ප්‍රසාද දීමනා කප්පාදුවට එරෙහිව ලංකා බැංකු සේවක සංගමය දැඩි තීරණයක් ගනී..

May 29, 2025 at 12:41 PM

|

Lanka Leader

ප්‍රසාද දීමනා කප්පාදු කිරීමට එරෙහිව අද (29) පස්වරු 12.30න් පසු ලංකා බැංකු ශාඛා පද්ධතිය වසාදමා සියලු‍ ගනුදෙනුවලින් ඉවත්වීමට ලංකා බැංකු සේවක සංගමය තීරණය කර තිබේ. 

 එම සංගමය නිවේදනය කළේ, සිය ඉල්ලීම්වලට නිසි විසඳුමක් නොලැබුණහොත් ලබන 06 වනදා සංකේත වර්ජනයකට අවතීර්ණ වන බවය.

ඒ සම්බන්ධයෙන් අදහස් දැක්වූ ලංකා බැංකු සේවක සංගමය සාමාජිකයෙක්,

"ලංකා බැංකුව 2024 වර්ෂයේ ඉතිහාසයේ ලංකාවේ ආයතනයක් වාර්තා කළ විශිෂ්ටතම සහ විශාලතම ලාභය බිලියන 107ක් වාර්තා කරන්න සමත් වුණා. ලංකා බැංකුව උපයන ලාබයෙන් වැඩි කොටසක් භාණ්ඩාගාරයට තමා වැය වෙන්නේ. ලංකා බැංකුවේ කාළමනාකාරීත්වයත්  අධ්‍යක්ෂක මණ්ඩලයත් සේවක මණ්ඩලය වෙත ලබා දීමට තීරණය කළ අනුමත කළ දිරි දීමනාව මුදල් අමාත්‍යාංශය විසින් කප්පාදු කිරීමට මෙන්ම එ් වගේම ඒ පිළිබඳව  මුදල් අමාත්‍යාංශය සමඟ පැවැත් වූ සාකච්ඡාවකදී මුදල් පිළිබඳව නියෝජ්‍ය අමාත්‍යවරු දෙදෙනා විසින් එකඟ වූ එකඟතාවයන් ඉෂ්ට කිරීමට මේ වන තෙක් කටයුතු කරලා නෑ. මාස එකහාමාරක් ගත වෙලා. අනුවමත කළ දිරි දීමනාව අසාධාරණ ලෙස කප්පාදු කිරීමට එරෙහිව තමයි මේ වෘත්තීය සමිති ක්‍රියාමාර්ග දියත් කරන්නේ."

"අපි ආණ්ඩුවට බල කරන්නේ එකඟ වූ එකඟතාවයන් ඉෂ්ට කරන්න. කණගාටුවෙන් වුනත් මේ වෘත්තීය ක්‍රියාමාර්ග දියත් කරන්න අපිට සිදු වෙලා තියෙනවා. මේ වගේ වෘත්තීය ක්‍රියාමාර්ග ගණනාවක් අපි සංවිධානය කරලා තියෙනවා. ආණ්ඩුව විසින් තවදුරටත් විසඳුම් ලබා නොදෙන්නේ නම් ලබන සතියේ ඉදලා තීන්දු කරලා තියෙනවා එක්දින වැඩ වර්ජනයක්"