දරුවෝ හදන්න උනන්දු කරන්න චීනයෙන් මව්පියන්ට සල්ලි දෙයි..

Jul 30, 2025 at 07:31 AM

|

Lanka Leader

චීනයේ උපත් අනුපාතය ඉහළ නැංවීම අරමුණු කරගත් රජයේ පළමු ජාතික සහනාධාර වැඩසටහන යටතේ වයස අවුරුදු තුනට අඩු සෑම දරුවකු වෙනුවෙන් මව්පියන්ට වසරකට යුවාන් 3,600ක් පිරිනැමීමට තීරණය කර තිබේ.

දශකයකට පමණ පෙර චීනයේ පාලක කොමියුනිස්ට් පක්ෂය විසින් මතභේදාත්මක එක්-දරු ප්‍රතිපත්තිය අහෝසි කිරීමෙන් පසුව පවා රටේ උපත් අනුපාතය පහත වැටෙමින් තිබේ.

චීන රාජ්‍ය මාධ්‍යවලට අනුව, දරුවන් ඇති දැඩි කිරීමේ හැකියාව ඇති පවුල් මිලියන 20ක් පමණ සඳහා මෙම උපකාරය ලැබෙනු ඇත.

ලෝකයේ දෙවැනි විශාලතම ආර්ථිකය සහිත චීනය ජනගහනය පිළිබඳ අර්බුදයකට මුහුණ දෙන බැවින්, දරුවන් වැඩි ගණනක් ලැබීමට ජනතාව දිරිමත් කිරීම වෙනුවෙන් චීනයේ පළාත් කිහිපයක යම් ආකාරයක ගෙවීම් කරන නියමු ව්‍යාපෘති ක්‍රියාත්මක කර ඇත.

ඊයේ ප්‍රකාශයට පත් කරන ලද මෙම යෝජනා ක්‍රමය මගින් මව්පියන්ට එක් දරුවකු සඳහා යුවාන් 10,800 දක්වා මුළු මුදලක් ලබා දෙනු ඇත.

2022 සහ 2024 අතර උපත ලැබූ දරුවන් සිටින පවුල්වලට අර්ධ සහනාධාර සඳහාද ඉල්ලුම් කළ හැකිය.

බිලියන 1.4ක ජනගහනයක් සිටින චීනයේ උපත් අනුපාතය ඉහළ නැංවීමට පළාත් පාලන ආයතන ගත් උත්සාහයන් අනුව යමින් මෙම පියවර ගෙන තිබේ.

මාර්තු මාසයේදී, චීනයේ උතුරු කලාපයේ හොහොට් නගර බලධාරීන්, අවම වශයෙන් දරුවන් තිදෙනෙකු සිටින ජෝඩු සඳහා එක් දරුවකුට යුවාන් 100,000ක් දක්වා පිරිනැමීම ආරම්භ කළේය.

චීනය පදනම් කරගත් යුවා ජනගහන පර්යේෂණ ආයතනය විසින් කරන ලද අධ්‍යයනයකට අනුව, වයස අවුරුදු 17 දක්වා දරුවකු ඇති දැඩි කිරීමට සාමාන්‍යයෙන් ඩොලර් 75,700ක් වැය වේ.

සාපේක්ෂ වශයෙන්, දරුවන් නඩත්තු කිරීමට ලෝකයේ වඩාත්ම ඉහළ වැය බරක් දරන රටවල් අතර චීනය ද සිටින බව අධ්‍යයනයෙන් හෙළි විය.

ජනවාරි මාසයේදී, නිල සංඛ්‍යාලේඛන පෙන්වා දුන්නේ 2024 දී අඛණ්ඩව තුන්වැනි වසරටත් චීනයේ ජනගහනය පහත වැටී ඇති බවයි.

රටේ දැනට සිටින ජනගහනය ද වේගයෙන් වයස්ගත වෙමින් සිටී.