‘සීහෙළ ගෝතම සිරි සම්බුද්ධ නිකාය’ ශාසන විරෝධී භික්‍ෂු සංවිධානයක් - ත්‍රෛනිකායික මහ නාහිමිවරුන්ගෙන් දැනුම් දීමක්..

Aug 21, 2025 at 08:24 AM

|

Lanka Leader

‘සීහෙළ ගෝතම සිරි සම්බුද්ධ නිකාය’ ශාසන විරෝධි භික්ෂු සංවිධානයක් බවට ත්‍රෛනිකායික මහනායක ස්ථවිරයන් වහන්සේලා එක්ව තීරණය කර කොට ඇත.

ත්‍රෛනිකායික අතිගෞරවාර්භ මහනායක මාහිමිපාණන් වහන්සේලා සිව් නමගේ උපදෙස් අනුශාසනා පරිදි අදාළ ත්‍රෛනිකායික ලේඛකාධිකාරී නායක ස්වාමින්ද්‍රයන් වහන්සේලා 19 වැනි දින මල්වතු මහා විහාරයට රැස්ව මේ සම්බන්ධයෙන් සාකච්ඡා කොට එම තීරණය පිළිබඳව දැනුම් දීමක් සිදු කළහ.

මෑතකදී ආරම්භ කරන ලදැයි කියන ‘සීහෙළ ගෝතම සිරි සම්බුද්ධ නිකාය’ට අයත් භික්ෂු කණ්ඩායම මගින් සිදු කරන ධර්ම විනය විකෘතිය හා ශාසන පරිහානිය පිළිබඳව දීර්ඝ ලෙස සාකච්ඡා කොට එකී අප්‍රතිකාරී කටයුත්ත වැළැක්වීම් සම්බන්ධයෙන් ගත යුතු ශාසනික හා නෛතික පියවර පිළිබඳවත් ඒ සම්බන්ධයෙන් බෞද්ධ ජන සමාජය දැනුවත් කළ යුතු ආකාරය පිළිබඳවත් සාකච්ඡා කළහ.

එසේම එම පිරිස විසින් මහනායක ධුරය ආදි තනතුරු පිහිටුවමින් සිදු කරන ලදැයි පවසන උපසම්පදා විනය කර්මය එම විහාරස්ථානයේ විහාරාධිපති හිමියන් වංචනික ලෙස රවටා සිදුකරන ලද බවට එකී විහාරාධිපති හිමි විසින් ලිඛිතව දන්වා ඇත. ඒ අනුව එම උපසම්පදා කර්මය සිදුකර ඇති අන්දම ධර්ම – විනය විරෝධී බවත් ශාසනික සම්ප්‍රදාය අනුව එවැනි කටයුත්තක් සිදු කිරීමට නොහැකි බවත් ත්‍රෛනිකායික මහා සංඝරත්නය මහජනතාව වෙත දැනුම් දුන්හ.

මල්වතු මහා විහාර පාර්ශ්වයේ මහා ලේඛකාධිකාරි පහමුණේ ශ්‍රී සුමංගල නායක ස්ථවිර, අස්ගිරි මහා විහාර පාර්ශ්වයේ මහා ලේඛකාධිකාරී මැදගම ශ්‍රී ධම්මානන්ද නායක ස්ථවිර, ශ්‍රී ලංකා අමරපුර මහා නිකායේ මහා ලේඛකාධිකාරී බලපිටියේ සිරි සීවලී නායක ස්ථවිර සහ ශ්‍රී ලංකා රාමඤ්ඤ මහා නිකායේ මහා ලේඛකාධිකාරි අත්තංගනේ ශ්‍රී සාසනරතන නායක ස්ථවිර යන ස්වාමීන් වහන්සේලා එක්ව මේ සම්බන්ධයෙන් මාධ්‍ය නිවේදනයක් ද නිකුත් කළහ.

ඒ අනුව මෙවැනි ළාමක මතවාදයන් ප්‍රවර්ධනය කරන කණ්ඩායම් මගින් ඉදිරිපත් කරන ධර්ම – විනය විරෝධී අදහස් පිළිගැනීමෙන් වළකින ලෙසත් එම මතවාදයන් ප්‍රවර්ධනය කිරීම ශාසනික පරිහානියට මෙන්ම මෙරට ස්වෛරීත්වයට හානිකර බව සිහිපත් කරන බවත් එම මාධ්‍ය නිවේදනයෙන් අවධාරණය කර ඇත.