මග පෙන්වන විපක්ෂයක භූමිකාව ඉෂ්ඨ කිරීම වෙනුවෙන් මැතිවරණයට ඉදිරිපත් වෙනවා... තරුණ්‍යයේ හීන මියගිය බිමක එම හීන යථාර්ථයක් කිරීම වෙනුවෙන් කැප වෙනවා - උවිඳු මහනුවරදී කියයි

Oct 31, 2024 at 08:57 AM

|

Lanka Leader

2024 පාර්ලිමේන්තු මැතිවරණය සඳහා දෙවන පරපුර පක්ෂයෙන් මහනුවර දිස්ත්‍රික්කයට තරග වදින අපේක්ෂකයන්ගේ ජය තහවුරු කිරීමේ ජනහමු මාලාව දෙවන පරපුරේ නායක, උවිඳු විජේවීර මහතාගේ සහභාගීත්වයෙන් පෙරේදා (29) දින දිස්ත්‍රික්කයම ආවරණය වන පරිදි පැවැත්විණි. 

එහිදී උවිඳු විජේවීර මහතා පැවසුවේ අලුත් දේශපාලන බලවේගයකට ජනතාවගේ විශාල කැමැත්තක් ඇති බවත්, සාම්ප්‍රදායික දේශපාලනය ඔවුන් ප්‍රතික්ෂේප කර ඇති පසුබිමක යහපත් මිනිසුන් පාර්ලිමේන්තුවට ගෙන යාම සඳහා දෙවන පරපුර බිම සකස්කර ඇති බවත් ය.

මග පෙන්වන විපක්ෂයක භූමිකාවක් ඉෂ්ඨ කිරීම වෙනුවෙන් මෙවර මහ මැතිවරණයට ඉදිරිපත් වන බව බවද, අලුත් බීජයක් වැපිරීමට සුදුසු බිමක් මේ වන විට මෙරට නිර්මාණය වී ඇති බවද ඒ මහතා පවසයි.

තරුණ්‍යයේ හීන මියගිය බිමක එම හීන යථාර්ථයක් කිරීම වෙනුවෙන් සහ රට හැරයන තරුණ ප්‍රජාව මෙරට තුළ සිටිමින් රට ගොඩනැගීමට දායකත්වය දක්වන පිරිසක් බවට පත්කිරීම වෙනුවෙන් දෙවන පරපුර මැතිවරණයට ඉදිරිපත්වී සිටින බවද උවිඳු විජේවීර මහතා මෙහිදී පැවසීය.

රටක් ලෙස අප වරද්දා ගත් තැන් ගණනාවක් ඇති බවත්, නිදහස ලබාගත් පසු මෙරටට අනන්‍ය වූ ජාතික චින්තනයක් නිර්මාණය කර ගැනීමට අපට නොහැකි වූ බවත් පවසන ඒ මහතා, මෙරට නිර්මාණය වූයේ පක්ෂවල පාට රැගත් මිනිසුන් පමණක් බවත් සඳහන් කළේය.

පාට පක්ෂ බෙදීම් තුළ රටට ගමනක් යා නොහැකි බවද, මෙම සියළු පක්ෂවල යහපත් මිනිසුන් එකම වේදිකාවකට ගෙන ගමනක් යාහැකි ලෙස ගොඩනැගීම දෙවන පරපුර දේශපාලන ව්‍යාපාරයේ අරමුණ බවද ඒ මහතා සඳහන් කරයි.

මෙරට සභ්‍යත්ව උරුමය විනාශ කළ බවත්, එය නැවත ගොඩනැගීමට නම් මෙරට උරුමය, සභ්‍යත්වය ගැන දන්නා මිනිසුන් පාර්ලිමේන්තුවේ සිටිය යුතු බවද පවසන උවිඳු විජේවීර මහතා, ඒ සඳහා පාර්ලිමේන්තුවට යහපත් මිනිසුන් යැවිය යුතු බවද පෙන්වා දෙයි.