හමුදාවේ ඉහළම නිලධාරියෙක් අරගලයට වෙඩි තියන බව කළින්ම දැනුම් දුන්නා... සුදු ලෝගුවට අරගයේදී වෙනම බලයක් අපි හැදුවා - අරගල නායකයකු කියයි (වීඩියෝ)

Jun 5, 2024 at 02:14 PM

|

Lanka Leader

අරගලය ගාළු මුවදොර ක්‍රියාත්මක වෙද්දී එයට සමාන්තරව තවත් වැඩපිළිවෙළවල් රාශියක් ක්‍රියාත්මක වූ බවත්, ඉන් එකක් වන්නේ තානාපති කාර්යාල සමග සම්බන්ධීකරණය වීම බවත්, ගෝඨාභය රාජපක්ෂ අරගලය විසුරුවා හැරීමට මිලිටරි බලය යොදවා නොගත් බව බොහෝ දෙනෙකු පැවසූව ද අරගලයට වෙඩි තැබීමට ඔහු උත්සාහ දැරූ බවත් අරගලයේ ක්‍රියාකාරිකයකු වූ ෂෙහාන් මාලක මහතා පවසයි.

අන්තර්ජාල නාලිකාවක් සමඟ සාකච්ඡාවකට එක්වෙමින් ඔහු සඳහන් කරන්නේ මැයි 9 වන දා රාත්‍රියේ රටේ ඉහළම තනතුරක සිටින හමුදා නිලධාරියකු තමන්ට දුරකථනයෙන් අමතා තමන් දන්නා අය සිටී නම් අරලියගහ මන්දිරය අසලින් ඉවත්කරගන්නා ලෙසත්, තවත් විනාඩි 10කින් වෙඩි තබන බව එම නිලධාරියා පැවසූ බවත්ය. (වීඩියෝවේ 24 - 25 මිනිත්තු බලන්න.)

එම අවස්ථාවේ තමන් ඇතුළු කණ්ඩායමක් එහි ගිය බවද, ඒ මොහොතේ එම ස්ථානයේ වෙඩි තැබීම් සිදුවූ බවද ඔහු සඳහන් කරයි.

අරගලකරුවන් ඒ අවස්ථාවේ දී ඉදිරියටම ගියා නම් අරගලය විසඳෙන්නේ මේ ආකාරයෙන් නොවන බවත් ඔහු සඳහන් කරයි.

ඕමල්පේ සෝභිත හිමියන් මෙන්ම කාදිනල් හිමියන් ද ඕනෑම මොහොතක අරගලයේ සහායට පැමිණීමට එම අවස්ථාවේ ඉදිරිපත්ව සිටි බවත්, ඒ වන විටත් කතෝලික හිමිවරුන් ඇතුළු භික්ෂූන් වහන්සේලා කණ්ඩායමක් අරගල භූමියේ සිටි බව හා රනිල් වික්‍රමසිංහ මහතාගේ නිවස ගිණිතබන මොහොතේ කන්‍යා සොහොයුරියන් හා පියතුමන්ලා එය වැළැක්වීමට පැමිණි බවත් ඔහු පවසයි. (වීඩියෝවේ 37 - 38 මිනිත්තු බලන්න.)

ජනාධිපති ලේකම් කාර්යාලය හා ජනාධිපති මන්දිරයේ කාමර සියල්ලටම කන්‍යා සොහොයුරියන් පියතුමන්ලා විසින් පිරවූ බවද, ජනාධිපතිවරයා අද වාඩිවි සිටින ජනාදිපති පුටුව ආරක්ෂාකර දුන්නේ ද අරගලකරුවන් වටා  ඒකරාශි වූ පිරිස් බවද ඔහු වැඩිදුරටත් සඳහන් කරයි.

ගෝල්ෆේස් අරගලයේ දී කතෝලික පියතුමන්ලා සහ කන්‍යා සොහොයුරියන් දැවැන්ත මෙහෙයක් ඉටුකළ බවත් පවසන ඔහු, මෙම අරගලයේ දී සුදු ලෝගුවට වෙනම බලයක් නිර්මාණය කළ බවත් සඳහන් කරයි. (වීඩියෝවේ 39 - 40 මිනිත්තු බලන්න.)

වීඩියෝව නරඹන්න...