රටේ ජනගහණයෙන් මිලියන 12.3ක් අවදානම් ආර්ථික මට්ටමක

Oct 5, 2023 at 08:55 AM

|

Lanka Leader

මෙරට ජනගහණයෙන් මිලියන 12.3ක පිරිසක් අවදානම් ආර්ථික මට්ටමට ළඟා වී ඇති බව පාර්ලිමේන්තුවේ ක්‍රම සහ විධි කාරක සභාවේදී අනාවරණය වී ඇත.

එක්සත් ජාතීන්ගේ සංවර්ධන වැඩසටහන මඟින් 2022-23 වර්ෂ සඳහා නිකුත් කර ඇති ජාතික පුරවැසි සමීක්ෂණය නම් වූ බහුමාන අවදානම් දර්ශකය මත පදනම් වූ ප්‍රතිපත්ති වාර්තාවේ මේ පිළිබඳ දැක්වෙන බව වාර්තා වේ.

පාර්ලිමේන්තුවේ ක්‍රම සහ විධි කාරක සභාව, එහි සභාපති පාර්ලිමේන්තු මන්ත්‍රී පාඨලි චම්පික රණවක මහතාගේ ප්‍රධානත්වයෙන් ඊයේ (04) පාර්ලිමේන්තු පරිශ්‍රයේ දී රැස්වුණි.

එහිදි එක්සත් ජාතීන්ගේ සංවර්ධන වැඩසටහන මඟින් 2022-23 වර්ෂ සඳහා නිකුත් කර ඇති ජාතික පුරවැසි සමීක්ෂණය නම් වූ බහුමාන අවදානම් දර්ශකය මත පදනම් වූ ප්‍රතිපත්ති වාර්තාව පිළිබඳව අවධානය යොමුව තිබේ.

අදාළ වාර්තාවට අනුව මෙරට සෑම පුද්ගලයන් 10 දෙනෙකුගෙන් 6 දෙනෙක්ම අවදානම් ආර්ථික මට්ටමට ළඟා වී ඇති අතර එය ප්‍රතිශතයක් ලෙස සියයට 55.7ක් බව සඳහන්ය.  

ග්‍රාමීය ප්‍රදේශවල මෙය 82% ක් තරම් ඉහළ තත්ත්වයක පවතින බව වාර්තා වේ.

පුත්තලම දිස්ත්‍රික්කය අවදානම වැඩිම ප්‍රදේශය වන අතර එය ප්‍රතිශතයක් ලෙස සියයට 71.8කි.

එම වාර්තාවට අනුව මෙම තත්ත්වයට පාස්කු ඉරිදා ත්‍රස්ත ප්‍රහාරය, කොවිඩ් වසංගතය, ආර්ථික අර්බුදය, අයවැය හිඟය, ගෙවුම් ශේෂ අර්බුදය, ණය බැඳියාව යන කාරණා හේතු වී තිබේ.

මේ වන විට මෙරට තුළ පුද්ගලයන් 10 දෙනෙකුගෙන් 6 දෙනෙකු අවදානම් කලාපයෙ සිටින බවත්, අවුරුද්දක් ගත වන විට මේ තත්ත්වය පුද්ගලයන් 10 දෙනෙකුගෙන් 8 දෙනෙකු දක්වා වර්ධනය විය හැකි බවත් පාඨලි චම්පික ර‍ණවක මහතා එහිදි පෙන්වා දී ඇති බව සඳහන්ය.