වෙනිසියුලාව සිය තෙල් සම්පත සංවර්ධනය කිරීම වෙනුවෙන් තවත් වසර 15කට රුසියාව සමඟ ගිවිසුම් ගතවෙයි! කොලොම්බියාවට ගෑස් අපනයනයටත් අඩිතාලම සකසයි!

Nov 22, 2025 at 09:36 AM

|

Lanka Leader

පසුගිය 20 වනදා, වෙනිසියුලානු ජාතික සභාව රුසියාව සහ වෙනිසියුලාව අතර උපායමාර්ගික බලශක්ති සන්ධානය තව දුරටත් ශක්තිමත් කරමින් 2041 වර්ෂය දක්වා බොකෙරොන් සහ පෙට්‍රොපෙරිජා තෙල් සමාගම් සඳහා ගවේෂණ සහ නිෂ්පාදන මෙහෙයුම් දීර්ඝ කිරීම අනුමත කරනු ලැබීය.

“රුසියාව සමඟ උපායමාර්ගික බලශක්ති සන්ධානය යටතේ ස්ථාපිත කරන ලද ඒකාබද්ධ ව්‍යාපාර සඳහා වසර 15 ක දීර්ඝ කිරීමක් අනුමත කිරීම සම්බන්ධයෙන් වෙනිසියුලානු ජාතික සභාවට අපි ස්තූතිවන්ත වෙනවා.” වෙනිසියුලානු උප ජනාධිපති ඩෙල්සි රොඩ්‍රිගස් පැවසීය.

"මෙය අපේ රටේ බලශක්ති අංශය සංවර්ධනය කිරීම සඳහා වැදගත් පියවරක්. අපගේ ශක්තිමත් බලශක්ති හවුල්කාරිත්වය බෙදාගත් ස්වාධීනත්වයේ සහ සමෘද්ධියේ අනාගතයකට සහාය වනවා." ඇය වැඩිදුරටත් පැවසුවාය.

වෙනිසියුලාවට එරෙහි එක්සත් ජනපදය කරනු ලබන බාධාවන්  ගෝලීය බලශක්ති සැපයුම්කරුවෙකු ලෙස වෙනිසියුලාව ශක්තිමත් කිරීමට ජනාධිපති නිකොලස් මදුරෝ දරන උත්සාහය අභිබවා යාම වළක්වාලීමට ප්‍රමානවත් වී නොමැති බව රොඩ්‍රිගස් අවධාරණය කළේය.

“කිසිදු නීති විරෝධී බාධා කිරීමකට අසල්වැසි ජාතීන් සමඟ සංවර්ධනය බෙදා ගැනීමට අපගේ බලශක්ති  ප්‍රභවයන් තුල තිබෙන ශක්තිය යොදා ගනිමින් කරනු ලබන උත්සාහය මැඩ පැවැතිවිය නොහැකියි. රුසියානු-වෙනිසියුලානු මිත්‍රත්වය දිගු කල් දිනේවා!” ඇය පැවසුවාය.

රජයට අයත් පෙට්‍රෝලියෝස් ද වෙනිසියුලා (PDVSA ) සමාගමට අයත් බොකෙරොන් සහ පෙට්‍රොපෙරිජා සමඟ රුසියානු ආයෝජන වලින් සමන්විත ඒකාබද්ධ ව්‍යාපාරයක් සාර්ථකව පවත්වා ගෙන යයි. ඔවුහු වෙනිසියුලානු ඛනිජ තෙල් කර්මාන්තය සඳහා උපායමාර්ගික කලාපයක් වන සුලියා ප්‍රාන්තයේ තෙල් නිස්සාරණ කටයුතුවල නි‍යැලෙමින්  සිටී..

මේ අතර වෙනිසියුලානු ජාතික සභාවේ බලශක්ති හා ඛනිජ තෙල් කොමිසමේ සභාපති නීති සම්පාදක ඔර්ලන්ඩෝ කැමාචෝ පැවසුවේ පෙට්‍රොපෙරිජා විසින් ශුද්ධ බොරතෙල් බැරල් මිලියන 68 ක් සහ ඒ ආශ්‍රිත ගෑස් ඝන අඩි බිලියන 28 කට වඩා නිස්සාරණය කිරීම සඳහා ඇමරිකානු ඩොලර් මිලියන 292 ක් පමණ ආයෝජනය කරන බවයි. මෙම මෙහෙයුම් බටහිර වෙනිසියුලාවේ විශාලතම විභවයක් ඇති එක් ක්ෂේත්‍රයකට ශක්තිය ලබා දීමට උපකාරී වනු ඇති බව දේශපාලන ආර්ථික විද්වත්හු පවසති.

ආයෝජන විවිධාංගීකරණය, උපායමාර්ගික මිත්‍ර රටවලින් ප්‍රාග්ධනය ආකර්ෂණය කර ගැනීම සහ තෙල් නිෂ්පාදනය වැඩි කිරීම තුළින් වෙනිසියුලාව සිය ආර්ථික ප්‍රකෘතිය පවත්වා ගැනීමට ගන්නා උත්සාහය මධ්‍යයේ ජාතික සභාවේ තීරණය ප්‍රකාශයට පත් වීම විශේෂත්වයකි.

කැරකස් සහ මොස්කව් පොසිල ඉන්ධන සංවර්ධනය කෙරෙහි අවධානය යොමු කරමින් දිගුකාලීන හවුල්කාරිත්වයක් පවත්වාගෙන යාමේදී බොකෙරොන් සහ පෙට්‍රොපෙරිජා දක්වා මෙහෙයුම් දිගු කිරීම පැහැදිලි භූ දේශපාලනික පණිවිඩයක් ද සංඥා කරන බව විද්වත්හු පෙන්වා දෙති.

මේ අතර වෙනිසියුලාවේ කම්කරු සංවිධාන සමඟ ජනාධිපති නිකොලස් මදුරෝ පැවැත්වූ සාකච්ඡාවකින් පසුව මාධ්‍ය වෙත අදහස් දක්වමින් ඔහු පවසා සිටියේ වෙනිසියුලාව කොලොම්බියා රජයට ගෑස් අපනයනයට සූදානම් බවයි. එසේම් වැඩිදුරටතත් අදහස් දක්වමින් මදුරෝ, මෙම බලශක්ති අපනයනය ජාතීන් දෙක අතර වැඩි ආර්ථික ඒකාබද්ධතාවයක ආරම්භය සනිටුහන් කරන බව පැවසීය. එය ජාතීන් දෙක අතර ආයෝජන සහ වෙළඳාමේ ඉහළ සමෘද්ධියක් ඇතිවනු ඇති බවට දේසහපාලන ආර්ථික විද්වත්හු පුරෝකථනය කරති.

"අපි ඒකාබද්ධ ද්විපාර්ශවික ආර්ථිකයක් ප්‍රවර්ධනය කළ යුතුයි. මහා කොලොම්බියාවේ අත්තිවාරම් එක්සත් කිරීමට සහ නැවත ගොඩනැගීමට ඉතිහාසය අපට බල කරනවා.!" වෙනිසියුලාවේ බලශක්ති කර්මාන්තය නැවත සක්‍රීය කිරීම සහ කලාපයට එහි සැපයුම් ධාරිතාව පුළුල් කිරීම සඳහා වෙනිසියුලානු පරිපාලනයේ ඇති කැපවීම ඉස්මතු කරමින් මදුරෝ පැවසීය.

එහිදී වැඩිදුරටත් අදහස් දක්වමින්, වෙනිසියුලාව දිනකට තෙල් බැරල් මිලියන 1.2 ක නිෂ්පාදන මට්ටමට ළඟා වනු ඇති බව මදුරෝ අවධාරණය කරනු ලැබූවේ එය කම්කරු පන්තියේ තිරසාර උත්සාහයන් නිසා ලබාගත් ඉලක්කයක් බවයි.

මෙම බලශක්ති සහ ආර්ථික ප්‍රගතිය බොලිවේරියානු මූලධර්ම යටතේ තිරසාර කළ යුතු බව ද ඔහු  දැඩිව අවධාරණය කළේය.

දෙරට අතර සංස්කෘතික හා සමාජීය සබඳතා සම්බන්ධයෙන් අදහස් දක්වමින් කොලොම්බියානු පුරවැසියන් මිලියන 6 ක් වෙනිසියුලාවේ ජීවත් වන බව ද ඔහු පෙන්වා දුන්නේය. දේශපාලන විද්වතුන්ට අනුව මදුරෝ ගෙන ඇති පියවර ආර්ථික වශයෙන් සහ සමාජීය වශයෙන් ගැඹුරු කළ යුතු ඓතිහාසික සම්බන්ධතාවයක පිළිබිඹුවකි.

මෙහිදි මදුරෝ වෙනිසියුලාවේ සාර්ව ආර්ථික ප්‍රකෘතිය ඉස්මතු කළ අතර, ලතින් ඇමරිකාව සහ කැරිබියන් සඳහා වූ ආර්ථික කොමිසම (ECLAC) මෙම වසරේ රටේ දළ දේශීය නිෂ්පාදිතය 6% කින් වර්ධනය වනු ඇතැයි ඇස්තමේන්තු කර ඇති බවද සඳහන් කළේය.

වෙනිසියුලාවේ ආර්ථික ප්‍රසාරණය අඛණ්ඩව කාර්තු 18 ක් තුළ සිදු වී ඇති බව අවධාරණය කළ මදුරෝ එම ජයග්‍රහනය වෙනුවෙන් කැපවූ සියලු සේවකයින් සහ ව්‍යවසායකයින්ගේ උත්සාහයන්ට ගෞරව කරන බවද පැවසුවේය.

මේ වන විට, වෙනිසියුලානු වෙළඳපොලේ ඇති නිෂ්පාදනවලින් 90% කට වඩා වැඩි ප්‍රමාණයක් දේශීය නිෂ්පාදන වන බව පෙන්වා දුන් මදුරෝ එය බොලිවේරියානු ජාතියේ ආර්ථික ස්වාධීනත්වය පෙන්නුම් කරන සාධකයක් බවද පෙන්වා දුන්නේය.