අපි හෙළිකරපු අන්තවාදී බලවේග ගිහින් හැංගුණේ ජවිපෙ - ඥනසාර හිමියන්ගෙන් සුවිශේෂී හෙළිදරව්වක් (වීඩියෝ)

Jul 22, 2024 at 06:15 PM

|

Lanka Leader

පාස්කු ප්‍රහාරය ගැන කතාකරන රට පාලනය කරන සහ රට පාලනය කිරීමට බලය ඉල්ලන සියලු කල්ලි කණ්ඩායම් විසින් ඇත්ත මරාදමා ඇති බවත්, හරිනම් මෙම කල්ලි කණ්ඩායම්වල නායකයන් සිටිය යුත්තේ හිරේ බවත් ගලගොඩ අත්තේ ඥනසාර හිමියෝ පවසති.

ඔවුන්ට පාස්කු ප්‍රහාරය ගැන කතාකිරීමට සදාචාරාත්මක අයිතියක් නැති බවත්, මෙරට මෙවැනි ලේ වැගිරීමක් සිදුවන බවට භික්ෂුන් වහන්සේලා ලෙස පොදු මනුෂ්‍යයන් ගැන සිතා හෙළිදරව් කිරීම් සියල්ල සිදු කළ බවත් උන්වහන්සේ පවසති.

2014 ජුනි මස 20 වැනිදා දික්වැල්ල ප්‍රදේශයේ සංචාරක පුරවරයේ දී මුස්ලිම් භක්තික ෂෙයික්වරයකු තමන්වහන්සේ හමුවී රට තුළ ඇතිවී තිබෙන ඉස්ලාම් අන්තවාදී කල්ලි කණ්ඩායම් ආසියාවේ භයානකම අත්හදා බැලීමට යොදාගෙන ඇත්තේ ශ්‍රී ලංකාව බව හෙළිකළ බවත් පවසන උන්වහන්සේ, මෙය ආරක්ෂක ලේකම්වරයාට පවසන ලෙස තමන්වහන්සේට පැවසූ බවද සඳහන් කරති.

ඒ අනුව අදාළ කරුණු නිවැරදිව වාර්තා කළ බවද, ලංකාවේ ප්‍රධාන මරුමස්ථාන කේන්ද්‍රකර ප්‍රහාරයක් දියත්කර ජනයා දාහක් දෙදාහක් මරාදමා ගම්මාන 50ක ජනතාව කපාකොටා දැමීමට ඔවුන් සූදානම් වන බවද එම ෂෙයික්වරයා එදා පැවසූ බවද උන්වහන්සේ පවසති.

එදා මහින්ද රාජපක්ෂ ආණ්ඩුව සමයේ ආරක්ෂක ලේකම්ව සිටි ගෝඨාභය රාජපක්ෂ මහතාට මේ බව දැන්වූ පසු ඔහු එයට අදාළ පියවර ගත් බවද උන්වහන්සේ පවසති.

කෙසේවුවද, අවසානයේ තමන්වහන්සේලා හෙළිදරව් කළ සියලු අන්තවාදී කල්ලි කණ්ඩායම් ගොස් හැංගුනේ ජනතා විමුක්ති පෙරමුණ සහ යහපාලන ආණ්ඩුව ගේන්න වැඩකළ බලවේග ඇතුළේ බව ද ඥනසාර හිමියෝ හෙළිදරව් කරති.

වීඩියෝව නරඹන්න...