ජවිපෙ දිනන බවට ඉන්දියාවෙන් කිසි සමීක්‍ෂණයක් කර නෑ - උදය ගම්මන්පිල

Apr 4, 2024 at 07:33 AM

|

Lanka Leader

ඉදිරි මැතිවරණයකදී ජාතික ජන බල වේගය ඉදිරියෙන් සිටින බවට ඉන්දියානු සමීක්ෂණයකින් හෙළි වූ බවට සිදු කරන ප‍්‍රකාශ අසත්‍ය බව පිවිතුරු හෙල උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා සඳහන් කරයි.

එවන් සමීක්ෂණයක් සිදු කර ඇත්නම් ඒ කවුදැයි ප්‍රසිද්ධියට පත්කරන ලෙසද ඔහු ඉල්ලා සිටියේය.

කොළඹ එම පක්‍ෂ කාර්යලයේ පැවති මාධ්‍ය හමුවක් අමතමින් මන්ත්‍රීවරයා මෙම අදහස් පළ කරන ලදී.

"ජනතා විමුක්ති පෙරමුණ එහෙම කියන පදනම කුමක්ද කියලා දැනගන්න ආසයි. ඒගොල්ලො පසුගිය ජනාධිපතිවරණයේදී ගෝල්පේස් පිට්ටනියත් පිරෙව්වා. එහෙම පිරෙව්වත් ලැබුණේ 3% තුනයි. අඩුම ගානේ කිසිම කෙනෙක් මේ දක්වා විද්‍යාත්මකව කළ ජනමත සමීක්ෂණයකින් එහෙම දෙයක් හෙළිදරව් කරලා නෑ.

දැන් කවුද ඔය ඉන්දියානු සමීක්ෂණය කළා කියන්නේ. කවුද ඒක දැක්කේ? ජනතා විමුක්ති පෙරමුණ ඕක දැක්කනම් ඕක හරි වටිනා දෙයක්නේ. එහෙනම් ඒක වහාම ප්‍රසිද්ධ කරන එකයි කළ යුත්තේ. මේ රටේ ජනතාව බත් වෙනුවට කන්නේ තණකොළ කියලා හිතාගෙන සමහරු හිතලු විදිහට කියන දේවල් ඔය. ඔහොම විද්‍යාත්මක සමීක්ෂණයක් මම නම් දැකලා නැහැ. අනුර කුමාර මැතිතුමා ගාව තියෙනවා නම් කරුණාකරලා ප්‍රසිද්ධ කරන්න.

ජවිපෙ නටවන ඕනෑම රාජ්‍යයක් ස්වාධීන මත විමසුමක් කරලා තියෙනවා නම් ඒක ප්‍රසිද්ධ කරන්න.

ජනතා විමුක්ති පෙරමුණ යම් රැල්ලක් හදාගත්තත් ඉන්දියානු සංචාරයෙන් අමූල් සමාගම සම්බන්ධ තමන්ගේ දෙබිඩ පිළිවෙත හෙළිදරව් කිරීමෙන් එක වතාවක් වලේ වැටුණා. ඒ වලින් ගොඩ යන්නත් කලින් කැනඩාවෙ ගිහිල්ලා කොටි බෙදුම්වාදීන් සමඟ පෙනී ඉඳලා පෙරටත් වඩා ගැඹුරු වලක වැටුණා. දැන් ජවිපේ ගොඩ එන්නේ කොහොමද කියලයි කල්පනා කරන්නේ. කැනඩා සංචාරයට කලින් කරපු ජනමත විචාර නම් දැන් කොහොමත් වලංගු නෑ. මේ සංචාර දෙක හරහා ජනතා විමුක්ති පෙරමුණ ගොඩ ගත නොහැකි වලක ඇද දමා තිබෙනවා."

– Media unit