අයිස් මත්ද්‍රව්‍ය නිෂ්පාදනයට සැක සම්පත් මනම්පේරි වෙනුවට ඔහුගේ බාල සොහොයුරු පියල් සේනාධීර මිද්දෙනිය පොලිසියේ රඳවාගෙන ඉන්නවා - වැඩිමහල් සොහොයුරිය මානව හිමිකම් කොමිසමේදී කියයි

Sep 9, 2025 at 04:46 AM

|

Lanka Leader

රසායනික ද්‍රව්‍ය කිලෝග්‍රෑම් 50,000ක පමණ ප්‍රමාණයක් මිද්දෙණිය, තලාව, කාරියමඩිත්ත ප්‍රදේශයේ ඉඩමක  වළදැමීමේ සිද්ධිය සම්බන්ධයෙන් හිටපු ප්‍රාදේශීය සභා මන්ත්‍රී පියල් සේනාධීර මහතා අත්අඩංගුවට ගෙන තොබේ.

පොදුජන පෙරමුණේ හිටපු ප්‍රාදේශීය සභා මන්ත්‍රීවරය්කු වන  පියල් සේනාධීර මහතා අත්අඩංගුවට ගැනීම සම්බන්ධයෙන් ඔහුගේ සහෝදරිය ඊයේ(08) මානව හිමිකම් කොමිසමට පැමිණිල්ලක් ඉදිරිපත් කරනු ලැබුවාය. 

පැමිණිල්ල ඉදිරිපත් කිරීමෙන් පසුව මාධ්‍ය වෙත අදහස් දක්වමින්, තම සහෝදරයා අත්අඩංගුවට ගැනීමේදී පොලිසිය සහ විශේෂ කාර්ය බළකාය (STF) අත්තනෝමතික ලෙස කටයුතු කළ බවත්, එය දේශපාලන පළිගැනීමක් බවත් ඇය කියා සිටියාය.

එහිදී ඇය වැඩිදුරටත් කියා සිටියේ තම සහෝදරයාව අත්අඩංගුවට ගැනීමේදී එම නිලධාරීන් තම පවුලේ සාමාජිකයින්ට, අසභ්‍ය වචනවලින් බැණ වදිමින් දැඩි අපහසුතාවයට පත් කළ බවයි.

පොලිසියේ හැසිරීම හේතුවෙන් තම දරුවන්ගේ මානසිකත්වයට බරපතළ හානි සිදුවී ඇති බවත් පෙන්වාදුන් ඇය  , මානසිකව වැටී සිටින තම දරුවන් පාසල් යාම පවා ප්‍රතික්ෂේප කර ඇති බවද පැවසුවාය.

ඇයට අනුව කරනු ලැබූ වැරැද්ද කුමක්දැයි නොදන්වා කිසිඳු හේතුවක් නොමැතිව තම සහෝදරයා වන හිටපු ප්‍රාදේශීය සභා මන්ත්‍රී පියල් සේනාධීරව ඇඹිලිපිටිය පොලිසියෙන් රැගෙන ගොස් මේ වන විට මිද්දෙණිය පොලිසියේ රඳවාගෙන් සිටියි.

ඇය වැඩිදුරටත් කියා සිටියේ, තම සහෝදරයින් දෙදෙනා පොදුජන පෙරමුනේ මන්ත්‍රීවරුන් වීම හේතුවෙන් මෙලෙස අත්අඩංගුවට ගෙන ඇති බවත් මෙය දේශපාලන පළිගැනීමක් වන බවයි..

“මම මානව හිමිකම් කොමිසමට ආවේ පොලිසියට හරියට නීතිය ක්‍රියාත්මක කරන ලෙස නිර්දේශ කරන ලෙස ඉල්ලිමක් කරන්නයි. අපිට සහනයක් ලබාදෙන්න . සාධාරණ සහනයක්. හේතුවක් කියන්නෙ නැතුව මල්ලිලව අරගෙන ගිහින්  ගහනවා. පොලිස් නිලධාරීන් හරියට අසභ්‍ය වචනවලින් කතාකරනව මගෙ නංගිට, නෑනට, හොඳටම බැනල අපහස කරනවා. ගොඩාක් සෙනඟ මැද්දෙන් STF එකෙන් ඇවිල්ලා, පොලීසිය ඇවිල්ලා ගේ ඉස්සරහ නතර කරනකොට අපි කොහොමද සමාජෙට මුහුණ දෙන්නේ. අපේ දරුවෝ හොඳ පාසල්වලට යන්නෙ. අද මානසිකව වැටිලා බයේ කෑගහනවා. ඉස්කෝලෙ ගියෙ නැහැ. තාත්තව අරගෙන ගියෙ ඇයි කියලා අඬනවා. අපිට සාධාරණයක් ඉෂ්ඨ කරලා දෙන්න. නීතිය හරියට ක්‍රියාත්මක කරන්න. ඇඹිලිපිටිය පොලීසියෙන් අරගෙන ගිහින්. දැන් මිද්දෙණිය පොලිසියෙ රඳවාගෙන ඉන්නවා. අත්අඩංගුවට ගන්න හේතුවක් කියන්න ඕනෙ.වැරදිකාරයා කවුද, මේකෙ නීතියක් තියෙන්න එපැයි. ගෙදරට ආවා ඇවිල්ලා මල්ලිව අත්අඩංගුවට ගත්තා. අයියා බාර දෙන්න කියනවා. අවශ්‍ය කෙනා නැතුව, අවශ්‍ය කෙනාගේ නෑදෑ කට්ටිය අල්ලලා මොකක්ද මේ කරන්නේ? මගේ අයියා සම්පත් මනම්පේරි. මගෙ මල්ලි පියල් සේනාධීර. පසුගිය බදාදා අත් අඩංගුවට අරගෙන තියෙන්නෙ. කිසිම හේතුවක් නැතුව පොලිසියට අරන් ගිහින් ගහනවා. ඒක නිසයි පැමිණිල්ල දාන්න ආවෙ. මේක දේශපාලන පළිගැනීමක්. එයාලා පොහොට්ටුවෙ මන්ත්‍රීවරුන්. ඒකයි මේ පළිගන්නෙ”