වැඩබලන පොලිස්පතිවරයා බිංගිරිය පොලිස් ස්ථානධිපතිවරයා ස්ථාන මාරුකර ඇත්තේ නීතියට පටහැනිවයි- පොලිස් කොමිසම දැනුම් දෙයි

Apr 5, 2025 at 10:33 AM

|

Lanka Leader

ජාතික පොලිස් කොමිසම නිවේදනයක් නිකුත් කරමින් පවසන්නේ වැඩ බලන පොලිස්පතිවරයා විසින් බිංගිරිය පොලිස් ස්ථානාධිපතිවරයා මාරු කර යවා ඇත්තේ ජාතික පොලිස් කොමිෂන් සභාව සතු බලතල මෙන්ම දැනට බලපවත්වන ස්ථාන මාරු ප්‍රතිපත්තියේ විධිවිධාන ද උල්ලංඝනය කරමින් බවයි. 

ජාතික පොලිස් කොමිසම විසින් නිකුත් කර ඇති මාධ්‍ය නිවේදනය පහත පළවේ.

මාධ්‍ය නිවේදනයයි

පොලිස් ස්ථානාධිපතිවරයකු ඉවත් කිරීම සඳහා හදිසි සහ සුවිශේෂී අවශ්යතාවක් උද්ගත වූ විට ආයතන ප්‍රධානියා වශයෙන්, වැඩබලන පොලිස්පත්වරයා අදාල පොලිස් ස්ථානාධිපතිවරයා ඉවත් කර කඩිනමින් සුදුසු නිලධරකු පත්කළ යුතු වූ විට දී ඒ පිළිබඳව ජාතික පොලිස් කොමිෂන් සභාවේ සභාපතිවරයා දැනුවත් කර අවශ්‍ය පියවර ගැනීමටත්, අදාල තීරණ ගැනීමෙන් පසු එළැඹෙන පළමු කොමිෂන් සභා සැසිවාරයට එම කරුනු ඉදිරිපත් කර එකී ක්‍රියාමාර්ග සදහා ආවරණ අනුමැතිය ලබා ගැනීමටත් අවසර දුන් පොදු තීරණයක් මඟින් 2024.12.02 දින වැඩබලන පොලිස්පතිවරයා දැනුවත් කර තිබුනද එසේ සිදු නොකිරීම තුළින් ජාතික පොලිස් කොමිෂන් සභාව සතු බලතල ද දැනට බලපවත්වන ස්ථාන මාරු ප්‍රතිපත්තියේ විධිවිධාන ද උල්ලංඝනය කර ඇති බව නිරීක්ෂණය කරන ලදි.

එසේම වැඩ බලන පොලිස්පතිවරයා විසින් ජාතික පොලිස් කොමිෂන් සභාවේ අනුමැතියක් ලබා ගැනීමෙන් තොරව සහ ජාතික පොලිස් කොමිෂන් සභාවේ සභාපතිවරයා දැනුවත් කිරීමෙන් තොරව බිංගිරිය පොලිස් ස්ථානාධිපති ක්ෂණිකව ස්ථානමාරු කිරීමට කටයුතු කර ඇති අතර, එමගින් ද ජාතික පොලිස් කොමිෂන් සභාවෙහි ඉහතකී පොදු තීරණයට පටහැනිව කටයුතු කර ඇති බවත් ඒ තුළින් මෙම සිදුවීම පිළිබඳව රට තුළ මහත් ආන්දෝලනයක් ඇති වී තිබෙන බවත් ජාතික පොලිස් කොමිෂන් සභාව විසින් නිරීක්ෂණය කරන ලදී.

එමෙන්ම මැතිවරණයක් ප්‍රකාශයට පත්කර ඇති අවස්ථාවක බඳවා ගැනීම්, උසස්කිරීම්, ස්ථානමාරු කිරීම් සිදු කිරීම සඳහා මැතිවරණ කොමිෂන් සභාවේ එකඟතාවය ලබාගත යුතු බවට මැතිවරණ කොමසාරිස් ජනරාල් විසින් නිකුත් කර ඇති අංක LAE/2025/06 දරණ 2025.03.03 වන දිනැති චක්‍ර ලේඛයේ සඳහන්ව තිබියදී, වැඩබලන පොලිස්පතිවරයා විසින් ඉහත ස්ථානමාරු වීම සිදු කර ඇත්තේ එකී චක්‍රලේඛයේ ප්‍රතිපාදනවලට පටහැනිව බවත්, එසේ කටයුතු නොකිරීම සම්බන්ධව කරුණු දක්වන ලෙස වැඩබලන පොලිස්පතිවරයා වෙත ජාතික පොලිස් කොමිෂන් සභාවට ද පිටපතක් සහිතව මැතිවරණ කොමසාරිස් ජනරාල් විසින් අංක EC/CL/LAE/2025/19 දරන සහ 2025.04.02 දිනැති ලිපියේ සඳහන් කරුණු ද ජාතික පොලිස් කොමිෂන් සභාව විසින් අධ්‍යයනය කරන ලදී.

ඉහත සියළු කරුණු සලකා බැලීමෙන් අනතුරුව බිංගිරිය පොලිස් ස්ථානාධිපති ස්ථාන මාරු කිරීමට කටයුතු කිරීමේ දී ඉහත තීරණයට අනුකූලව කටයුතු කර නොමැති බැවින් තවදුරටත් මෙම පොදු තීරණය අනුව කටයුතු කිරීමට වැඩබලන පොලිස්පතිවරයා හට අවකාශ සලසා දීම තුළින් ඉමහත් ගැටළුකාරී තත්ත්වයක් ඇති විය හැකි බැවින් වහාම ක්‍රියාත්මක වන පරිදි ඉහත කී පොදු තීරණය අවලංගු කිරීමට 2025.04.03 වන දින රැස් වූ ජාතික පොලිස් කොමිෂන් සභාව එකමතිකව තීරණය කරන ලදී.

එමෙන්ම බිංගිරිය පොලිස් ස්ථානාධිපතිවරයා ස්ථාන මාරු කිරීමට හේතු වූ සුවිශේෂ කරුණු ජාතික පොලිස් කොමිෂන් සභාව වෙත වැඩබලන පොලිස්පතිවරයා විසින් මෙතෙක් දැනුම් දී නොමැති බැවින්, සහ මැතිවරණ කොමිෂන් සභාවේ අනුමැතිය ලබා ගෙන නොමැති බැවින් ද, බිංගිරිය පොලිස් ස්ථානාධිපති වෙත 2025 මාර්තු 25 දින වැඩ බලන පොලිස්පතිවරයා විසින් ලබා දුන් ස්ථාන මාරුව වහාම ක්‍රියාත්මක වන පරිදි අවලංගු කිරීමටත්, ඒ අනුව ක්‍රියාකර, නොපමාව ජාතික පොලිස් කොමිෂන් සභාව ලිඛිතව දැනුවත් කරන ලෙසටත් වැඩබලන පොලිස්පතිවරයාට නියෝග කිරීමට ජාතික පොලිස් කොමිෂන් සභාව ඒකමතිකව තීරණය කරන ලදී. එම ලිපියේ පිටපතක් මැතිවරණ කොමිෂන් සභාව වෙත යැවීමට ද ජාතික පොලිස් කොමිෂන් සභාව වැඩබලන පොලිස්පතිවරයා වෙත නියෝග කර ඇත.