‘ජනපති-මැති- ඇමති වරප්‍රසාද පිළිබඳ ‘චිත්‍රසිරි කමිටුවේ’ නිර්දේශ දෙන්න බෑ’- ජනපති කාර්යාලය

Sep 28, 2025 at 06:36 AM

|

Lanka Leader

පාර්ලිමේන්තු මන්ත්‍රිවරුන්ගේ, අමාත්‍යවරුන්ගේ හා හිටපු ජනාධිපතිවරුන්ගේ හිමිකම්, දීමනා සහ වරප්‍රසාද නැවත සලකා බැලීමට පත්කළ “චිත්‍රසිරි කමිටුවේ“ නිර්දේශ ලබා දීම ජනාධිපති කාර්යාලය ප්‍රතික්ෂේප කර තිබේ.

මෙම කමිටුවේ නිර්දේශ අනුව ඒ සම්බන්ධයෙන් ඉදිරි ක්‍රියාමාර්ග ගැනීමේ කටයුතු අවසන් නැති බවත් ඒ අනුව කමිටු නිර්දේශ ලබාදීමෙන් අගතියක් සිදුවිය හැකි බවත් ජනාධිපති කාර්යාලය දන්වා ඇත.

හිටපු පාර්ලිමේන්තු මන්ත්‍රිවරුන්ගේ විශ්‍රාම වැටුපට අදාළ “චිත්‍රසිරි වාර්තාවේ“ නිර්දේශ ඉල්ලා හිටපු පාර්ලිමේන්තු මන්ත්‍රි ප්‍රේමසිරි මානගේ කළ ඉල්ලීමක් ප්‍රතික්ෂේප කරමින් මෙම දැනුම් දීම සිදුකර තිබේ.

ප්‍රේමසිරි මානගේ පසුගිය අගෝස්තු 08 වන දා ජනාධිපති කාර්යාලයෙන් කළ ඉල්ලීමට ප්‍රතිචාර දක්වමින් ජනාධිපති කාර්යාලයේ ජ්‍යෙෂ්ඨ අතිරේක ලේකම් කේ. ප්‍රසන්න චන්ද්‍රජිත් මේ බව සඳහන් කර ඇත.

ජනාධිපති කාර්යාලයේ තීරණය පිළිබඳව සෑහීමකට පත් නොවන්නේ නම් තොරතුරු දැනගැනීමේ අයිතිවාසිකම් පිළිබඳ පනතේ 31 වගන්තිය යටතේ දින 14ක් ඇතුළත අභියාචනයක් ඉදිරිපත් කරන ලෙස ද ජ්‍යෙෂ්ඨ අතිරේක ලේකම්වරයා වැඩිදුරටත් දැනුම් දී තිබේ.

මේ සම්බන්ධයෙන් අදහස් දැක්වූ හිටපු පාර්ලිමේන්තු මන්ත්‍රි ප්‍රේමසිරි මානගේ මහතා සඳහන් කළේ චිත්‍රසිරි වාර්තාවේ නිර්දේශ ඉල්ලා ජනාධිපති කාර්යාලය වෙත අවස්ථා 03කදී ලිපි යොමුකළ බවයි.

හිටපු මන්ත්‍රිවරුන්ගේ විශ්‍රාම වැටුප් අහෝසි නොකරන ලෙසට “චිත්‍රසිරි කමිටුව“ නිර්දේශ කර ඇතැයි තමන්ට නිලනොලත් ආකාරයට දැනගැනීමට ලැබුණු බව ද ඔහු කීවේය.

- මව්බිම