ගුවන්තොටුපළ සහ ගුවන් සේවා සමාගම කොන්ත්‍රාත්තුවක් කඩකළාට මිලියන 176 ක් ගෙවන්නැයි වාණිජ මහාධිකරණයෙන් නියෝගයක්..

Feb 22, 2025 at 08:58 PM

|

Lanka Leader

කොන්ත්‍රාත්තුවක් කඩ කිරීම සම්බන්ධයෙන් කොළඹ වාණිජ මහාධිකරණය ගුවන්තොටුපළ සහ ගුවන් සේවා (ශ්‍රී ලංකා) සමාගමට (AASSL) රුපියල් මිලියන 176 ක්  පොලිය සමඟ පෞද්ගලික සමාගමකට ගෙවන ලෙස නියෝග කර තිබේ.

පෞද්ගලික සමාගමට ප්‍රදානය කරන ලද ගුවන්තොටුපළ මෘදුකාංග පද්ධති වැඩිදියුණු කිරීමේ ගිවිසුමක් ගුවන්තොටුපළ සහ ගුවන් සේවා සමාගම විසින් ඒකපාර්ශ්විකව අවසන් කිරීම නීති විරෝධී බව අධිකරණය තීන්දු කර ඇත. 

මෙම තීන්දුව ලබා දුන් වාණිජ මහාධිකරණ විනිසුරු කේ. ප්‍රියන්ත ප්‍රනාන්දු මහතා විසින්  අදාළ පොලිය ඇතුළුව රුපියල් මිලියන 24 ක බැංකු ඇපකරයක් පියවීමට රජයට අයත් ආයතනයට නියම කර තිබේ. 

පැමිණිලිකරු වන E.W. තොරතුරු සමාගම, විදේශීය තාක්‍ෂණ සමාගම් කිහිපයක් සමඟ හවුල්කාරිත්වයෙන් ගුවන්තොටුපළේ මෙහෙයුම් පද්ධති නවීකරණය කිරීම සඳහා 2012 වසරේදී ටෙන්ඩරය ලබාගෙන තිබුණි. 

අදාළ සමාගම ගුවන්තොටුපළ සහ ගුවන් සේවා සමාගම වෙත පද්ධතිය භාර දීමට පෙර මෘදුකාංග ස්ථාපනය සහ දෘඩාංග ඒකාබද්ධ කිරීම ඇතුළු ව්‍යාපෘති අදියර තුනක් සාර්ථකව සම්පූර්කෛර ඇත.

කෙසේ වෙතත්, ව්‍යාපෘති නිම කිරීම සඳහා මාස තුනහමාරක කාලයක් දීර්ඝ කිරීමට කැබිනට් නියෝගයක් ලබා දී තිබියදීත්, දේශපාලන බලපෑම් හේතුවෙන් ගුවන්තොටුපළ සහ ගුවන් සේවා සමාගම එම කාලය දීර්ඝ කිරීම නවතා දමා තිබේ.

එවැනි අසාධාරණ රාජ්‍ය මැදිහත්වීම් පෞද්ගලික ව්‍යවසායන් අඩපණ කරන බවට පැමිණිලිකරු තර්ක කළ අතර ඒ හා සමාන අසාධාරණ ක්‍රියාවන් වැළැක්වීමට අධිකරණයෙන් ඉල්ලා තිබේ.

ව්‍යාපෘති ප්‍රමාදයන් ගුවන්තොටුපළ සහ ගුවන් සේවා සමාගමේම ක්‍රියා නිසා සිදුවී ඇති බවත් කොන්ත්‍රාත් කාල සීමාව අන්‍යෝන්‍ය වශයෙන් දීර්ඝ කර ඇති බවත් අධිකරණය පිළිගෙන ඇති අතර, තවද, පැමිණිලිකරු මූලික අදියර තුන සාර්ථකව නිම කර ඇති බව ද විත්තිකරු පිළිගෙන තිබේ.

පැමිණිලිකරු සිවිල් කොන්ත්‍රාත් රෙගුලාසිවලට අනුකූලව ක්‍රියා කර ඇති බවත්, ඉල්ලා ඇති හානිය සාධාරණ බවත්, එමඟින් වන්දි නියෝගය තහවුරු කළ බවත් විනිසුරු ප්‍රනාන්දු මහතා මෙහිදී තීන්දු කර ඇත.