කෘත්‍රිම බුද්ධිය ‘අන්ධ ලෙස’ විශ්වාස කරන්න එපා - ගූගල් සමාගමේ ප්‍රධාන විධායක නිලධාරී

Nov 22, 2025 at 04:46 AM

|

Lanka Leader

කෘත්‍රිම බුද්ධි එන්ජින් සත්‍ය නිරවද්‍යතාවය අනුව අවදානමට ලක්ව ඇති අතර අන්ධ ලෙස විශ්වාස නොකළ යුතු බව ගූගල් සහ එහි මව් සමාගම වන ඇල්ෆාබෙට් හි ප්‍රධාන විධායක නිලධාරී සුන්දර් පිච්චෛ 18 වනදා විකාශය වූ බීබීසී සමඟ කළ සම්මුඛ සාකච්ඡාවේදී  අනතුරු ඇඟවීය.

සම්මුඛ සාකච්ඡාවේදී, පිච්චෛ පරිශීලකයින්ගෙන් ඉල්ලා සිටියේ කෘත්‍රීම බුද්ධිය මත පමණක් යැපීමට වඩා පුළුල් පරාසයක සෙවුම් මෙවලම් මත විශ්වාසය තබන ලෙසයි.

“ඔබට යමක් නිර්මාණශීලීව ලිවීමට අවශ්‍ය නම්” කෘත්‍රීම බුද්දි මෙවලම් ප්‍රයෝජනවත් වෙනවා. නමුත් පරිශීලකයින් “ඔවුන් නිපුණත්වය දක්වන ක්ෂේත්‍ර වල මෙවැනි මෙවලම් භාවිතා කිරීමට ඉගෙන ගත යුතු අතර, කෘත්‍රිම බුද්ධිය පවසන සෑම දෙයක්ම අන්ධ ලෙස විශ්වාස නොකළ යුතුයි.” ඔහු පැවසීය. “වර්තමාන අති නවීන කෘත්‍රීම බුද්ධි තාක්ෂණය සමහර දෝෂ වලට ගොදුරු වී තිබෙනවා.” ඔහු අවධාරණය කලේය.

ගූගල් සිය ඊළඟ ප්‍රධාන කෘත්‍රිම බුද්ධි ආකෘතිය වන Gemini 3.0 එළිදැක්වීමට සූදානම් වෙමින් සිටින අවස්ථාවක පිච්චෛ මෙලෙස අදහස් දැක්වීය. නව කෘත්‍රීම බුද්ධි සහායකයා වසර අවසන් වන විට නිකුත් කිරීමට අපේක්ෂා කරන බව පිච්චෛ මීට පෙර අනාවරණය කළේය.

2023 දී දියත් කරන ලද Gemini, එහි සීමිත 'ආරක්ෂාව' සහ 'විවිධත්වය' සැකසුම් සඳහා විවේචනයට ලක් වූ අතර, එමඟින් එහි රූප-උත්පාදන ප්‍රතිදානයන්හි කැපී පෙනෙන සාවද්‍යතා ඇති විය. ඇමරිකාවේ ආරම්භක පියවරුන් සහ රුසියානු අධිරාජ්‍යයන්ගේ සිට කතෝලික පාප්වරුන් සහ නාසි ජර්මානු සොල්දාදුවන් දක්වා ඓතිහාසික පුද්ගලයින් වැරදි ලෙස නිරූපණය කිරීම හේතුවෙන් මෙම ආකෘතිය පුළුල් ලෙස සමච්චලයට ලක් විය.

මෙම මස මුලදී, Gemini හට රහසිගතව පරිශීලක දත්ත රැස් කිරීමට අවසර දුන් බවට Google සමාගමට චෝදනා එල්ල විය. කැලිෆෝනියා ෆෙඩරල් අධිකරණයක ගොනු කරන ලද නඩුවකින් කියා සිටියේ සමාගම කෘත්‍රිම බුද්ධි සහායකයාට Gmail, කතාබස් සහ වීඩියෝ සම්මන්ත්‍රණ සේවා හරහා පුද්ගලික සන්නිවේදන කාර්යයන්ට නීති විරෝධී ලෙස බාධා කිරීමට සහ නිරීක්ෂණය කිරීමට ඉඩ දී ඇති බවයි.

කෘත්‍රිම බුද්ධි තාක්ෂණයන්හි වේගවත් නැගීම හේතුවෙන් එම ක්ෂේත්‍රයේ තක්සේරු කිරීම් ඉහළ නංවා ඇති අතර, සිලිකන් නිම්නයේ සහ ඉන් ඔබ්බට විභව බුබුලක් පිළිබඳ බොහෝ අනතුරු ඇඟවීම් කර තිබේ. එහෙත් සමාගම් වේගයෙන් වර්ධනය වන කර්මාන්තයේ අඩිපාරක් ලබා ගැනීමට විශාල වශයෙන් වියදම් කරමින් සිටිති. ChatGPT වැනි සේවාවන් සමඟ වේගයෙන් ඉදිරියට යාමට තාක්ෂණික දැවැන්තයින් තරඟ කරමින් සිටින අතර, ඒවා මාර්ගගත සෙවුමෙහි Google හි ආධිපත්‍යයට අභියෝග කර ඇති අතර ක්ෂේත්‍රය පුරා ආයෝජනය වේගවත් කර තිබේ.

ප්‍රධාන තාක්ෂණික සමාගම් කෘත්‍රිම බුද්ධිය සඳහා වියදම් කිරීම වසරකට ඩොලර් බිලියන 400 ක් පමණ යැයි ගණන් බලා ඇත.

කෘත්‍රිම බුද්ධි බුබුලක් පුපුරා ගියහොත් ගූගල් සමාගමට ප්‍රතිශක්තියක් ලැබේදැයි විමසූ විට පිච්චෛ මෙසේ පිළිතුරු දුන්නේය: "අපි ඇතුළුව කිසිම සමාගමකට ප්‍රතිශක්තියක් නොලැබෙනු ඇතැයි මම විශ්වාස කරනවා."