ගනේමුල්ලේ සංජීවගේ ඝාතනයෙන් පාර්ලිමේන්තුව ඇවිලෙයි

Feb 19, 2025 at 12:59 PM

|

Lanka Leader

අලුත්කඩේ අධිකරණ සංකීර්ණයේ අංක 5 මහෙස්ත්‍රාත් අධිකරණය තුළ ගණේමුල්ලේ සංජීව වෙඩිතබා ඝාතනය කිරීම සම්බන්ධයෙන් අද (19) පාර්ලිමේන්තුවේදී ආණ්ඩු පක්ෂ සංවිධායක, අමාත්‍ය නලින්ද ජයතිස්ස මහතා අදහස් පළ කළේය.

එහිදී ඔහු සඳහන් කළේ පාතාලය මර්දනය කිරීම සඳහා පියවර ගණනාවක් ගෙන ඇති බවත් ඒවා සියල්ල පාර්ලිමේන්තුව හමුවේ හෙළිදරව් කිරීමට නොහැකි බවත්ය.

පාර්ලිමේන්තු මන්ත්‍රී දයාසිරි ජයසේකර මහතා අද පාර්ලිමේන්තුවේදී මේ පිළිබඳව ප්‍රශ්න කළ අතර ඊට පිළිතුරු දෙමින් අමාත්‍ය නලින්ද ජයතිස්ස මහතා ඉහත පැහැදිලි කිරීම කළේය.

පාර්ලිමේන්තු මන්ත්‍රී දයාසිරි ජයසේකර මහතා,

"කථානායකතුමා, මේ අවස්ථාවේ අලුත්කඩේ උසාවියේ ලෝයර් කෙනෙක් විදියට ඇවිත් වෙඩිතියලා ගියා.. අංක 5 අධිකරණයේ. ගණේමුල්ලේ සංජීව කියලා කෙනෙක් ඝාතනය කළා.."

"ඊයේ රාත්‍රියේ මිද්දෙණියේ ළමයි දෙන්නෙක් එක්ක වෙඩිතැබීමක්. අලුත්කඩේ දැන් සිද්ධ වුණේ."

"දැන් මේක මේ රටේ ආරක්ෂාව පිළිබඳ විශාල ප්‍රශ්නයක්."

මේ සම්බන්ධයෙන් ආණ්ඩුවේ ස්ථාවරය පැහැදිලි කරමින් ආණ්ඩු පක්ෂ සංවිධායක, අමාත්‍ය නලින්ද ජයතිස්ස මහතා සඳහන් කළේ,

"පාතාල කටයුතු ගැන ආණ්ඩුව වගකීමෙන් කටයුතු කරනවා. ඒ නිසා අරගනිමින් තිබෙන ක්‍රියාමාර්ග ගණනාවකුත් තිබෙනවා. බැහැයි පාතාලය, කළු සල්ලි, කුඩු ජාවාරම මේකට සම්බන්ධයි. මේකට සම්බන්ධ සමහර අය ලංකාවෙත් නෙමෙයි ඉන්නේ."

"අපි මේක ඉතාම ගැඹුරින් සලකනවා කියන එක කියන්න කැමතියි."

"පියවර ගණනාවක් ගෙන තිබෙනවා. සියලු පියවර පාර්ලිමේන්තුවට හෙළිදරව් කරන්න බැරි වෙයි. නමුත් රජය මේ පිළිබඳව දැඩිව මැදිහත් වෙනවා. පාතාලයට බුරුලක් දෙන්නේ නැහැ."