“එයා කැමැත්තෙන් ඉල්ලුවා. මම කැමැත්තෙන් දුන්නා” යන 'පාන් තියරියෙන්' අල්ලස් දැල මඟහැර යන්න බෑ”- කොමිසමේ සභාපති කරයි

Sep 28, 2025 at 07:33 AM

|

Lanka Leader

“එයා කැමැත්තෙන් ඉල්ලුවා. මම කැමැත්තෙන් දුන්නා”  යන “පාන් න්‍යාය” (BREAD THEORY) අල්ලසක් හෝ දූෂණයක් නොවේ යැයි කිසිවෙකුට කිව නොහැකි බව අල්ලස් හෝ දූෂණ චෝදනා විමර්ශන කොමිෂන් සභාවේ සභාපති නීල් ඉද්දවල පවසයි.

2024 වසරේ අල්ලස් හෝ දූෂණ චෝදනා විමර්ශන කොමිෂන් සභාව විසින් ජාතික දූෂණ විරෝධී ක්‍රියාකාරී සැලැස්මක් සඳහා පැවැත් වූ සමීක්ෂණයක් මගින් මහජන මතය අනුව අල්ලසට හෝ දූෂණයට වඩාත් නැඹුරු ආයතන 10ක් තෝරා ගෙන ඇති බව ද සභාපතිවරයා කීය.

එම තෝරා ගත් ආයතන අතර පළමුව පොලිසියත්, දෙවනුව දේශපාලනයත්, තුන්වනුව රේගුවත් පවතිද්දී ආගමන හා විගමන දෙපාර්තමේන්තුව, පාසල්, අමාත්‍යාංශ, ඉඩම් ලියාපදිංචි කිරීමේ කාර්යාලය, පළාත් සභා, විදේශ රැකියා කාර්යාංශය, ප්‍රාදේශීය ලේකම් කාර්යාලය, රෙජිස්ට්‍රාර් ජනරාල් කාර්යාලය පිළිවෙළින් පවතින බව ඉද්දවල මහතා පැවැසීය.

ඒ අනුව කොමිෂන් සභාවට ලැබෙන පැමිණිලි  හා ඉන් සිදු කරන ලද පරීක්ෂණ අනුව ආර්ථිකයට ප්‍රධාන  වශයෙන් බලපා ඇති ආයතන පහක් හඳුනාගෙන ඇති බවත් රේගුව, දේශීය ආදායම්  දෙපාර්තමේන්තුව, පළාත් ආදායම් දෙපාර්තමේන්තුව, සුරා බදු දෙපාර්තමේන්තුව, ආගමන විගමන දෙපාර්තමේන්තුව හා මෝටර් රථ ලියාපදිංචි කිරීමේ කාර්යාලය ඒවා බව සභාපතිවරයා පෙන්වා දුන්නේය.

නීතිය හා සාමය නිසි පරිදි රටේ ක්‍රියාත්මක නොවීම, “දූෂිත සංස්කෘතිය” රට තුළ ජනිත වීම මෙන් ම, අල්ලස හා දූෂණය පිළිබඳ මහජනතාව පියවර නොගැනීම දූෂණ වැඩි වීමට බලපා ඇති කරුණු ලෙස හඳුනාගෙන ඇති බවද ඔහු කීය.

ඔහු මේ බව පැවසුවේ, ශ්‍රී ලංකා පරිපාලන වෘත්තිකයන්ගේ ආයතනය හා ශ්‍රී ලංකා පරිපාලන සේවා සංගමය සංවිධානය කළ දේශනයක් අමතමිනි.

ජාතික සංවර්ධනය සඳහා අවංකභාවය, විනය, විනිවිදභාවය හා සුපිළිපන් පාලනය යන මාතෘකාව ඔස්සේ මෙම දේශනය සංවිධානය කර තිබිණි.