යෞවන සමාජ ගැන ඇමරිකා බුද්ධි අංශ තොරතුරු හොයලා..

Aug 2, 2025 at 09:42 AM

|

Lanka Leader

යෞවන සමාජවල වත්මන් ක්‍රියාකාරිත්වය පිළිබඳව ඇමෙරිකානු තානාපති කාර්යාලය සූක්ෂ්මව කරුණු සොයා බලා ඇතැයි දේශපාලන ආරංචි මාර්ග පවසයි.

විපක්ෂයේ තරුණයන් වෙනුවට යෞවන සමාජවල නිලතල වලට ජාතික ජන බලවේගයට හිතවත් පිරිස් යෞවන සමාජවලට පත්කර තිබෙන බවට සමාජයේ විරෝධයක් නිර්මාණය වීම පිළිබඳව මෙම තානාපති කාර්යාලය මෙසේ සිය විශේෂ අවධානය යොමු කර ඇතැයි එම ආරංචිමාර්ග සඳහන් කළේය.

ශ්‍රී ලංකාවේ දැනට පවතින හා ඉදිරියේදී නිර්මාණය විය හැකි දේශපාලන ගැටලු සම්බන්ධයෙන් ඇමරිකානු බුද්ධි අංශ එරට තානාපති කාර්යාලය සතිපතා දැනුම්වත් කරන බවත්, ඒ අනුව ගෙවුණු සතියේදී යෞවන සමාජ ආශ්‍රිතඅර්බුදය තානාපති කාර්යාලයේ විශේෂ අවධානයට ලක්ව තිබෙන බවත් දේශපාලන ආරංචිමාර්ග පවසයි.

යෞවන සමාජ පිහිටුවීම, සාමාජික ලැයිස්තු සකස් කිරීම, තනතුරු වලට පත්කිරීම, තරුණ කටයුතු අමාත්‍යාංශය හා ජාතික තරුණ සේවා සභාවේ හැසිරීම ඇතුළු කරුණු කිහිපයක් ඇමරිකානු තානාපති කාර්යාලයේ නිරීක්ෂණයට ලක්ව ඇතැයි දැනගන්නට ලැබේ.

මේ අතර යෞවන සමාජ වලට දේශපාලනය ඈදාගෙන ඇතැයි තරුණ නියෝජිතයන් පිරිසක් හිටපු ජනාධිපති රනිල් වික්‍රමසිංහ මහතා පසුගිය සතියේ හමුවී පැමිණිලි කර තිබේ.

ජාතික ජන බලවේගයට හිතවත් පුද්ගලයන්ගේ නම් ලැයිස්තු කලින් සකස් කර යෞවන සමාජ වලට පත්කිරීමේ කුමන්ත්‍රණයක් පවතින බවට එම තරුණ පිරිස හිටපු ජනාධිපතිවරයාට පෙන්වා දී ඇත.

1977 ආණ්ඩුවේ තරුණ කටයුතු ඇමැතිවරයා වශයෙන් තරුණ සම්මේලන පවත්වන්නටත්, ගම් මට්ටමින් යෞවන සමාජ ගොඩනැංවීමටත් දේශපාලනයක් නොබලා පියවර ගත් බව රනිල් වික්‍රමසිංහ මහතා මෙහිදී පැහැදිලි කර තිබේ.

- අමිත් මධුරංග ගමගේ