අපරාධවල විශේෂ වර්ධනයක් නෑ – ඇමැති ආනන්ද විජේපාල

Feb 28, 2025 at 08:09 AM

|

Lanka Leader

ඉකුත් වසරවල සිදුවූ අපරාධවල දත්ත සැසඳීම්, මේ වසරේ මුල් මාස දෙකේදී අපරාධවල විශේෂ වර්ධනයක් නොමැති බව මහජන ආරක්ෂක හා පාර්ලිමේන්තු කටයුතු ඇමැති ආනන්ද විජේපාල මහතා ඊයේ (27 දා) පාර්ලිමේන්තුවේදී පැවසීය.

විපක්‍ෂ නායක සජිත් ප්‍රේමදාස මහතා 27/2 යටතේ නැගූ ප්‍රශ්නවලට පිළිතුරු දෙමින් ඇමැතිවරයා මේ බව කීය.

තැන තැන සිදුවන වෙඩි තැබීම් හා මනුෂ්‍ය ඝාතන සාමාන්‍ය ජන ජීවිතය නොසන්සුන් කිරීමට හේතුවක් නොවන බවද ඇමැතිවරයා කියා සිටියේය.

ඉකුත් වසරවල මුල් මාස දෙක තුළ සිදුවූ වෙඩි තැබීම් හා සැසඳීමේදී මෙම වර්ෂයේ වර්ධනයක් නැතැයිද, 2016 වසරේ මුල් මාස දෙක තුළ වෙඩි තැබීම් 12ක්ද, 2018 වසරේ මුල් මාස දෙක තුළ වෙඩි තැබීම් 12ක්ද, 2024 වර්ෂයේ මුල් මාස දෙක තුළ වෙඩි තැබීම් 14ක්ද සිදුව ඇතැයි කී ඇමැතිවරයා මෙම වසරේ මුල් මාස දෙක තුළද වෙඩි තැබීම් 14ක් සිදුව ඇති බව සඳහන් කළේය. මෙය සමාන තත්ත්වයක් බවද එම තත්ත්වය සමනය කිරීමට රජය පියවර රැසක් ගෙන තිබෙන බවද සඳහන් කළේය.

ශ්‍රී ලංකා පොලිසිය විසින් මනුෂ්‍ය ඝාතන මැඬ පැවැත්වීමට පොලිස් ස්ථානවල ජංගම මුර සංචාරක, මාර්ග බාධක, ත්‍රිවිධ හමුදා, විශේෂ කාර්ය බළකා ආරක්ෂක රාජකාරි, ක්‍ෂණික මාර්ග බාධක සෝදිසි ආදිය සිදු කරනවා.

අත්අඩංගුවට ගන්නා සැකකරුවන්ගේ ජීවිත ආරක්ෂා කර ගැනිමට විධිමත් පිළිවෙතක් ක්‍රියාත්මකයි. නඩු තීන්දු චක්‍රලේඛ මඟ පෙන්වීම් තියෙනවා. අපරාධ මර්දනයට මධ්‍යම අපරාධ විමර්ශන කාර්යාංශයක් පිහිටුවාගෙන යනවා. විදෙස් සිට අපරාධ මෙහෙයවන අපරාධකරුවන් ගෙන්වා ගැනීමට පවතින උදර්පන නීති හා අපගේ නීති යටතේ ක්‍රියාත්මක වෙනවා.