සුදුසුකම් නැති සමාගමකට ගල්අඟුරු ටෙන්ඩරය දීමෙන් බරපතළ දූෂණයකට පාර කැපිලා - පුබුදු ජයගොඩ..

Sep 30, 2025 at 06:50 AM

|

Lanka Leader

මෙරට විදුලි ජනනය සඳහා අවශ්‍ය ගල්අඟුරු ආනයනය කිරීමේ ටෙන්ඩරය සුදුසුකම් නැති සමාගමකට දීමෙන් බරපතළ දූෂණයකට පාර කැපී ඇතැයි පෙරටුගාමී සමාජවාදී පක්‍ෂයේ අධ්‍යාපන ලේකම් පුබුදු ජයගොඩ මහතා පැවැසීය.

විදුලි ජනනයට අදාළ ගල්අඟුරු සැපැයීමේ ටෙන්ඩරය ඉකුත් 15දා විවෘත කළ බවත් අවම ලංසුව ඉදිරිපත් කර තිබූ දූෂණ රැසක් එල්ල වී තිබූ සමාගමට ටෙන්ඩරය හිමිවූ බවත් පොළොන්නරුව, බැඳිවැව ප්‍රජා හෝටල් ශාලාවේ 28 දා පැවැති සම්මන්ත්‍රණයකදී පුබුදු ජයගොඩ මහතා පැවැසීය. මෙහි ප්‍රශ්න ගණනාවක් උද්ගත වී ඇති බවත් එම ටෙන්ඩරය මේ සමාගමටම දීමේ අරමුණෙන් ප්‍රසම්පාදන මාර්ගෝපදේශ උල්ලංඝනය කළාදැයි සැකයක් මතුවන බවත් හෙතෙම කීය. එහිදී වැඩිදුරටත් ජයගොඩ මහතා මෙසේද කීය.

මේ මගේ අතේ තිබෙන 2021 දී ලංකා ගල්අඟුරු ලියාපදිංචි කිරීමේ ලේඛනයට අනුව ගල්අඟුරු සඳහා අවම සුදුසුකම් නිර්ණායක ලෙස GCV 5900 kCal/kg ප්‍රමිතිය සහිත ගල්අඟුරු අවම වශයෙන් මෙටි්‍රක් ටොන් 1,000,000 (මිලියනයක) වත් ගල්අඟුරු සංචිතයක් තිබෙන සමාගම් පමණයි ලියාපදිංචි කරන්නේ. නමුත් මේ තිබෙන 2025 ලියාපදිංචි ලේඛනයට අනුව අවම සුදුසුකම් නිර්ණායකය මෙටි්‍රක් ටොන් 100,000 ක සංචිත තිබිය යුතුයි ලෙස වෙනස් කරලා. ඒ කියන්නේ මේ සමාගමට ලියාපදිංචිය දීලා තියෙන්නේ සුදුසුකම් නිර්ණායකය මෙටි්‍රක් ටොන් මිලියන 1 සිට මෙටි්‍රක් ටොන් 100,000 දක්වා 90% කින් අඩු කරලා. මේක පැහැදිලිව සැක සහිතයි. අනෙක මේ සමාගමේ නම සමග දූෂණ චෝදනා බැඳී තිබෙනවා. මෙම සමාගම 2014 දී සතොසට සහල් මෙටි්‍රක් ටොන් 30,000 ක් සැපැයීමේදී රජයේ ප්‍රසම්පාදන මාර්ගෝපදේශ උල්ලංඝනය කර ඇති බව 2016/09/20 දින රාජ්‍ය ව්‍යවසාය කාරක සභාවට ඉදිරිපත් කරන ලද විගණකාධිපති වාර්තාවේ 168 පිටුවේ සඳහන් වෙනවා.

පෙනෙන ආකාරයට ප්‍රසම්පාදන මාර්ගෝපදේශ පවා වෙනස් කරමින් මේ ආණ්ඩුව යටතේ ගල්අඟුරු ටෙන්ඩරය ලබාදුන් සමාගමට, එහි හිමිකරුවන්ට සහ දේශීය නියෝජිතයාට පවා දූෂණ චෝදනා තිබෙනවා. ලංකාවේ වංචා හා දූෂණ සිදු කරන්නේ දේශපාලනඥයන්, ඉහළ පෙළ රාජ්‍ය නිලධාරීන්, ජාවාරම්කාර ව්‍යාපාරික වළල්ලක් යන තුන් කට්ටුව එකතු වුණු ජාලයකින්. දූෂණ විරෝධයේ නමින් අවධානය යොමු කළේ දේශපාලනඥයන්ට පමණයි. දැන් දේශපාලනඥයන් නැතිව ජාලය ක්‍රියාත්මක වෙනවා.

ලංකා විදුලිබල මණ්ඩලය මස් කර විකුණන පනතට එරෙහිව සේවකයන් අරගල කරන විට විදුලිබල සැපැයුම් අත්‍යවශ්‍ය සේවාවක් ලෙස නම් කර ජනාධිපතිවරයා ගැසට් නිවේදනයක් නිකුත් කළා. නමුත් වෙනදා මාර්තු මාසයේදී කැඳවන ගල්අඟුරු ආනයන ටෙන්ඩරය ජූලි මාසය දක්වා ප්‍රමාද වෙනකොට විදුලිය අත්‍යවශ්‍ය සේවාවක් කියලා මතක් වුණේ නෑ. ප්‍රසම්පාදන මාර්ගෝපදේශවල සමාගමක් සතු අවම ගල්අඟුරු ආරක්ෂණ සංචිත ප්‍රමාණය 90% කින් පහත දමනවිට විදුලිය අත්‍යවශ්‍ය සේවාවක් බව මතක් වුණේ නෑ. සාමාන්‍ය ජනතාව සහ සුළු නිෂ්පාදකයන් ජාතික විදුලිබල සැපැයුමට දායකවූ වහල මත සූර්ය පැනල අධෛර්යවත් කරන තීරණ ගන්නා විටත් ඒ අත්‍යවශ්‍ය බව මතක් වුණේ නෑ. ජනතාවට දරා ගන්න බැරි ලෙස දිගින් දිගටම විදුලි ගාස්තු අසීමාන්තිකව ඉහළ නංවන විටත් එය ජන ජීවිත පවත්වාගෙන යෑමේදී අත්‍යවශ්‍ය සේවාවක් බව අමතක වෙනවා. මේ ආණ්ඩුව පෙනී සිටින්නේ කවුරු වෙනුවෙන් ද කියලා සිතා ගන්න මේ ටෙන්ඩර් හුටපටය පමණක් වුණත් ප්‍රමාණවත්.

- දිවයින