ඡන්දය භාවිතය අනිවාර්ය වෙයි.. නොදැම්මොත් දඩයක්? - අලුතෙන් එන නිතී ගැන මැතිවරණ කොමසාරිස් කියන කතාව..

Jul 21, 2025 at 08:23 AM

|

Lanka Leader

ඉදිරියට තවත් අවුරුදු තුන හතරක් යනකල්ම රටේ ඡන්දයක් නොපැවැත්වෙන බව මැතිවරණ කොමසාරිස් ජනරාල් සමන් ශ්‍රී රත්නායක පැවසීය.

මැතිවරණයකදී රටේ ලියාපදිංචි ජන්දදායකයන්ට ජන්දය භාවිත කිරීම අනිවාර්ය කරමින් ඡන්දය භාවිත නොකරන්නන්ට එරෙහිව දඩයක් නියම කිරීමට ඉදිරියට සැලසුම් කර ඇති බවද හෙතෙම කුරුණෑගලදී ප්‍රකාශ කළේය.

මැතිවරණ කොමිෂන් සභාවේ 2026 – 2029 කාලය සඳහා උපාය මාර්ගික සැලැස්ම සකස් කිරීම සම්බන්ධයෙන් අදහස් විමසීමට කුරුණෑගල දිස්ත්‍රික්කයේ පාර්ශ්ව කණ්ඩායම් සමග දිස්ත්‍රික් මැතිවරණ කාර්යාලයේදී පැැති සාකච්ඡාවකදී ඔහු මේ බව ප්‍රකාශ කළේය.

මෙරට සෑම මැතිවරණයක් සඳහාම ඉතා විශාල මුදලක් වැයවීම සැලකිල්ලට ගෙන මැතිවරණයක උපරිම ප්‍රතිඵලයක් ලබා ගැනීමේ අරමුණින් මෙවැනි තීරණයක් ක්‍රියාත්මක කිරීමට බලාපොරොත්තු වන බවද මැතිවරණ කොමසාරිස් ජනරාල්වරයා පැවසීය. ඉදිරියේදී මැතිවරණ සඳහා තැම්පත් කරන ඇප මුදල් ඉහළ දැමීමටද බලාපොරොත්තු වන බවද මැතිවරණ කොමසාරිස්වරයා වැඩිදුරටත් පැවසීය.

මෙහිදී ඔහු වැඩිදුරටත් මෙසේද කීය.

"අපේ දෙපාර්තමේන්තුවේ දැක්ම, සිහිනය තමයි මේ රටේ සර්වජන ජන්ද බලය සුරැකීම. ඒ සිහිනය යථාර්ථයක් බවට පත්කර ගැනීමට නම් මේ තියෙන කාලය ප්‍රයෝජනයට අරගෙන ඒ සඳහා අවශ්‍ය උපාය මාර්ගික සැලැස්මක් සකස් කළ යුතුයි. අප මේ විදිහට ඔබ හමුවෙලා කරන්නේ ඊට අවශ්‍ය අදහස් ලබා ගැනීමයි. ‍‍

අපිට මේ රටේ ඉදිරි මැතිවරණ සඳහා නව නීති රීති සකස් කිරීම අවශ්‍යයි. මේ සඳහා මැතිවරණ කොමිසම විදිහට අපි වැඩි බරක් දරනවා. ඒ අනුව මැතිවරණ නීති සකස් කිරීමට සහ වෙනස් කිරීමට තියෙන හොඳම කාලය තමයි මේක. මේ ආණ්ඩුවට තුනෙන් දෙකක පැහැදිලි බලයක් තියෙනවා. ඒ නිසා මේ නීති සම්මත කර ගැනීම පහසුයි. මැතිවරණයක් යනු සම්පූර්ණයෙන්ම නීතිමය ක්‍රියාවලියක්. මේ නිසා අනිවාර්යයෙන්ම මැතිවරණ සඳහා නීතිමය ප්‍රතිසංස්කරණ ගෙන ආ යුතුයි. නීතියක් නැතිව මැතිවරණයක් පවත්වන්න බැහැ. අපි මේවනවිට රජයට යෝජනා 42 ක් භාර දීලා තියෙනවා. ඒ සියල්ලම නීතිමය කරුණු."