දුම්රිය මහ පුටුවට දුෂණ චෝදනා රැසක් එල්ල වූ අයෙක් පත් කරන්න හදනවා - ශ්‍රී ලංකා නිදහස් දුම්රිය සේවක පෙරමුණෙන් චෝදනා..

Jul 16, 2025 at 01:00 PM

|

Lanka Leader

දුම්රිය දෙපාර්තමේන්තුවේ සාමාන්‍යාධිකාරී තනතුරට දූෂණ හා අක්‍රමිකතා චෝදනා එල්ල වී ඇති ඉහළ නිලධාරියෙකු පත්කිරීමට කණ්ඩායමක් උත්සාහ කරන බව ශ්‍රී ලංකා නිදහස් දුම්රිය සේවක පෙරමුණ චෝදනා කරයි.

එම පෙරමුණේ ප්‍රධාන ලේකම් ජනිත් ලංකාගේ මහතා ප්‍රකාශ කළේ, මෙම කණ්ඩායමට දුම්රිය දෙපාර්තමේන්තුවේ ඉහළම නිලධාරීන් සහ දුම්රිය වෘත්තීය සමිති කිහිපයක් සම්බන්ධ වී සිටින බවයි.

ඔහු වැඩිදුරටත් කියා සිටියේ, දැනට දුම්රිය සාමාන්‍යාධිකාරී ලෙස කටයුතු කරන ධම්මික ජයසුන්දර මහතා දෙපාර්තමේන්තුවේ දියුණුව වෙනුවෙන් විශාල කැපකිරීමක් කර ඇති අතර, එහි ප්‍රතිඵල දැනටමත් දැකගත හැකි බවයි. ජයසුන්දර මහතා නීතිවිරෝධී හා වංචනික ක්‍රියාවන්ට එරෙහිව කටයුතු කිරීම හේතුවෙන් ඔහුව එම තනතුරෙන් ඉවත් කිරීමට විවිධ කඩාකප්පල්කාරී ක්‍රියා සිදුවන බවද ලංකාගේ මහතා හෙළිදරව් කළේය.

මීට අමතරව, විදේශීය සංචාරකයින් සඳහා සංචාරක දුම්රිය කිහිපයක් ධාවනයට එක් කර ඇති අතර, මේ වන විට එම දුම්රිය සඳහා විශාල ඉල්ලුමක් පවතින බවත්, එමගින් දුම්රිය දෙපාර්තමේන්තුවේ ආදායම් ඉහළ දැමීමට වත්මන් සාමාන්‍යාධිකාරීවරයා කටයුතු කර ඇති බවත් ඔහු පෙන්වා දුන්නේය. වත්මන් සාමාන්‍යාධිකාරීවරයා පසුගිය ආණ්ඩුව සමයේද මෙම තනතුර දැරූ බවත්, දේශපාලන පළිගැනීමක් ලෙස ඔහුව ඉවත් කළ බවත්, වත්මන් රජය බලයට පත්වීමෙන් පසු ඔහු යළි එම තනතුරට පත්කළ බවත් ජනිත් ලංකාගේ මහතා සඳහන් කළේය.

සාමාන්‍යාධිකාරීවරයා සමඟ බොහෝ දුම්රිය වෘත්තීය සමිති සහ දුම්රිය සේවකයන් එක්ව සිටින බවද ශ්‍රී ලංකා නිදහස් දුම්රිය සේවක පෙරමුණේ ලේකම්වරයා පැවසීය. දුම්රිය දෙපාර්තමේන්තුව මගින් සිදු කෙරෙන ඊ-ටිකට්පත් ක්‍රමවේදය, සන්නිවේදන ව්‍යාපෘති සහ දුම්රිය ඉඩම් සම්බන්ධ ව්‍යාපෘති රැසක්ම කෝටි ගණනින් මුදල් උපයන ව්‍යාපාරික කටයුතු ලෙස මෙම කණ්ඩායම විසින් සිදුකරන බවත්, ඊට අදාළ සාක්ෂි සමඟ මේ පිළිබඳව නොබෝ දිනකින් අල්ලස් හෝ දූෂණ විමර්ශන කොමිෂන් සභාවට පැමිණිලි කරන බවත් ජනිත් ලංකාගේ මහතා අවධාරණය කළේය.