මහින්ද රාජපක්ෂට පුවත්පත් නිවේදන දමා තමා කරන මහා අපරාධයෙන් ගැලවෙන්න බැහැ - ජාතික සංවිධාන කියයි

May 13, 2024 at 10:18 AM

|

Lanka Leader

ජනාධිපතිවරණයට පසුව නැවත රජයක් යටතේ තීන්දු කරන තෙක් පුද්ගලීකරණ ක්‍රියාවලිය අත්හිටුවන ලෙස ජනාධිපතිවරයාගෙන් ඉල්ලා සිටිමින් මහින්ද රාජපක්ෂ හිටපු ජනාධිපතිවරයා විසින් නිකුත් කළ පුවත්පත් නිවේදනය පිළිබදව ලංකා ලීඩර් ජාතික සංවිධානවල මතය විමසන ලදී. 

මේ වසන්ත බණ්ඩාර මහතාගේ මතය ඔහුගේ වචනයෙන්,

"දැන් සිදුවෙමින් පවතින ශ්‍රී ලංකාවේ ඉතිහාසය අවසන් කිරීමේ මහා පාවාදීමේ පාප කර්මයට පළමු වගඋත්තරකාරයා වන්නේ මහින්ද රාජපක්ෂ. ඒ ආකාරයට ඔහුට යුද ජයග්‍රහණයේ ගෞරවය පාවාදීමට සිදුවීම ඉතිහාසයේ සරදමක්. ඔහු එසේ වගකිව යුත්තේ ඔහු පොහොට්ටුවේ නායකයා වීම නිසා පමණක් නොවේ. ඔහු තමාගේ කුරුණෑගල සහ කළුතර පාප මිත්‍රයන්ගේ කුමන්ත්‍රණවල ගොදුරක් වෙලා මැයි 9 ප්‍රහාරය මගින් මන්ත්‍රීවරුන්ගේ ගෙවල් ගිනිතියන්න බලපත්‍රය ලබාදුන්නා. ඒ මගින් තමයි පොහොට්ටුවේ මන්ත්‍රීවරු රනිල් වික්‍රමසිංහ ළඟ දණගස්වන්න පළමු වටයේදීම හැකිවන්නේ. 

ඊට අමතරව ඔහු බැසිල් රාජපක්ෂ සහ පී.බී. ජයසුන්දර කියන දේශපාලන සහ ආර්ථික ඝාතකයන්ට යටත් වුණා. ගෝඨාභයත් ඊට ගොදුරු කළා. ඒ සියල්ලටම වඩා පියා විසින් දුව දූෂණය කිරීම මහා අපරාධයක්. ඔහු දැන් යුද ජයග්‍රණය පවාදීම සඳහා ගෙන එන මහා පවාදීමේ පනත ලෙස හැඳින්විය හැකි සත්‍ය සෙවීමේ කොමිසම පනත ගේන්න ඉඩදීල නිහඬව බලා සිටිනවා. එය පාවාදීම් අතරින් උච්චතම පාවාදීමයි. 

ඒ නිසා රනිල් වික්‍රමසිංහ ජනවරමක් නැතුව ඔහුගේ කරේ නැගලා පාවාදීමේ මාවත දිගේ ඔහුව දක්කගෙන යනකොට හීන් කෙඳිරියක් නගලා නිවේදන නිකුත් කළාට වැඩක් නැහැ. ඒවා රැවටිලිකාර නිවට නියාළු වැඩ. 

ඊළඟට දෙවැනි වගඋත්තරකරු ගෝඨාභය රාජපක්ෂ. තමාට ලැබුණු ජනවරම ඔහු රනිල් වික්‍රමසිංහගේ පාවඩයක් බවට පත්කළා. එසේ ජනවරම පාවාදුන්නේ ජුලි චන්ග්ලාට බය වෙලා. ඔහු බැසිල්ගෙ ලණු කාලා විමල්ලා, ගම්මන්පිලලා එළියට දාල කුමන්ත්‍රණකාරයන්ට අවශ්‍ය විදිහට පළමු වටයේදීම ආර්ථික අර්බුදය මත දේශපාලන අර්බුදයක් නිර්මාණය කළා.

බැසිල් රාජපක්ෂ තමයි තුන්වැනි වගඋත්තරකරු. රනිල් වික්‍රමසිංහ හතර වැනියා වෙන්නේ ඔහු මේ අපරාධය මේ රටට කරන්න සසර පුරා ප්‍රාර්ථනා කළ අයෙක් බව ඉතා පැහැදිලි නිසා. ශ්‍රී ලංකාවේ ඉතිහාසය සහ සම්බුද්ධ ශාසනය අවසන් කළාට පසු තමයි ඔහුගේ සංසාර ගමන අවසන් වෙන්නේ."