ජනාධිපතිගේ ප්‍රකාශ ගැන කොමිසමේ මතය රටට කියන්න’: පොහොට්ටුවෙන් මැතිවරණ කොමිසමට ලිපියක්

Apr 23, 2025 at 11:09 AM

|

Lanka Leader

පළාත් පාලන ඡන්දයේදී ජාතික ජන බලවේගය නොදිනන ආයතනවලට රාජ්‍ය මූල්‍ය වෙන් නොකරන බවට ජනාධිපතිවරයා කළ ප්‍රකාශය ගැන වහා රටට පැහැදිලි කිරීමක් කරන්නැයි ශ්‍රී ලංකා පොදුජන පෙරමුණ මැතිවරණ කොමිසමට ලිපියක් මගින් දැනුම් දී ඇත.

ශ්‍රී ලංකා පොදුජන පෙරමුණේ නීතිඥ සංගමයේ මැදිහත්වීමෙන් පක්ෂ මහලේකම් නීතිඥ සාගර කාරියවසම් විසින් මෙම ලිපිය එම කොමිසමට භාරදෙනු ලැබ තිබේ.

ජනාධිපතිවරයාගේ මෙම ප්‍රකාශය මුදල් ඇමතිවරයා වශයෙන් කළ බරපතළ සිදුවීමක් සේ සලකා කඩිනමින් ක්‍රියාමාර්ග ගන්නැයි මැතිවරණ කොමිසමෙන් ඉල්ලීමක් කළේ යැයි සාගර කාරියවසම් මහතා ‘මව්බිම’ට පැවසීය.

මැතිවරණ කොමිසම ඒ ගැන ජනාධිපති ලේකම්වරයාට ලිපියක් මගින් දැනුම් දුන් බව එහි සභාපතිවරයා තමන්ට පැවැසූ නමුත් එය කිසිසේත් ප්‍රමාණවත් නොවන බව පවසමින් සිදුවීම ගැන මැතිවරණ කොමිසමේ මතය රටට කියන ලෙස අවධාරණය කළේ යැයි මහලේකම්වරයා කීය.

අනුර කුමාර දිසානායක ජාතික ජන බලවේගය මෙහෙයවමින් ජනාධිපති ධූරයට පත් වූයේ ද ජනතාවට බොරු පොරොන්දු දී යැයි චෝදනා කළ කාරියවසම් මහතා මහ මැතිවරණයේදී තුනෙන් දෙකක බලයක් ගැනීමට භාවිත කළේ ද එම මඟ ම යැයි කීවේය.

ජනාධිපතිවරයාගේ මෙම සාහසික ප්‍රකාශයෙන් පෙනෙන්නේ ජාතික ජන බලවේගය පළාත් පාලන ඡන්දයේදී ද එම උපක්‍රමය භාවිත කරමින් සිටින බව යැයි ද පොදුජන පෙරමුණේ ලේකම්වරයා කීය.

පළාත් පාලන ආයතනවලට මුදල් වෙන් නොකිරීමට ජනාධිපතිවරයාට කිසිදු හැකියාවක් මෙන් ම බලයක් නැතැයි කී හෙතෙම සියලු පළාත් පාලන ආයතනවලට රාජ්‍ය මූල්‍ය වෙන් වන්නේ නීතිය අනුව යැයි ද කීවේය.

ජනාධිපතිවරයා ඒ සම්බන්ධයෙන් මැදිහත් වුවත් නැතත් අදාළ මුදල් පළාත් පාලන ආයතනවලට ලැබෙන්නේ යැයි ද මහලේකම්වරයා වැඩිදුරට ත් පැවසීය.