පුරා විද්‍යා සංඥා පුවරු තිබුණු තැනම ආපහු සවි කරන්න.. ඇප ලද සැකකරුවන්ට අධිකරණයෙන් නියෝග..

Nov 26, 2025 at 06:41 AM

|

Lanka Leader

පුරාවිද්‍යා සංඥා පුවරු හා දිසා පුවරු ගලවා ඉවත් කිරීම සම්බන්ධයෙන් අත්අඩංගුවට ගත් සැකකරු හා අධිකරණයට භාර වූ සැකකරුවන් තිදෙනාට එක් අයෙකුට රුපියල් ලක්ෂය බැගින් ලක්ෂ හතරක ශරීර ඇප මත මුදාහරීමට නියම කළ වාලච්චෙන මහේස්ත්‍රාත් M.M.රතීප් අහමඩ් ඉවත් කරන ලද පුවරු යළි එම ස්ථානවල ස්ථාපිත කිරීමට ඊයේ (25) සැකකරුවන්ට නියෝග කළේය.

මෙසේ ශරීර ඇප මත මුදාහලේ වලච්චේන කෝරළේ පත්තු ප්‍රාදේශීය සභාවේ සභාපති එස්. සුදාකරන් ඇතුළු සිව් දෙනෙකි.

සැකකරුවන් වෙනුවෙන් පෙනී සිටි නීතිඥ ඒ. එම්. සුමන්තිරන් අධිකරණය හමුවේ පැවසුවේ කිසියම් සංඥා පුවරුවක් හෝ නාමපුවරුවක් ඉදිකරන්නේ නම් පළාත් පාලන පනත ප්‍රකාරව ඒ සඳහා අදාල පළාත් පාලන ආයතනයෙන් අවසර ගත යුතු බවයි.

එම අවසරයක් ලබාගෙන නොතිබීම නිසා එම පළාත් පාලන ආයතනයෙන් මෙම පුවරු ගලවා ඉවත් කර ඇති බව පැවසීය.

පුරාවිද්‍යා දෙපාර්තමේන්තුව වෙනුවෙන් අධිකරණයේ පෙනී සිටි මඩකලපුව අම්පාර සහකාර පුරාවිද්‍යා අධ්‍යක්ෂ අනුශාන් මුණසිංහ මහතා අධිකරණය හමුවේ පැවසුවේ 1940 අංක 09 දරණ පුරාවිද්‍යා ආඥා පනතෙන් සංශෝධිත 1998 අංක 24 දරණ පුරා වස්තු පනත ප්‍රකාරව පුරාවිද්‍යා නාමපූරුවක් හෝ සංඥා පුවරුවක් ඉදිකිරීම සඳහා අදාල පළාත් පාලන ආයතනයෙන් අවසර ලබාගත යුතු නොමැති බවයි.

පනත ප්‍රකාරව එවැනි පුවරුවක් ස්ථාපිත කරන්නේ නම් භාෂා ත්‍රිත්වයෙන් එය ප්‍රදර්ශනය කළ යුතු බවත් ඒ අනුව පුරාවිද්‍යා දෙපාර්තමේන්තුව කටයුතු කර ඇති බවයි.

ඉදිරිපත් වූ කරුණු සැලකිල්ලට ගත් මහේස්ත්‍රාත්වරයා අදාල පූවරු නැවත එම ස්ථානයේ ස්ථාපිත කරන ලෙස සැකකරුවන්ට නියෝග කළ අතර එම කටයුතු ලබන දෙසැම්බර් 15 වන දිනට පෙර සිදුකළ යුතු බවට ද නියෝග කළේය.

ඒ සම්බන්ධයෙන් ප්‍රගතිය දැක්වෙන වාර්තාවක් ලබන දෙසැම්බර් 15 වෙන දිනට අධිකරණයට ඉදිරිපත් කරන ලෙසටයි අධිකරණයෙන් වාලච්චේන පොලිසියට නියම වූයේ.