ගොබෙල්ස් න්‍යාය පාවිච්චි කරලා මාලිමාව බලයට ආවා.. බලයට ආවට පස්සේ වෙන ගුණමකුවෝ වගේ මාලිමා ආණ්ඩුව ගොබෙල්ස්ව අමතක කලේ නෑ.. - උදය ගම්මන්පිල

Oct 21, 2025 at 06:00 AM

|

Lanka Leader

පිවිතුරු හෙළ උරුමය මාධ්‍ය හමුවේ දී පක්ෂ නායක නීතිඥ උදය ගම්මන්පිල මහතා මෙම අදහස් පල කලේය.

"ලබන මාසයේ මාලිමා ආණ්ඩුවේ නායකයින් පරණ අල්මාරියක මුල්ලක තිබෙන රතු කමිස, රතු සාරි, රතු තොප්පි එළියට අරගෙන ඉල් විරු සමරුව කියලා ජවිපෙ නිර්මාතෘ රෝහණ විජේවීර මහතා සමරන්න නියමිතයි. රෝහණ විජේවිර මහතා ජවිපෙ නිර්මාතෘ වුණාට මාලිමාවේ නිර්මාතෘ නොවේ. මාලිමාව බලයට ආවේ විජේවීර කියා දුන්නු අධිරාජ්‍ය විරෝධී දේශප්‍රේමි ධනපති විරෝධී පාර දිගේ ගමන් කරලා නොවේ. අධිරාජ්‍ය විරෝධි අරගලය, අයිඑම්එෆ් විරෝධය, ඉන්දියානු විරෝධය, ඇමෙරිකානු විරෝධය, ධනපති විරෝධය වගේ විජේවීර සහෝදරයාගේ සටන් පාඨ පාවිච්චි කරලත් නොවේ. මාලිමාව බලයට ආවේ ඇමෙරිකානු විරෝධය වෙනුවට ජුලී චෑංග් නෝනාගේ සුවච කීකරු ගෝලයෙක් වෙලා. ඉන්දියානු විරෝධය වෙනුවට ඉන්දියාවට හීලෑ වුණු පූස් පැටියෙක් වෙලා. කෙටියෙන්ම කිව්වොත් මාලිමාවට බලයට එන්නවත් බලය පවත්වාගෙන යන්නවත් විජේවීර සහෝදරයා කරපු කෙංගෙඩියක් නෑ. මාලිමාව බලය ගත්තෙත් බලය පවත්වාගෙන යන්නෙත් විජේවීර සහෝදරයා කිව්ව දේවල් වලට විරුද්ධ දේවල් කරලා. ඒ නිසා බොරුවට රතු ඇඳගෙන ඉල් මහ විරු සමරුවක් කරලා විජේවීර ගුණ වයන මායාවක් කරලා රට රවටන්න අවශ්‍ය නෑ.

මාලිමා ආණ්ඩුවේ නිර්මාතෘ විජේවීර නොවේ නම් වෙන කවුද? ඒ තමයි ජර්මනියේ ඇඩොල්ෆ් හිට්ලර්ගේ ප්‍රචාරක ඇමති ජෝසෆ් ගොබෙල්ස්. “එකම බොරුව සිය වරක් පවසන විට අසන්නාට මෙන්ම කියන්නාට ද එය ඇත්තක් මෙන් දැනෙනු ඇත” කියා කිව්වේ ඔන්න ඔය ගොබෙල්ස් තමයි. පසුව මේ න්‍යාය ගොබෙල්ස්වාදය කියා මුළු ලෝකයේම ජනප්‍රිය වුණා. ඔය ගොබෙල්ස් න්‍යාය පාවිච්චි කරලා තමයි මාලිමාව බලයට ආවේ. රාජපක්ෂලා ඩොලර් බිලියන ගණනින් උගන්ඩාවේ හැංගුවා කියලා අවුරුදු දහයක් පුරාම කිව්වාම ජනතාව ඒක විශ්වාස කලා. චිචීගේ බල්ලාගේ කරේ පවුම් 90ක රන් මාලයක් තිබෙනවා කියලා අවුරුදු දහයක් පුරා කිව්වාම ජනතාව ඒක විශ්වාස කලා. බදු ඔක්කෝම අයින් කරලා වරායෙන් බාන මිලට තෙල් දෙන්නම් කියලා අවුරුදු ගණනාවක් කිව්වාම ජනතාව ඒකත් පුළුවන් කියලා විශ්වාස කලා.

බලයට පැමිණියාට පස්සේ වෙන ගුණමකුවෝ වගේ මාලිමා ආණ්ඩුව ගොබෙල්ස්ව අමතක කලේ නෑ. තමන්ට බොරුවක් කියන්න ඕනෑ වුණාම පාර්ලිමේන්තුවට ඇවිත් ඒක කියනවා කියලා ජනාධිපතිතුමා කිව්වේ පාර්ලිමේන්තුවට ඇවිල්ලා කතාවක් කරන ගමන්. අගමැතිතුමිය අමාත්‍යාංශයේ දී පාසල් වලට දේශපාලකයින් ගෙන්වා ගන්න එපා කියලා චක්‍රලේඛ යවලා පාර්ලිමේන්තුවට ඇවිත් මම එහෙම කලේ නෑ කියලා ටොම් පච අත් හරිනවා. කතානායකතුමා විශ්වාස භංග විවාදය මග හරින්න පාර්ලිමේන්තුවට පච කියලා නොමග අරිනවා. සභානායකතුමා ව්‍යවස්ථා සභාවට බොරු කියලා නොමග යවලා තමන්ගේ කෙනාව අල්ලස් කොමිසමේ අධ්‍යක්ෂ ජනරාල් කර ගන්නවා. ඇමතිවරු අවුරුදු උත්සවයේ බොරු කීමේ තරගයේ ඉන්නවා වගේ තරගයට බොරු කියනවා. කෙටියෙන්ම කිව්වොත් ගොබෙල්ස් නැති නම් මේ ආණ්ඩුවත් නෑ.

ඒ නිසා ඉල්විරු දිනය අමතක කරලා මාලිමාව ගොබෙල්ස් දිනය සැමරිය යුතුයි. ගොබෙල්ස් සැමරුම කළ යුතු ගොබෙල්ස්ගේ උපන් දිනය වෙන්නේ ඔක්තෝම්බර් 29. ඔන්න ජනාධිපතිතුමනි, දවස් නවයක් කල් ඇතිව ඔබතුමාට දැනුම් දුන්නා. දැන් ඉතාම සැලසුම් සහගතව ගොබෙල්ස් සැමරුමක් පවත්වන්න මාලිමාවට පුළුවන්. තමන්ට ආණ්ඩුවක් ලබා දුන් ජෝසෆ් ගොබෙල්ස්ට උපරිම ගෞරවයක් දක්වන්න ඕනෑ නම් ජර්මනියට ගිහින්ම මේ උපහාර උලෙල පවත්වන්න පුළුවන්. ඔබතුමා මේ රටේ කොටි සමරන්න ඉඩ දුන්නත් ගොබෙල්ස් මැරිලා වසර අසූවක් ගියත් තවමත් ජර්මනියේ නට්සින් සමරන්න දෙන්නේ නෑ කියන පාඩමත් ඔබතුමාට ඉගෙන ගන්න පුළුවන්."