පළාත් පාලන ඡන්ද විමසීමට අදාළව තැපැල් සහ අනෙකුත් ඡන්ද පත්‍රිකා නැවත මුද්‍රණය කිරීමට සිදුවීම හේතුවෙන් රජයට රුපියල් මිලියන 114කට අධික මුදලක් වැය වී ඇති බව රජයේ මුද්‍රණාලායාධිපති ප්‍රදීප් පුෂ්පකුමාර පවසනවා.
පළාත් පාලන ඡන්ද විමසීම සදහා දේශපාලන පක්ෂ හා ස්වාධීන කණ්ඩායම් භාරදුන් නාමයෝජනා ප්‍රතික්ෂේප වීම හේතුවෙන් ඒ ඒ පක්ෂ සහ ස්වාධීන කණ්ඩායම් අධිකරණය හමුවේ නඩු ගොනු කිරීමට කටයුතු කළා.
ඒ අනුව එම නාමයෝජනා පත්‍ර යළි භාරගන්නා ලෙසයි අධිකරණය පසුගියදා නියෝග කළේ. මෙම නියෝගයට පෙර පළාත් පාළන ආයතන රැසකට අදාළ ඡන්ද පත්‍රිකා මුද්‍රණය කිරීමට රජයේ මුද්‍රණාලය පියවර ගෙන තිබුණා.
කෙසේ වෙතත් අධිකරණ තීන්දු මත පළාත් පාලන ආයතන රැසකට අදාළ අපේක්ෂක නාමලේඛන සහ ඡන්ද පත්‍රිකා යළි මුද්‍රණය කිරීමටයි මුද්‍රණාලයට සිදුව ඇත්තේ. ඒ අනුව ඡන්ද පත්‍රිකා 45 ලක්ෂ 97,608 ක් මුද්‍රණය කිරීමට සිදුව තිබෙනවා.
ඒ වෙනුවෙන් රජයට රුපියල් මිලියන 114 ක අධික මුදලක් වැය වී ඇති බවයි රජයේ මුද්‍රණාලායාධිපති ප්‍රදීප් පුෂ්පකුමාර ප්‍රකාශ කළේ.
එමෙන්ම පළාත් පාලන ඡන්ද විමසීම සඳහා සිදුකරන තැපැල් ඡන්ද සළකුනු කිරීම සම්බන්ධව මැතිවරණ කොමිසම විසින් අද නිවේදනයක් නිකුත් කරනු ලැබුවා.
ඒ අනුව එළැඹෙන 24, 25,28 සහ 29 යන දිනවලදී පමණක් අදාළ තැපැල් ඡන්ද සළකුණු කිරීමේ කටයුතු සිදුකරන බවයි මැතිවරණ කොමිසම දැනුම් දෙන්නේ.
මීට පෙර දින 05 ක් ඒ සදහා මැතිවරණ කොමිසම විසින් නම්කර තිබුණා.
මේ අතර ඉදිරි මැතිවරණයෙන් පසු පළාත් පාලන ආයතන සඳහා මුදල් වෙන්කිරීම පිළිබඳව ජනාධිපති අනුර කුමාර දිසානායක සිදුකළ ප්‍රකාශයට විරුද්ධව සමගි ජන බලවේගයේ මහලේකම් රංජිත් මද්දුම බණ්ඩාර ඇතුළු පිරිසක් අද මැතිවරණ කොමිෂන් සභාව වෙත පැමිණිල්ලක් ඉදිරිපත් කළා.
එහිදී මහලේකම්වරයා සඳහන් කළේ 88, 89 කාල වකවානුවේදී සේම ඉදිරි පළාත් පාලන මැතිවරණය ජයග්‍රහණය කිරීම සඳහා ජනාධිපති අනුර කුමාර දිසානායක සිය බලය භාවිත කරන බවයි.