ හැදෙනවා, ස්මාරක හැදෙනවා, උත්සව පැවැත්වෙනවා, තව තවත් වැඩ ගොඩක් සිද්දවෙනවා.

චීනයේ බිහිවෙන වීරයන් අගයන්න, ඒ සඳහා උපකාර වෙන විවිධ මැදිහත්වීම් කරන්න ඒ රටේ ආණ්ඩුවත් මුල්වෙලා ඉන්නවා. වීරයන්ගේ නාමලේඛන ජාතික මට්ටමින් ප්‍රකාශයට පත් කරනවා. 2009 දෙසැම්බර් මාසයේ දී ප්‍රකාශයට පත් කරපු 1949 මහජන ජනරජය පිහිටු වූ දිනයේ ඉඳලා මේ දක්වා චීන සමාජය සලිත කරවීමට සමත් වූ වීරයන් සිය දෙනාගේ නාම ලේඛනයත් එහෙම එකක්. චීන ආණ්ඩුවේ මැදිහත්වීමෙන් සමාජයට වීරයන් ගැන කියැවෙන ස්මාරක, කෞතුකාගාර හැදෙනවා. නවකතා, ළමා කතා, චිත්‍රපට, ටෙලි නාට්‍ය, වේදිකා නාට්‍ය, චිත්‍ර නර්මාණ, ගීත, නැටුම් නිර්මාණය කරනවා. විවිධ ක්‍ෂේත්‍රවල කටයුතු සඳහා කැපැවුණු වීරයන්ගේ කතා ඉතාමත් ප්‍රබල විදිහට සමාජගත කරනවා.

මෑත කාලයේ දී, චීනයේ ඇගැයීමට ලක්වෙලා තියෙන වීර චරිත කීපයක් හරහා මේ වීරයෝ හැදිල්ල ගැන කියන්නම්.

ලැයි නිං ඉපැදුණේ 1973 ඔක්තෝබර් 20 වැනි දා. 1988 වෙද්දිත් ඔහු පාසල් ශිෂ්‍යයෙක්. 1988 මාර්තු 13 වැනි දා ඔහු ඉගෙනගත් පාසල කිට්ටුව කැලෑවක ලැව් ගින්නක් ඇවිලෙන්න පටන්ගත්තා. ඒ ගින්න හින්දා ආශ්‍රිත ගම්මානත් ඒ කිට්ටුව තිබුණු චන්ද්‍රිකා රූපවාහිනී මධ්‍යස්ථානයේ පැවැත්මත් තර්ජනයට ලක්වුණා. ගිනි නිවන කණ්ඩායම්, ගම් වැසියන් එක්ක පාසල් ශිෂ්‍යයොත් ලැව්ගින්න නිවන්න දායකවුණා. ඉතාමත් දැඩි අධිෂ්ඨානයකින් ගින්න නිවන්න දායකවෙච්ච ලැයි නිං තමන්ට පැවැරුණු සීමාව ඉක්මවලා ඉස්සරහට ම ගිහිල්ලා ගින්න නිවන්න පටන්ගත්තා. එහෙම ඉස්සරහට ගිය ඔහු මහ ගිනි ජාලාවකට කොටුවුණා. ඒ ගින්නෙන් ඔහු මියගියා.

මේ වීර කතාව පැතිරෙන්න පටන්ගත්තා. ස-ඡුවන් පළාතේ ආණ්ඩුව දිවි පිදූ වීරයෙක් කියලා ලැයි නිංව නම් කළා. චීන පොදු නිෂ්පාදන පක්‍ෂයේ තරුණ සංගමයේ මධ්‍යම කමිටුව විසිනුත් ජාතික අධ්‍යාපන කොමිසම විසිනුත් “ළමා වීරයා” කියලා ඔහුව නම් කළා. ලැයි නිංගේ කතාව පාසල් පාඩම් පොත්වලටත් ඇතුළත් කෙරුණා. මූලික නිල ඇගැයීම්වලට අමතරව ලැයි නිංගේ රූපය සහිත පෝස්ටර් පාසල් පංති කාමරවල ඇලෙව්වා. ඔහුව සමරන උත්සව සංවිධානය කෙරුණා. ඔහුගේ ස්මාරක ඉදි කෙරුණා. ඔහුගේ නම “ළමා පෙරගමන්කරුවෝ 10 දෙනා” අතරටත් එකතු කළා. චීනය කම්පනයට පත් කරපු 100 දෙනාගේ ලේඛනයට ඔහුගේ නමත් ඇතුළත් කෙරුණා. 2019 වසරේ දී පත් කරපු “සොඳුරුතම අරගලකරුවෝ” ලේඛනයටත් ලැයි නිංගේ නම ඇතුළත් කෙරුණා. මේ ලේඛනයේ 278 දෙනෙක් ඉන්නවා.

යුවන් ලුං-පිං කියන්නේ ලෝක ප්‍රසිද්ධ කෘෂි විශේෂඥයෙක්. එතුමා හඳුන්වලා දීපු දෙමුහුන් වී නිසා ලෝකයේ ආහාර ප්‍රශ්නය විසඳන්න ඔහුගෙන් ලැබුණු දායකත්වය ජාත්‍යන්තර වශයෙන් පවා අගය කෙරිලා තියෙනවා. නිතර සාගතවලින් පෙලිච්ච රටක් හින්දා චීන ජනතාව යුවන් ලුං-පිං සළකන්නේ දෙවියෙක් විදිහට. චීන සමාජය කම්පාවට පත් කරපු 100 දෙනාගේ ලේඛනයට ඔහුගේ නමත් ඇතුළත්. 1930 ඉපැදුණු යුවන් ලුං-පිං 2021 දී මියගියා. ඔහුගේ දේහය ගෙනියද්දි පාර දෙපැත්තට එකතුවෙච්ච මිනිස්සු හඬා වැටුණා. විශ්වවිද්‍යාල ශිෂ්‍යයෝ එතුමාගේ ගුණ ගයමින් පාර දෙපැත්තෙන් දිව්වා.

රන් ඡං-ශියා ඉපැදුණේ 1964 පෙබරවාරි මාසයේ. 1980 දී ඇය හ-නන් පළාතේ පොලිස් විද්‍යාලයට බැඳුණා. 1983 දී, ඇය පොලිස් ක්‍රියාකාරි සේවයට එකතුවුණා. පැවැරුණු හැම රාජකාරියක් ම හොඳින් ඉටු කරපු ඇය 2001 වසරේ දී තං-ෆං නගරයේ පොලිස් ස්ථානයේ ප්‍රධාන තනතුරට පත්වුණා. (ලෝක ප්‍රසිද්ධ ෂඕ-ලින් පන්සල පිහිටලා තියෙන්නෙත් මේ පොලිස් බල ප්‍රදේශයේ). ඒ තමයි හ-නන් පළාතේ පොලිස් ස්ථානයක ප්‍රධාන තනතුරට කාන්තාවක් පත්වෙච්ච මුල් ම අවස්ථාව.

තං-ෆං නගර පොලිස් ස්ථානයේ රාජකාරි කරපු අවුරුදු තුනක කාලය තුළ පැමිණිලි 3,467 ක් විමර්ශනය කරලා වැරැදිකරුවන්ට දඬුවම් ලබාදෙන්න ඇය මුල්වුණා. කලින් නොවිසැඳී තිබුණු අපරාධ සිදුවීම් පවා ඒ අතර තියෙනවා. ජනතාවගේ පැමිණිලිවලට තමන් ම සවන්දෙන දවසක් බවට හැම සෙනසුරාදාවක් ම පත් කළා. අපරාධ තොරතුරු හොයන්නත් මහජනතාව තුළ පොලීසිය පිළිබඳ විශ්වාසයක් ඇති කරන්නත් ඇය වෙස්වළාගෙන මිනිස්සු අතරට ගියා.

රන් ඡං-ෂියා හැම දා ම උදේ පාන්දර ඉඳලා මධ්‍යම රාත්‍රිය පහුවෙන කල් එක දිගට ම සේවය කළා. තමන්ගේ මුළු කාලය ම සේවයට කැප කරපු හින්දා ගෙදර ගිහිල්ලා ස්වාමියා සහ පුතා සමඟ ගත කරන්න ඇයට ඉඩක් ලැබුණේ කලාතුරකින්. දෙමව්පියන් අහිමිවුණු ගැහැණු දරුවකුගේ භාරකාරත්වය පවරාගත්ත ඇය ඒ ළමයා ඉගෙනගන්න පාසල පොලීසියේ මැදිහත්වීමෙන් වැඩිදියුණු කළා.

මෙහෙම වැඩ කරලා පොලීසියට ජනතාවගේ සහයෝගය ලබාගැනීමට රන් ඡං-ශියාට පුළුවන් වුණා. අපරාධ විසැඳීම පිළිබඳ විශේෂඥයන්ගේ උපදෙස් ලබාගැනීමටත් ඇය ක්‍රියා කළා. මේ සියලු කටයුතු හින්දා තං-ෆං පොලිස් බල ප්‍රදේශයේ ජනතාව ඇයව තමන්ගේ පවුලේ කෙනෙක් විදිහට පිළිගත්තා. 2004 වසරේ දී ඇය හදිසි අනතුරකින් මියයෑම නිසා මුළු ප්‍රදේශය ම කම්පාවට පත්වුණා. ඇයගේ අවමංගල්‍යයට ලක්‍ෂ තුනකට වැඩි ජනතාවක් සහභාගී වුණා.

මියගිහිල්ලා සති දෙකක් ගතවෙන්නත් කලින් “මහජන ආරක්‍ෂාව සැලැසීම පිළිබඳ පළමු පංතියේ වීරවරිය” කියන ඇගැයීම රන් ඡං-ශියාට පිරිනැමුණා. 2005 පෙබරවාරි මාසයේ දී, 2004 වසරේ දී චීන සමාජය කම්පනයට පත් කළ 11 දෙනාගේ ලේඛනයටත් ඇයගේ නම ඇතුළත් කෙරුණා. 2009 සැප්තැම්බර් මාසයේ දී ප්‍රකාශයට පත් කරපු, චීන සමාජය කම්පනයට පත් කළ 100 දෙනා අතරට ඇයගේ නමත් එක් කෙරුණා. ඒ මාසයේ දී ම ප්‍රකාශයට පත් කරපු “නව චීනයේ ආදර්ශවත් නායක චරිත” ලේඛනයටත් ඇයගේ නම ඇතුළත් කෙරුණා. ආර්ථික ප්‍රතිසංස්කරණ ආරම්භ කිරීමෙන් අනතුරුව ප්‍රවෘත්තිමය වටිනාකම් එකතු කළ අයගේ ලේඛනයට ඇයගේ නම ඇතුළත් කෙරුණේ 2018 දෙසැම්බර් මාසයේ දී. 2019 වසරේ දී, “සොඳුරුතම අරගලකරුවෝ” ලේඛනයටත් ඇයගේ නම ඇතුළත් කෙරුණා.

චීන ජනාධිපති හූ චින්-ථාඕ සහ අගමැති වන් චියා-පාඕ නිවේදන නිකුත් කරමින් රන් ඡං-ශියාගෙන් ජාතිය ඉගෙනගත යුතු බව කිව්වා. ඇයගේ සේවය ජනතාව අතරට සන්නිවේදනය කිරීම වෙනුවෙන් ඇය මිය ගිහිල්ලා මාසයක් ඇතුළත ගුණ සමරු ගීතයක් නිර්මාණය කෙරුණා. 2004 මැයි මාසයේ දී ම ඔපෙරාවක් නිර්මාණය කළා. 2004 ජුනි මාසයේ දී වේදිකා නාට්‍යයක් හැදුවා. 2004 ජුලි මාසයේ දී සංගීතමය නාට්‍යයක් හැදුවා. තවත් නාට්‍ය සහ ඔපෙරා මහ ගොඩක් නිර්මාණය කෙරුණා. 2005 වසරේ දී චිත්‍රපටයක් සහ කොටස් 21 කින් සමන්විත ටෙලි නාට්‍යයක් නිර්මාණය කෙරුණා.

වූ මං-ඡාඕ කියන්නේ අක්මා සැත්කම් පිළිබඳ ලෝ පතල වෛද්‍යවරයෙක්. 1922 ඉපැදුණු ඔහු මියගියේ 2021 මැයි මාසයේ දී. වයස අවුරුදු 97 දී තමයි එතුමා විශ්‍රාම ගත්තේ. එතුමා චීනයේ ඉහළ ම විද්‍යා සම්මානයෙනුත් පිදුම් ලැබූවා. චීන තාරකා විද්‍යාඥයන් විසින් 1995 වසරේ හඳුනාගත් කුඩා ග්‍රහලෝකයක් 17606  Wumengchao කියලා නම් කරලා තියෙනවා. “2011 අවුරුද්දේ චීන සමාජය කම්පනයට පත් කළ මිනිසුන්” ලෙසින් නම් කරපු 10 දෙනා අතර වූ මං-ඡාඕ මහාචාර්යතුමාත් ඉන්නවා. වයස අවුරුදු 96 දී පවා ඔහු සතියකට සැත්කම් තුනක් කරලා තියෙනවා.

1988 දී කුයි-චෝ පළාතේ ඉතාමත් දුෂ්කර ගම්මානයක ඉපැදුණු ලියු ශියු-ශියංට අයියලා අක්කලා හතර දෙනෙක් ඉන්නවා. ලියු ශියු-ශියංට වයස අවුරුදු 10 ක් වෙද්දි ඔහුගේ පියා මියගියා. ඒ පීඩනය මැද්දේ ඔහුගේ මවට පිස්සු හැදුණා. ඔහුගේ අයියලා, අක්කලා පවුල අත්හැරලා ගියා. ඉතින් ගෙදර හැම වැඩක්මත් අම්මා රැක බලාගැනීමත් ලියු ශියු-ශියං පවරාගත්තා. ඉස්කෝලෙට යද්දි ඔහු අම්මාවත් එක් කරගෙන ගියා.

මේ අභියෝග මැද්දේ ලියු ශියු-ශියං ඉගෙනගැනීමටත් කැපැවුණා. විවිධ රැකියාත් කළා. විශ්වවිද්‍යාල ප්‍රවේශ විභාගය පළමු වතාවෙන් අසමත් වුනත් තවත් කැපැවෙලා දෙවැනි වතාවේ දී ඔහු ඒ අරමුණ සාක්‍ෂාත් කරගත්තා. අම්මා කරේ තියාගෙන ගිහිල්ලා විශ්වවිද්‍යාල කිට්ටුව පාරක් අයිනේ කුඩා මඩුවක් හදාගත්ත ලියු ශියු-ශියං ඒකේ නැවතුණා. විශ්වවිද්‍යාලයෙන් ලැබුණු මූලික ආධාරය ඇරෙන්න ඔහු වෙනත් කිසිම බාහිර උදව්වක් ගත්තේ නෑ. උපාධිය ලබාගත්තට පස්සේ ඔහුට විශ්වවිද්‍යාලයේත් පුද්ගලික ආයතනවලත් රැකියා ලැබුණා. ඒත් ඔහු ඒවා එපා කියලා අම්මාව කරේ තියාගෙන ආපහු ගමට ආවා.

ආපහු ගමට ආපු ලියු ශියු-ශියං ගමේ ඉස්කෝලේ හැදුවා. ඒකට ළමයි සම්බන්ධ කරගන්න ඔහු ගෙයක් ගෙයක් ගානේ ගියා. ක්‍රම ක්‍රමයෙන් ඔහු ඒ වැඩේ සාර්ථක කරගත්තා. ළමයි ඉහළින් විභාග සමත්වෙන්න පටන්ගත්තා. තමන්ගේ කෝරළයේ තුන්වැනියට වැඩිම ප්‍රමාණයක් සරසවි ප්‍රවේශ විභාගය සමත්වෙන පාසල නිර්මාණය කරගන්න ඔහුට පුළුවන් වුණා.

2020 වසරේ දී, ලියු ශියු-ශියංට “සොඳුරුතම ගුරුවරයා” සම්මානය හිමිවුණා. 2021 වසරේ දී, දෙමව්පියන්ට සැළැකීම පිළිබඳ ආදර්ශ චරිතය වශයෙනුත් ඔහුව නම් කෙරුණා. ඔහු පිළිබඳ විශාල මාධ්‍ය ආවරණයක් ලැබිලා තියෙනවා. ඒ සියලු ඇගැයීම්වලට වඩා තමන්ගේ ගම් ප්‍රදේශයේ ළමයි අතර තමන්ට ලැබිලා තිබෙන පිළිගැනීම ගැන ලියු ශියු-ශියං සතුටුවෙනවා.

ආචාර්ය වරුණ චන්ද්‍රකීර්ති

=== === === === ===

පින්තූරය:- පොලිසියේ වීරවරිය: රන් ඡං-ශියා