කෝට්ටේ නගර සභාව පළමු බිලෙන්ම රුපියල් ලක්ෂ 100ක වංචාවක් කරලා- හිටපු නගරාධිපති ජනක රණවක

Aug 23, 2025 at 08:00 AM

|

Lanka Leader

 කෝට්ටේ මහනගර සභාවේ හිටපු නගරාධිපති ජනක රණවක මහතා කොළඹදී පැවැති මාධ්‍ය හමුවක් අමතමින් , කෝට්ටේ මහනගර සභාවේ කසල කළමනාකරණය සඳහා වූ පළමු බිල්පතින් රුපියල් ලක්ෂ සියයක වංචාවක් සිදුවී ඇති බව අනාවරණය කළේය.

ඒ අනුව ඔහු පෙන්වා දෙන්නේ, 2025 මැයි මාසය සඳහා කසල කළමනාකරණයට අදාළව රුපියල් ලක්ෂ 249ක බිල්පතක් කෝට්ටේ මහනගර සභාව විසින් ගෙවා ඇති බවයි. මෙම මුදල කෝට්ටේ නගර සභාව සතු වර්ග කිලෝ මීටර දහයක කුණු ඇදීම, පාරවල් අතුගෑම, බ්‍රෂ් කිරීම සහ වල් පැලෑටි ඉවත් කිරීම සඳහා ගෙවා ඇත. මෙම මුදල ගෙවීම සඳහා මාලිමා මන්ත්‍රීවරුන් 21 දෙනෙකු සිය අනුමැතිය ලබා දී ඇතැයි ඔහු අවධාරණය කරයි.

ඔහු පෙන්වා දෙන පරිදි, බිල්පතේ සඳහන් වන්නේ මැයි මාසයේ පළමුවන දින සිට 31 වන දින දක්වා පාරවල් 526ක් දිනපතා අතුගා ඇති බවත්, මාසයට දින 16ක් පාරවල් බ්‍රෂ් කර කුණු ඇද ඇත. කෙසේ වෙතත්, නගර සභාවේ උපනගරාධිපතිවරිය ඇතුළු මන්ත්‍රීවරුන් 19 දෙනෙකු ගමන් කරන පාරවල් දින 31ක් අතුගා තිබේද යන්න රණවක මහතා මාධ්‍ය හමුවේදී ප්‍රශ්න කළේය. ජනක රණවක මහතා පවසන්නේ  අදාළ මන්ත්‍රීවරුන් ඔවුන්ගේ මාර්ග එලෙස බ්‍රෂ් කර හෝ අතුගා නොමැති බව පවසන බවයි.

මාධ්‍ය හමුවේදී තවදුරටත් අදහස් දක්වමින් රණවක මහතා පැවසූවේ, කෝට්ටේ නගර සභාවේ කොන්ත්‍රාත්කරුගේ ලේඛනවලට අනුව සතියට දින තුනක් පමණක් කුණු ඇද ඇති බවත්, ඒ අනුව මාසයකට දින 12ක් පමණක් කුණු අදින බවත්ය. එහෙත් අදාළ බිල්පතේ දින 16ක් කුණු ඇද ඇති බව සඳහන් වීමෙන්, මැයි මාසයේදී නොකරන ලද වැඩ වෙනුවෙන් රුපියල් ලක්ෂ 100ක මුදලක් ගෙවා ඇති බව පැහැදිලි වන බව ඔහු අවධාරණය කළේය.

“වංචාව සහ දූෂණය නතර කරනවා” යැයි පවසමින් පැමිණි මන්ත්‍රීවරුන්, පළමු කසල බිලෙන්ම රුපියල් ලක්ෂ 100ක් වැඩියෙන් ගෙවීමට කටයුතු කිරීම ලැජ්ජාවට කරුණක් බව ඔහු පැවසීය.

එහිදී වැඩිදුරටත් අදහස් දක්වමින් මෙම වංචාව සම්බන්ධයෙන් අල්ලස් හෝ දූෂණ විමර්ශන කොමිෂන් සභාවට පැමිණිල්ලක් කර ඇති බවත්, මේ සම්බන්ධයෙන් ජනාධිපතිවරයාට ලිපියක් යොමු කර ඇති බවත් රණවක මහතා පැවසීය. ජනාධිපතිවරයාට ඉදිරිපත් කර ඇති ලිපියේ, මාලිමා රජය යටතේ කෝට්ටේ නගර සභාවේ කසල කළමනාකරණයෙන් අවම වශයෙන් රුපියල් කෝටියක වංචාවක් සිදුවන බව පෙන්වා දී ඇත.