මානව හිමිකම් කොමසාරිස්වරු එන හැම වෙලාවකම ජිනීවාවල පිම්මක් පනිනවා.. දයාන් ජයතිලක ජිනීවාවලදී 13 දෙන්න එකඟ වුණා - වෛද්‍ය වසන්ත බණ්ඩාර (වීඩියෝ)

Jul 15, 2025 at 09:35 AM

|

Lanka Leader

දෙවන ලෝක යුද්ධයෙන් පසුව ලෝකයේ රටවල් 26ක් බෙදා වෙන්කර ඇති බවත්, එම හැම රටක්ම බෙදා වෙන්කර ඇත්තේ ව්‍යවස්ථානුකූලව බල ඒකකයක් නිර්මාණය කර ඉන්පසු ජාත්‍යන්තර මැදිහත්වීම මත බව දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

ඒ මහතා මේ බව පැවසුවේ දෙරණ නාලිකාවේ අලුත් පාර්ලිමේන්තුව වැඩසටහනට එක්වෙමිනි.

ලංකාවේ ඉන්දු-ලංකා ගිවිසුම අනුව 13 වැනි සංශෝධනය ගෙන එන්නේ එම බෙදන රාජ්‍යයේ දේශ සීමා සලකුණු කිරීමට බවත්, උතුර සහ නැගෙනහිර ඒකාබද්ධ කරන්නේ ඒ නිසා බවත් ඒ මහතා පවසයි.

යුද්ධය අවසන්වී දින තුනකින් එවකට එක්සත් ජාතීන්ගේ මහලේකම් බන් කි මූන් මෙරටට පැමිණ මානව හිමිකම් කවුන්සිලයේ විශේෂ සමුළුවක් කැඳවූ බවත්, පවසන ඒ මහතා එම වාර්තාවේ යුද අපරාධ පිළිබඳව එක වචනයක්වත් සඳහන් නොවූ බවත් පෙන්වා දෙයි.

එසේ සිදුවූයේ දයාන් ජයතිලක විසින් 13 වැනි සංශෝධනය බලාත්මක කිරීමට එකඟවූ නිසා බවත්, එමගින් බෙදුම්වාදීන්ට තමන්ගේ මාර්ග සිතියමේ ඉතිරි කොටස සම්පූර්ණ කිරීමට හැකියාව ලැබෙන බවත්, එහෙත් එදා මහින්ද රාජපක්ෂ ජනාධිපතිවරයාට එම බෙදුම්වාදී මාර්ග සිතියමේ ඉදිරියට යාමට නොහැකි වූ බව හා එයට හේතු වූයේ මහින්ද රාජපක්ෂට උපදෙස් ලබාදුන් දේශප්‍රේමී විද්වතුන් නිසා බවද ඒ මහතා සඳහන් කරයි.

ජිනීවා මානව හිමිකම් කවුන්සිලයේ  මහ කොමසාරිස්වරු මෙරටට පැමිණි සෑම වතාවකම ජිනීවාවල පිම්මක් පනින බවත් ඒ මහතා සඳහන් කරයි.

මෙම සංවාදය සඳහා ජ්‍යෙෂ්ඨ නීතිඥ කල්‍යානන්ද තිරාණගම, වයිස් අද්මිරාල් ඩී.කේ.පී දසනායක, නැගෙනහිර පළාත් හිටපු ආණ්ඩුකාර අනුරාධා යහම්පත් සහ නීතිඥ ශිරාල් ලක්තිලක යන මහත්ම මහත්මීහු සහභාගී වූහ.

සවිස්තරාත්මක වීඩියෝව නරඹන්න..