ඊශ්‍රායලයේ ගුවන් ආරක්ෂක මිසයිල ඉක්මනින් අවසන් වනු ඇත - වොෂින්ටන් පෝස්ට් පුවත් පත පවසයි

Jun 19, 2025 at 10:34 AM

|

Lanka Leader

ඇමරිකා එක්සත් ජනපදයෙන් සැලකිය යුතු අමතර සැපයුම් හෝ එහි සෘජු මැදිහත්වීමකින් තොරව ඊශ්‍රායලයේ ගුවන් ආරක්ෂක පද්ධතිවලට ඉරාන බැලස්ටික් මිසයිල ප්‍රහාර එල්ල කරන  වත්මන් වේගයට අනුව  සති දෙකකට අඩු කාලයක් තුළ බිඳ වැටෙන බව වොෂින්ටන් පෝස්ට් පුවත්පත පවසයි.

ඊශ්‍රායල මාධ්‍ය වාර්තා කරන පරිදි, යුදෙව් රාජ්‍යය පසුගිය සිකුරාදා(13) ඉරානයට පහර දුන් දා සිට ටෙහෙරානය ඊශ්‍රායලයට ඩ්‍රෝන සහ මිසයිල රැළි කිහිපයක් දියත් කර තිබේ. ඊශ්‍රායල ප්‍රහාරය ඉස්ලාමීය ජනරජය න්‍යෂ්ටික බෝම්බයක් සංවර්ධනය කිරීම වැළැක්වීම සඳහා පූර්වගාමී පියවරක් ලෙස  එල්ල කළ ප්‍රහාරයක්  ලෙස හඳුන්වනු ලැබීය. ඉරානයෙන් එල්ලකරන මිසයිල ප්‍රහාර වැලැක්වීමේදී එක්සත් ජනපද හමුදා ඊශ්‍රායලයට සහාය වන බවද වාර්තා වේ. ජනාධිපති ඩොනල්ඩ් ට්‍රම්ප් පවසා ඇත්තේ එක්සත් ජනපදය ඊශ්‍රායලය ඉරානය මත බෝම්බ හෙලීමේ ක්‍රියාවලියට  සම්බන්ධ විය හැකි නමුත් මෙතෙක් අවසන් තීරණයක් ගෙන නොමැති බවයි. කෙසේවුවද සිදුකරන ඕනෑම මැදිහත්වීමකින් "ආපසු හැරවිය නොහැකි" හානියක් සිදුවනු ඇති බවට ඉරානය එක්සත් ජනපදයට අනතුරු අඟවා ඇත.

ඉරාන මිසයිල සහ ඩ්‍රෝන යානා ප්‍රහාර වලක්වා ගැනීම බටහිර ජෙරුසලමට මිල අධික මිලටරි ක්‍රියාන්විතයක් වී ඇති බව වොෂින්ටන් පෝස්ට් පුවත් පත පසුගිය 17 වනදා පුවත් විමර්ශන වාර්තාවක් ඉදිරිපත් කරමින් පැවසීය. ඊශ්‍රායලයේ මිසයිල ආරක්ෂණ පිරිවැය රාත්‍රියකට ඩොලර් මිලියන 285 ක් තරම් ඉහළ අගයක් ගත හැකි බව ඊශ්‍රායල මාධ්‍ය වාර්තා පවසයි.

ඉරාන ප්‍රහාරවල වත්මන් වේගය සැලකිල්ලට ගෙන, ඊශ්‍රායලයට එක්සත් ජනපදයෙන් නැවත සැපයුම් නොමැතිව හෝ ඇමරිකානු හමුදාවන්ගේ ගැඹුරු මැදිහත්වීමකින් තොරව එහි වත්මන් ගුවන් ආරක්ෂක මට්ටම තවත් දින 10 සිට 12 දක්වා පමණක් පවත්වා ගත හැකි බව නිර්නාමික මූලාශ්‍රයක් උපුටා දක්වමින් වොෂින්ටන් පෝස්ට් පුවත් පත අවධාරණය කළේය. බටහිර ජෙරුසලමට මෙම සතියේ අග භාගයේදී එහි ගුවන් ආරක්ෂක මිසයිල නැවත පිරවීම  ආරම්භ කිරීමට අවශ්‍ය විය හැකි බව පුවත්පත තවදුරටත් පැවසීය.

“ඉරානයට බාධා කිරීමට අවශ්‍ය අවිය තෝරා ගැනීමට ඊශ්‍රායලයට සිදු වනු ඇත,” පුවත්පත නිර්නාමික මූලාශ්‍රය පැවසූ බව උපුටා දැක්වමින් අවධාරණය කළේය. වොෂින්ටන් පෝස්ට් පුවත් පතට අනුව “ඊශ්‍රායල මිසයිල් පද්ධතිය දැනටමත් අඩපන වී ඇත.”

ඊශ්‍රායලයට පද්ධති කිහිපයකින් සමන්විත "බහු ස්ථර ගුවන් ආරක්ෂක" පලිහක් සතුව තිබේ. නමුත් ඉරාන බර බැලස්ටික් මිසයිල විනාශ කිරීමට "ඇරෝ පද්ධතිය" මත රඳා පැවතීමට ඊශ්‍රායල ගුවන් ආරක්ෂන පද්ධතියට සිදුව තිබේ.ඊශ්‍රායලයේ ප්‍රසිද්ධ 'අයන් ඩෝම්' ගුවන් ආරක්ෂණ පද්ධතිය හමාස් සංවිධානය විසින් එල්ල කරන ලද රොකට් ප්‍රහාර වලට එරෙහිව කාර්යක්ෂම වුවද, ඉරානයේ දැවැන්ත බැලස්ටික් මිසයිලවලට එරෙහිව අකාර්යක්ෂම බව ඊශ්‍රායල මිසයිල විශේෂඥ ටල් ඉන්බාර් උපුටා දක්වමින් වොෂින්ටන් පෝස්ට් පුවත්පත වාර්තා කරයි.

පෙන්ටගනයේ හිටපු ජ්‍යෙෂ්ඨ උපදේශක ඩෑන් කැල්ඩ්වෙල්ට අනුව, බටහිර ජෙරුසලමේ ඇරෝ සහ "David’s Sling" ගුවන් ආරක්ෂණ ඒකක මෙම වසර මුලදී හවුතිවරුන්ගෙන් සහ ඉරානයෙන් එල්ල වූ ප්‍රහාරවලට මුහුණ දීම සඳහා ඔවුන්ගේ බොහෝ අතුරුවාරක භාවිතා කර තිබේ. කෙසේ වුවද අතුරුවාරක ලෙස භාවිතා කරන මෙම මිසයිල මිල අධික බවත් නිෂ්පාදනය කිරීමට බොහෝ කාලයක් ගත වන බවත් ඩෑන් කැල්ඩ්වෙල් සඳහන් කළේය.

“එබැවින් ඊශ්‍රායලයට සහ එක්සත් ජනපදයට ඉක්මනින් ඔවුන්ගේ අතුරුවාරක නැවත පිරවීම ආරම්භ කිරීමට සිදුවනු ඇත (ඔවුන් දැනටමත් එසේ කර නොමැති නම්),” හිටපු ආරක්ෂක නිලධාරියා සඳුදා X හි සටහනක් තබමින් අවධාරණය කළේය.

පසුගිය අඟහරුවාදා(17) සිට, ට්‍රම්ප් ටෙහෙරානයේ “කොන්දේසි විරහිත යටත් වීම” නැවත නැවතත් අවධාරණය කළ අතර, එක්සත් ජනපදයට ඉරාන ගුවන් අවකාශයේ පාලනය තමන් යටතට ගත හැකි බවට පුරසාරම් දොඩමින්, ඉරාන උත්තරීතර නායක අලි කමේනි ඝාතනය කිරීම “පහසු” බවද අවධාරණය කළේය. එක්සත් ජනපද ජනාධිපතිවරයා ඕනෑම මොහොතක ඉරානයට එරෙහි ඊශ්‍රායල ක්‍රියාදාමයට සම්බන්ධ විය හැකි බව විවිධ ජාත්‍යන්තර මාධ්‍ය ආයතන අවධාරණය කර තිබේ.

ටෙහෙරානය “බලහත්කාරය හමුවේ කිසිවෙකුට යටත් නොවන” බව ප්‍රකාශ කර ඇති අතර ඕනෑම ප්‍රහාරයකට පළිගැනීමට සූදානම් බවට තර්ජනය කර ඇත.

Israel to run out of air defense missiles soon – WaPo