ගංවතුරේදී වාන් දොරටු ඇරීම ගැන වාරිමාර්ග ලොක්කෙකුගෙන් ඇඟ හිරි වැටෙන කතාවක්..

Dec 7, 2025 at 05:40 AM

|

Lanka Leader

මෙරටට බලපෑ සුළි කුණාටු ආපදාව සහ ගංවතුර තත්ත්වය සම්බන්ධයෙන් රජයේ නොසැලකිලිමත්භාවය පිළිබඳව කරුණු 13 ක් හිටපු අමාත්‍ය උදය ගම්මන්පිල මහතා අන්තර්ජාල නාලිකාවක සාකච්ඡාවකට එක්වෙමින් ඉදිරිපත් කරයි. 

එහිදී ඔහු තමන් හිටපු වාරිමාර්ග ප්‍රධානියෙකු සමඟ පැවති කතාබහකදී ඇඟ හිරිවැටෙන කතාවක් හෙලිවුන බවත් හෙතෙම පැවසීය.

මිලිමීටර් 400ක් හෝ 500ක් වැනි විශාල වර්ෂාපතනයක් පිළිබඳව අනාවැකි ලැබුණු විට, මහ වැස්සක් පැමිණීමට පෙර ඉංජිනේරුවන් විසින් සිදු කළ යුතු මූලිකම කාර්යය වන්නේ එම ප්‍රමාණයට ජලය රැස්කර ගැනීමට හැකි වන පරිදි ජලාශවල වාන් දොරටු ක්‍රමානුකූලව විවෘත කිරීමයි බවත් එවිට පහත්බිම් එකවර ජලයෙන් යටවීමක් සිදු නොවන අතර ජලාශයට අවශ්‍ය ධාරිතාව රඳවා ගත හැකි වන බවත් මෙම කාර්යය සිදු නොකිරීමට හේතුව ගම්මන්පිල මහතා හිටපු වාරිමාර්ග ප්‍රධානියෙකුගෙන් විමසා ඇත. 

ඒහිදි හිටපු වාරිමාර්ග ප්‍රධානියා පෙන්වා දුන් ආකාරයට, නිලධාරීන් වාන් දොරටු විවෘත කිරීමට බිය වී ඇත්තේ, එසේ විවෘත කර බැරි වෙලාවත් අපේක්ෂිත වර්ෂාව නොලැබුණහොත්, විදුලි නිෂ්පාදනයට තිබූ ජලය නාස්ති කළාය යනුවෙන් ඔවුන්ට එරෙහිව දූෂණ චෝදනාවක් නගා ඉහළ නිලධාරීන් සියල්ලන්ටම දඬුවම් කිරීමට ඉඩ ඇති බැවිනි.

එම නිසා, ජල කළමනාකරණය සඳහා අවශ්‍ය ක්‍රියාමාර්ග ගැනීම නිලධාරීන් විසින් "හිරේ යන්න වෙන වැඩක් බවට පත්වෙන" දෙයක් ලෙස සලකනු ලබන බව හෙලි වූ බවත් ඔහු ඒහිදී පැවසීය.

ගම්මන්පිල මහතා පෙන්වා දුන්නේ, මෙම බිය හේතුවෙන් රජයේ නිලධාරීන් "වැඩි වැඩ ලෙඩ, අඩු වැඩ අඩු ලෙඩ, වැඩ නොකළොත් ලෙඩ නෑ" (more work more trouble, less work less trouble, no work no trouble) යන ආදර්ශ පාඨය අනුව ක්‍රියාත්මක වන බවයි.

නිලධාරීන්ගේ මෙම භීතිය නිසා, නිලධාරීන් කිසිදු තීරණයක් නොගෙන, වැරදුනොත් තමන්ට සිරගත වීමට සිදුවන බව දන්නා නිසා, තීරණ ගැනීමේ වගකීම ඉහළට යොමු කරමින් (බෝලේ පාස් කරමින්) ආරක්ෂිතව සිටීමට පෙළඹී ඇත. 

මේ නිසා ආපදාව පැමිණීමට පෙර ජලාශ හිස් කිරීම හෝ මෝය කටවල් පළල් කිරීම වැනි ක්ෂණික ක්‍රියාමාර්ග ගැනීමට නිලධාරීන් අසමත් වූ බව ඔහු තවදුරටත් සඳහන් කළේය.