පාර්ලිමේන්තුවේදී මම කළ ප්‍රකාශය විවේචනය කරමින් නිවේදනයක් නිකුත් කළ විනිසුරු දෙදෙනා වරප්‍රසාද කමිටුවට කැඳවන්න-ඇමති විජේදස කතානායකගෙන් ඉල්ලයි

Jun 26, 2024 at 09:32 AM

|

Lanka Leader

පසුගිය 24 වනදා පාර්ලිමේන්තුවේ විවාදයක් අතරතුර අධිකරණ ඇමැති ජනාධිපති නීතිඥ ආචාර්ය විජයදාස රාජපක්ෂ  මහතා විසින් අධිකරණ පද්ධතිය විවේචනයට ලක්කරමින් සිදු කරන ලද ප්‍රකාශය සම්බන්ධයෙන් කරුණු දක්වමින් ප්‍රකාශයක් නිකුත් කළ විනිසුරුවරුන් දෙදෙනා පාර්ලිමේන්තු ආචාරධර්ම සහ වරප්‍රසාද පිළිබඳ කාරක සභාවට කැඳවා විමර්ශනයක් සිදුකොට සුදුසු නියෝගයක් නිකුත් කරන ලෙස ඊයේ (25දා)  විජයදාස රාජපක්ෂ  මහතා කථානායක මහින්ද යාපා අබේවර්ධන මහතාගෙන් ලිඛිත ඉල්ලීමක් කර තිබේ.

එම ලිපිය මගින් 2010 සැප්තැම්බර් 1 වැනිදා අධිකරණ සේවා කොමිෂන් සභාව නිකුත් කළ චක්‍රලේඛයට අනුව දිසා විනිසුරුවරු හා මහෙස්ත්‍රාත්වරු ප්‍රසිද්ධ ප්‍රකාශ කිරීම් කළහොත් විනයානුකූල පියවර ගත හැකි බව සඳහන්ව ඇති බවද ඇමැතිවරයා පෙන්වා දී තිබේ.

අධිකරණ සේවා සංගමයේ  සභාපති කෑගල්ල දිසා විනිසුරු රුවන් දිසානායක සහ මහලේකම් ගාල්ල මහෙස්ත්‍රාත් ඉසුරු නෙත්තිකුමාරගේ යන මහත්වරුන්ගේ අත්සනින් යුතුව නිකුත් කළ නිවේදනය සම්බන්ධයෙන් අධිකරණ ඇමතිවරයා මෙලෙස කතානායකවරයා දැනුවත් කර තිබේ.

අදාල නිවේදනය මගින්, සමස්ත අධිකරණ පද්ධතියටම බලපෑම් වන පරිදි අධිකරණ ඇමැතිවරයා ඉදිරිපත් කරන විවේචනයන් අසත්‍යයෙන් සත්‍ය වෙන් කර නොගෙන කරන ඉදිරිපත් කර ඇති බව පවසයි. එලෙසම දේශපාලන වශයෙන් තමන්ගේ පැවැත්ම අභියෝගයට ලක් කරන නඩුකරයන්වලදී අධිකරණයෙන් නීතියට අනුකූලව නිකුත් කළ තීන්දු හා නියෝගවලින් අතෘප්තියට පත්වීම මතම සැලසුම් සහගතව අධිකරණ ඇමතිවරයා කරුණු දක්වා ඇති බවද එම ලිපිය මගින් අධිකරණ සේවා සංගමය පවසයි.