යාපනය තිස්ස විහාරයට එරෙහිව පැවැත්වූ විරෝධතාවයේ යටි අරමුණ සම්බන්ධව අරුන් සිද්ධාර්ථන් කරුණු හෙළිකරයි..

Dec 24, 2025 at 05:48 AM

|

Lanka Leader

යාපනය තිස්ස විහාරයට එරෙහිව  උතුරේ දේශපාලකයන් සහ ඔවුන්ගේ අනුගාමිකයන් පැවැත්වූ විරෝධතාවය පිළිබඳව සර්වජන බලය යාපනය දිස්ත්‍රික් සංවිධායක අරුන් සිද්ධාර්ථන් කරුණු හෙළිදරව් කරමින් මාධ්‍ය නිවේදනයක් නිකුත් කර තිබේ.

අදාළ නිවේදනය පහළන්..

මාධ්‍ය නිවේදනය

2025 දෙසැම්බර් 22

තායියිඩි තිස්ස විහාරයට අදාළ සිදුවීම්:

කුල අපවාදය, නීති කඩ කිරීම් සහ ඉඩම් හිමිකාරිත්වය පිළිබඳ අභියෝග කිරීම.

2025 දෙසැම්බර් 04 වන දින, තායියිඩි තිස්ස විහාරයට එරෙහිව පැවති විරෝධතාවක් අතරතුර, සමස්ත ලංකා දෙමළ කොංග්‍රසයේ සාමාජිකයින් දෙදෙනෙකු "පරයියා" යන නින්දිත කුල අපවාදය භාවිතා කරමින් පොලිස් නිලධාරීන්ට වාචිකව අපයෝජනය කළ බව දැක්වෙන තොරතුරු නිල වශයෙන් වාර්තාවී තිබේ.

කුල පදනම් කරගත් වෙනස්කම්වලට එරෙහිව සටන් කිරීම සඳහා 1957 වසරේදී පනවන ලද සමාජ ආබාධ වැළැක්වීමේ පනත යටතේ පුද්ගලයෙකුට අවමන් කිරීම සඳහා කුල පදනම් කරගත් අපහාස භාවිතා කිරීම බරපතල අපරාධයකි. මෙම නීතිය යටතේ, මෙවන් කුල පදනම් කරගත් පීඩනයන් සඳහා වසර තුනකට නොඅඩු සිර දඬුවමක් නියම කළ හැකිය.

පොලිස් නිලධාරීන්ට එරෙහිව මෙම කුල අපවාදය භාවිතා කළ අයගෙන් එක් අයෙකු නීතිඥ නඩරාජා කාන්ඩිපන් මහතා බව තහවුරු වී ඇත. ඉහත සඳහන් පනත යටතේ අපගේ නීති කණ්ඩායම විසින් ඔහුට සහ අනෙක් පුද්ගලයාට එරෙහිව පියවරගැනීම සඳහා මූලික නීතිමය ක්‍රියාමාර්ග ආරම්භ කර ඇති බව,  විශේෂයෙන් පීඩිත ප්‍රජාවන්ගේ යහපත සහ අවබෝධය සඳහා මෙසේ වාර්තා කර සිටිමු.

ඉන් අනතුරුව, 2025 දෙසැම්බර් 21 වන දින, යාපනයේ කන්කසන්තුරේ, තායියිඩි හි පිහිටි ඓතිහාසික වශයෙන් වැදගත් තිස්ස රජමහා විහාරයට එරෙහිව විරෝධතා දැක්වූ සහ සටන් පාඨ කෑ ගැසූ පුද්ගලයින්, එම ඉඩම තමන්ට අයත් බව කියා සිටියහ. එසේ නම් ඔවුන් විසින් හිමිකම් පෑමට සඳහා පදනම්කරගත්  ඔවුන්ගේ හිමිකම් ඔප්පුවල පිටපත් ප්‍රසිද්ධ මාධ්‍යයට  නිකුත් කරන ලෙස අපි ඔවුන්ට විවෘතව අභියෝග කරමු.

තවද, ඔවුන්ගේ යැයි කියනු ලබන ඉඩම් හිමිකම තහවුරු කිරීම සඳහා හැකිනම් අධිකරණ ක්‍රියාමාර්ගයන් ගන්නා ලෙස අපි ඔවුනට දැඩිව අභියෝග කරමු.  යම් හෙයකින් එවැනි නීතිමය ක්‍රියාමාර්ග ආරම්භ කිරීම සඳහා ඔවුන්ට මූල්‍ය ප්‍රතිපාදන නොමැති නම්, එහි  සම්පූර්ණ නීතිමය වියදම් දැරීමට අපි සූදානම් බව  විනිවිදභාවයෙන් හා යහපත් විශ්වාසයකින් යුතුව ප්‍රකාශ කරමු.

මීට පෙර, පුතුකුඩියිරිප්පු හි මනත්කුලම් වැවේ ශිව දේවාලයක් නීති විරෝධී ලෙස ඉදිකිරීම පිළිබඳව අපි නැවත නැවතත් අවධානය යොමු කර ඇත්තෙමු. මෙම ජල කඳට යාබදව ජීවත් වන පදිංචිකරුවන් පහත සඳහන් ආයතන වෙත විධිමත් ලෙස පැමිණිලි කර ඇත:

• ශ්‍රී ලංකා මානව හිමිකම් කොමිසම

• මන්තුවිල් ගොවි සංවිධානය

• මුලතිව් ගොවිජන සංවර්ධන දෙපාර්තමේන්තුව

• පුතුකුඩිඉරිප්පු ප්‍රාදේශීය සභාව

මෙම පැමිණිලි මත පදනම්ව, ඉදිකිරීම් නීති විරෝධී බව සනාථ කරන නිල ලේඛන ලබාගෙන ඇති අතර, මෙම ලේඛන මහජනතාවගේ දැනගැනීම සඳහා ප්‍රසිද්ධ කර ඇත. ඊට අමතරව, ඒ වෙනුවෙන් නඩු අංක KN/2023/Writ/4 යටතේ කිලිනොච්චි මහාධිකරණය හමුවේ නඩුවක් පවරා ඇති අතර එම නඩුව තවදුරටත්  විභාග වෙමින් පවතී.

ඒ හා සමානව, තායියිඩි තිස්ස විහාරය පිහිටා ඇති ඉඩමේ අයිතිය ඉල්ලා සිටින අය ද තම හිමිකාරිත්ව ලේඛන ප්‍රසිද්ධියේ හෙළි කර අධිකරණය හරහා නීතිමය සහනයක් ලබා ගත යුතුය. එසේ කිරීමෙන් පමණක් මෙම ඉඩම් හිමිකම් අව්‍යාජද නැතහොත් වංචනිකද යන්න ගරු අධිකරණයට මෙන් ම මහජනතාවට ද තීරණය කළ හැක.

මෙම පියවර නොගෙන විරෝධතා පමණක් දිගටම සිදුකළහොත්, එවැනි ක්‍රියාවන් බුද්ධාගමට එරෙහිව, සංස්කෘතික හා ආගමික සංහිඳියාව විනාශ කිරීම සඳහා ගන්නා සචේතනික සහ ක්‍රමානුකූල උත්සාහයන් ලෙස සලකනු ලැබේ. වලංගු ගෙවීමක් සහිතව නීත්‍යානුකූලව මිලදී ගත් කන්දරෝඩෙයි ප්‍රදේශයේ  ඉඩමක බෞද්ධ විහාරයක් ඉදිකිරීම වැළැක්වීම සඳහා ද දෙමළ ජාතික ජනතා පෙරමුණේ සාමාජිකයින් විරෝධතා පැවැත්වීම මෙම ස්ථාවරය තවදුරටත් තහවුරු කරයි.

එවැනි ක්‍රියා ශ්‍රී ලංකා ප්‍රජාතන්ත්‍රවාදී සමාජවාදී ජනරජයේ ආණ්ඩුක්‍රම ව්‍යවස්ථාව යටතේ සහතික කර ඇති ආගමික නිදහස සඳහා වන මූලික අයිතිය සෘජුවම උල්ලංඝනය කිරීමකි.

තවද, ශ්‍රී ලංකාවේ සහ තවත් රටවල් කිහිපයක ත්‍රස්තවාදී කණ්ඩායමක් ලෙස තහනම් කර ඇති සංවිධානයක් වන එල්ටීටීඊයට සම්බන්ධවූවන් විසින් ශ්‍රී ලංකාවේ උතුරු සහ නැගෙනහිර පලාත්වල ඉදිකර ඇති නීති විරෝධී ස්මාරක, ප්‍රතිමා, අනුස්මරණ ව්‍යුහයන් සහ සුසාන භූමි කෙරෙහි අපි අවධානය යොමු කරමු.

නීති විරෝධී යැයි පවසමින්  තිස්ස විහාරය ඉවත් කරන ලෙස ඉල්ලා සිටින අය, මෙසේ බෞද්ධ ආගමික ස්ථානවලට එරෙහිව පක්ෂග්‍රාහී ක්‍රියාමාර්ග ගැනීමට ප්‍රථමයෙන්, ත්‍රස්තවාදයට  සම්බන්ධ මෙම නීති විරෝධී ප්‍රතිමා, අනුස්මරණ සහ සුසාන භූමි ඉවත් කිරීමට පියවර ගත යුතුය.

මෙම සන්දර්භය තුළ, ස්වාධීන පාර්ලිමේන්තු මන්ත්‍රී රාමනාදන් අර්චුනා මෑතකදී කන්දරෝඩයි සම්බන්ධයෙන් පදනම් විරහිත සහ නොමඟ යවන සුළු ප්‍රකාශයක් කරමින්, එහි කිසිදු බෞද්ධ ස්ථානයක් නොමැති බව හා කිසිදු පුරාවිද්‍යාත්මක පර්යේෂණයක් සිදු කර නොමැති බව ප්‍රකාශ කළ බව ද සඳහන් කළ යුතුය. මෙම ප්‍රකාශය කිසිදු සත්‍යයකින් තොර පදනම් විරහිත ප්‍රකාශයකි.

පොන්නම්පලම් රගුපති විසින් රචිත "යාපනයේ මුල් පදිංචිය - පුරාවිද්‍යා සමීක්ෂණයක්" යන කෘතිය කියවන ලෙස අපි ඔහුගෙන් ඉල්ලා සිටිමු. එය,  1918 දී ශ්‍රීමත් ඊ. පීරිස් විසින් එහි සිදු කළ කැනීම් වලින් කන්දරෝඩයි අඩවියේ වැදගත්කම හඳුනා ගත් බව පැහැදිලිව ලේඛනගත කර ඇත. පසුකාලීන දශක කිහිපය තුළ, පුරාවිද්‍යා දෙපාර්තමේන්තුව මගින් සිදුකර ඇති ක්‍රමානුකූල කැණීම් මඟින් යාපනය හුණුගල් සහ කොරල් ගල් භාවිතයෙන් ඉදිකරන ලද බෞද්ධ ඉදිකිරීම් ව්‍යුහයන්ගේ නටබුන් පොකුරු අනාවරණය වී තිබේ.

එපමණක් නොව, 1970 දී පෙන්සිල්වේනියා විශ්ව විද්‍යාලයේ කෞතුකාගාර පුරාවිද්‍යා කණ්ඩායමක් විසින් මුල් ජනාවාස මට්ටම්වල පූර්ව බෞද්ධ මෙගලිතික (ගල් වලින් නිමවා ඇති අනුස්මරණ ස්ථම්භයන්/ඉදිකිරීම් සහිත) අවධියක් හඳුනා ගන්නා ලදී.

බොහෝ ජාතික සහ ජාත්‍යන්තර පුරාවිද්‍යාත්මක අධ්‍යයනයන් මගින් කන්දරෝඩයි යනු ක්‍රි.පූ. 4 වන සියවස දක්වා දිවෙන බෞද්ධ නාගරික ජනාවාසයක් බව නිශ්චිතවම තහවුරු කර ඇත. එබැවින් උතුරු පළාතේ බෞද්ධ ඉතිහාසය විකෘති කිරීමට උත්සාහ කරන ඩයස්පෝරාවේ පිටුබලය ලබන එල්ටීටීඊ හිතවාදීන් විසින් ප්‍රවර්ධනය කරන ලද පුද්ගලයින්ට එරෙහිව සුපරීක්ෂාකාරීව සිටින ලෙස මහජනතාවගෙන් ඉල්ලා සිටිමු.

පාර්ලිමේන්තුවේදී රජය විවේචනය කිරීම හෝ හමුදාව කෙරෙහි අනුකම්පා සහගත භාෂාව භාවිතා කිරීම විශ්වසනීයත්වයේ දර්ශක ලෙස වරදවා වටහා නොගත යුතුය. බැටළුහම් පොරවාගත් වෘකයින්ගෙන් පරිස්සම් වන ලෙස විශේෂයෙන් ම සිංහල මහජනතාවට අපි අවවාදාත්මකව මතක්කර සිටිමු.

අරුන් සිද්ධාර්ථ්

දිස්ත්‍රික් සංවිධායක

සර්වජන බලය – යාපනය