පුටින් සහ ෂී බෙයිජිංහිදී හමුවෙයි

May 16, 2024 at 10:00 AM

|

Lanka Leader

රුසියානු ජනාධිපති ව්ලැඩිමීර් පුටින් අද(16) සිය රාජ්‍ය සංචාරය අතරතුර බීජිං හිදී චීන ජනාධිපති ෂී ජින්පින් හමුවී ඇති බව විදෙස් මාධ්‍ය පවසයි. මෙම මස මුලදී පුටින් රුසියානු ජනාධිපතිවරයා ලෙස පස්වන වරටත් දිවුරුම් දීමෙන් පසු පළමු විදේශ සංචාරය මෙම චීන සංචාරය බවද පැවසේ.

දෙරටෙහි නායක දෙපළ තියනන්මෙන් චතුරශ්‍රයේ මහජන මහා ශාලාවෙන් පිටතදි එකිනෙකා හමුවී දෙරටේ ජාතික ගී ගායනා කරන හමුදා වාද්‍ය වෘන්දයකට සවන් දුන්හ. පසුව ඔවුන් ඡායාරූපවලට පෙනී සිට දෙරටෙහි නියෝජිත පිරිස අතර හමුවක් සඳහා පිටත්ව ගියහ.

රුසියානු ජනාධිපති පුටින් සමඟ රාජ්‍ය අමාත්‍යවරුන් කිහිප දෙනෙකු ද චීන සංචාරයට එක්ව සිටින අතර, ඔවුන් ද්විපාර්ශ්වික සබඳතා තීවර කිරීම අරමුණු කරගත් ඒකාබද්ධ ව්‍යාපෘති පිළිබඳ සාකච්ඡා සඳහා සහභාගී වනු ඇත.

සංචාරයට පෙර ෂින්හුවා පුවත් සේවය සමඟ සම්මුඛ සාකච්ඡාවක් අතර තුර පුටින්, දෙරට අතර වැඩී තිබෙන “පෙර නොවූ විරූ මට්ටමේ උපායමාර්ගික හවුල්කාරිත්වය” අගය කළේය.

යුක්රේන ගැටුම සම්බන්ධයෙන් රුසියාව සහ චීනය සමාන ආස්ථානයන් දැරීමද විශේෂත්වයකි. ෂින්හුවා පුවත් සේවය වෙත අදහස් දක්වමින් පුටින්, “යුක්‍රේන ගැටුමෙහි තිබෙන මූල හේතු සහ ගෝලීය භූ දේශපාලනික වැදගත්කම” අවබෝධ කර ගැනීම සම්බන්ධයෙන් බීජිනයට ප්‍රශංසා කළේය. යුක්‍රේනය සහ රුසියාව අතර පැන නැගී ඇති ආතතීන් සම්බන්ධයෙන් රුසියාවට දොස් පැවරීම චීනය ප්‍රතික්ෂේප කර ඇති අතර ඒ වෙනුවට නේටෝවේ සහ වොෂින්ටනයේ “සීතල යුද මානසිකත්වය” ප්‍රසාරනය කිරීම හෙළා දැක තිබේ.

රුසියාව සහ යුක්රේනය අතර සටන පසුගිය පෙබරවාරියේදී තෙවැනි වසරට අවතීර්ණ වූ අතර, කියෙව් පරිපාලනයට බටහිර ආධාරකරුවන් මුදල් හා ආයුධවලින් "යුද ගැටුම තිබෙන  තාක්" සහාය දෙන බවට අලුත් ප්‍රතිඥා දී තිබේ. 

ඒ අතරම, ඉන්දු-පැසිෆික් කලාපයේ සහ වෙනත් තැන්වල චීනය සහ එක්සත් ජනපදය අතර යුද ආතතීන් වර්ධනය වෙමින් පවතී.

Putin and Xi meet in Beijing