නාය ගිය තැන් නිරීක්ෂණයට ඉතාලියෙන්, ප්‍රංශයෙන් සහ චීනෙන් ඇවිල්ලා..

Dec 21, 2025 at 09:15 AM

|

Lanka Leader

බරපතළ නාය යෑමට ලක් වූ ප්‍රදේශ අවට ඉරි තැළීම් හා පැල්මට ලක්ව ඇති කඳු බෑවුම්  නිරීක්ෂණයට මේ වන විට විදේශ විශේෂඥ භූ-විද්‍යාඥයන් කණ්ඩායම් තුනක් පැමිණ ඇතැයි ජාතික ගොඩනැගිලි පර්යේෂණ ආයතනයේ ජ්‍යෙෂ්ඨ නිලධාරියෙක් පවසයි.

ඉතාලිය, ප්‍රංශය හා චීනය යන රටවලින් මෙම භූ විද්‍යාඥ කණ්ඩායම් මෙරටට පැමිණ ඇතැයි ඔහු කීය.

ඒ අනුව, ආපදා තත්ත්වයත් සමග නාය යෑමට ලක් වූ ස්ථානවල බෑවුම් ප්‍රදේශවල නාය යෑම් පෙර සලකුණු වශයෙන් පැල්මට, ඉරිතැළීමකට ලක්ව ඇති ප්‍රදේශ ඩ්‍රෝන තාක්ෂණය යොදා ගෙන මූලික අධ්‍යයන කටයුතු ආරම්භ කර ඇතැයි අධ්‍යක්ෂ ජනරාල්වරයා සඳහන් කළේ ය.

මෙම අධ්‍යයන කටයුතු ජාතික ගොඩනැගිලි පර්යේෂණ සංවිධානය ඇතුළු දේශීය විශේෂඥයන්ගේ සහායෙන් සිදු කෙරෙන්නේ යැයි ද ඔහු පැවසීය.

ඉරි තැළීමට, පැළීමට ලක්ව ඇති කඳු බෑවුම්වල සිදුවන හානිය අවම කිරීමට ඉන්ජිනේරු ක්‍රම භාවිත කිරීමේ හැකියාව පිළිබඳව මෙම අධ්‍යයන කටයුතුවලින් සොයා බලන බව ඔහු සඳහන් කළේ ය.

නාය යෑමට ලක් වූ හා එහි බලපෑමට ලක්ව ඇති ප්‍රදේශ ඩ්‍රෝන තාක්ෂණයෙන් ඡායාරූප ගත කර ඒ ලබාගන්නා ඡායාරූප මගින් අධ්‍යයන කටයුතු සිදු කෙරෙනු ඇත.

විදේශීය විශේෂඥයන්ගේ පරීක්ෂණවලට අමතරව දේශීය භූ විද්‍යාඥයන් සහ ඉන්ජිනේරුවන්ගෙන් සමන්විත කණ්ඩායම් ගණනාවක් කරගෙන යන පර්යේෂණ කටයුතු අඛණ්ඩව සිදු වෙමින් පවතින බව ද එම නිලධාරියා සඳහන් කළේ ය.

බරපතළ ගණයේ නාය යෑම් සිදුව තිබෙන මහනුවර, මාතලේ, බදුල්ල, නුවරඑළිය, කුරුණෑගල හා  සබරගමුව පළාතට අයත් නාය යෑමට හා එම තර්ජනයට ලක් වූ ප්‍රදේශ විදේශ විශේෂඥයන්ගේ නිරීක්ෂණයට බඳුන් කෙරේ.

- මව්බිම