‘ස්කයිප්’ වලින් නඩු අහලා ඉවරයි

Mar 1, 2025 at 08:59 AM

|

Lanka Leader

ඇමරිකානු බහුජාතික තාක්‍ෂණ සමාගමක් වන මයික්‍රොසොෆ්ට් සිය වීඩියෝ සම්මන්ත්‍රණ වේදිකාව වන ‘ස්කයිප්’ වසාදැමීමට සැලසුම් කරමින් සිටින බව වාර්තා වේ.

විදෙස් ජනමාධ්‍ය වාර්තා අනුව එම මෙම සේවාව මැයි මාසයේ සිට ලබාගත නොහැකි බව පැවසේ.

මෙය සබැඳි සන්නිවේදනයේ විප්ලවීය වෙනසක් ඇති කළ වේදිකාවක යුගයක අවසානය සනිටුහන් කිරීමක් බව ද විදෙස් ජනමාධ්‍ය වාර්තා කර ඇත.

ඒ අනුව Microsoft සමාගමේ නව තීරණය ස්කයිප් හි වසර 22 ක ගමනට තිත තබනු ඇත.

එය ප්‍රථම වරට 2003 දී දියත් කරන ලද අතර 2011 දී මයික්‍රොසොෆ්ට් විසින් මිලදී ගන්නා ලදී.

කාලයාගේ ඇවෑමෙන් මයික්‍රොසොෆ්ට් විසින් Windows Live Messenger අත්හිටුවීම ඇතුළු විශේෂාංග කිහිපයක් ක්‍රමයෙන් ඉවත්කරන ලදී.

2015 දී මයික්‍රොසොෆ්ට් ස්කයිප්, වින්ඩෝස් 10 වෙත ඒකාබද්ධ කිරීමට උත්සාහ කර තිබිණි.

කෙසේවෙතත්, එම උත්සාහය පැවතියේ මාස නවයක් පමණි.

අනතුරුව මයික්‍රොසොෆ්ට් 2017 දී Microsoft Teams මෘදුකාංගය දියත්කරන විට ස්කයිප් අභ්‍යන්තර තරඟයකට ද මුහුණ දී තිබිණි.

අභ්‍යන්තර සන්නිවේදනය සඳහා සමාගම් විසින් බහුලව භාවිතා කරන Slack වැනි වේදිකා වලට තරඟ කිරීමට Microsoft Teams නිර්මාණය කරන ලදී.

මෙම සියලු අසාර්ථකවීම් හමුවේ වසර ගණනාවක් තිස්සේ, ස්කයිප් වසා දමන්නේ කවදාද යන්න පිළිබඳව දිගින් දිගටම කතාබහට ලක්ව තිබේ.

ශ්‍රී ලංකාවේද නඩු කටයුතුවලදී නඩුවේ දුරස්ථ පාර්ශව සම්බන්ධ කරගැනීම ඇතුළු රාජ්‍ය සහ පෞද්ගලික කටයුතු රැසකට ස්කයිප් තාක්ෂනය භාවිත කරනු ලබයි.