රාජ්‍ය දේපළ විකිණීමට නගර වැසියෝ එරෙහි වෙති

Apr 4, 2024 at 08:23 AM

|

Lanka Leader

ජනතාවට අයිති සේවා සපයන හෝ වානිජමය රාජ්‍ය ආයතන විකිනිණීමේදි හා අන්සතු කිරිමේදි ඒ සදහා ආන්ඩුක්‍රම ව්‍යවස්ථාවට අනුව ජනතා නියෝජිතයන්ගේ අනුමැතිය ලබාගත යුතු බවත්, සදාචාර විරෝධී ලෙස  රජයේ විධායක ඒකකයක් වන කැබිනට් මණ්ඩල අනුමැතියෙන් පමණක් පොදු දේපළ බැහැර කිරීම ජනතා පරමාධිපත්‍ය බලය  පාවාදීමක් හා ජනතා පරමාධිපත්‍යය අවතක්සේරු කිරීමක් වනබවත්, එම ක්‍රියාව ව්‍යවස්ථා විරෝධී වන බවත් අර්බන් සිටිසන් සංවිධානය පවසයි.

රාජ්‍ය දේපළ විකිණීමට එරෙහිව මුදල් රාජ්‍ය අමාත්‍ය රංජිත් සියඹලාපිටිය මහතා වෙත ලිපියක් යොමුකරමින් එම සංවිධානයේ සභාපතිනි ශර්මිලා ගෝනවෙල මහත්මිය පෙන්වා දෙන්නේ මෙසේ රාජ්‍ය ආයතන හා සම්පත් විකිණීමට වත්මන් ආන්ඩුවට ජනතා වරමක් ලැබි නොමැති බවයි.

අදාළ ලිපිය පහළින්...

ගරු රංජිත් සියඹලාපිටිය පා.ම
මුදල් රාජ්‍ය අමාත්‍ය,
මුදල් අමාත්‍යාංශ, 
කොළඹ 1.

ගරු ඇමති තුමනි,

අපගේ නියෝජිතයන් ලෙස පත්වන ඔබට අපගේ පැවැත්ම, නිදහස, සංවර්ධනය, මූලික අයිතිවාසිකම් ආරක්ෂා කිරීමටත්  ජනතාවට උපරිම ප්‍රතිලාභ ලැබෙන ආකාරයට පොදු දේපල පවත්වාගෙන යෑමට හා සංවර්ධනය කිරීමේ වගකීම  පැවරෙනවා ඇත.

ජනතාවගේ ඡන්දයෙන් පත්වන  ජනතා නියෝජිතයන් පෙරලා ජනතාවට වගකීමට බැඳී  සිටින ඇති අතර පාරදුෂ්‍ය භාවයෙන්  පරිපාලන කටයුතුවල නියැලීමේ මූලික ගුණාංගය රැකිම ඔබගේ යුතුකමක් වන බවත් එසේ විය යුතු බවට අපේක්ෂා කිරීම ජනතාවට ඇති අයිතිවාසි කමක්ද වේ, 

ව්‍යවස්ථාවෙන් සහතික කර දී තිබෙන ජනතා පරමාදිපත්‍ය ආරක්ෂා කිරීම ඔබගේ පරම වගකීම වුනද මෑතක සිට අවාසනාවන්ත ලෙස ජනතා නියෝජිතයින් හා අමාත්‍යාංශ ලේකම්වරුන් ඇතුළු ඉහළ නිලධාරීන් මෙම වගකීම ඉටු නොකොට සිතූමතේ රටට බලපාන  තීරණ ගැනිම කනගාටු දායකය.

පොදු දේපළ, රාජ්‍ය ව්‍යාපාර පිහිටුවන්නේද නඩත්තු කරන්නේද  හා පවත්වාගෙන යන්නේද භාණ්ඩාගාරයේ ඒකාබද්ධ අරමුදලින් වන අතර ඒ සඳහා මහජන මුදල් යොදවන්නේ රාජ්‍ය මුදල් දෙපාර්තමේන්තුවෙන් වන බැවින් මෙම දේපල සියල්ලෙහි  හිමිකාරීත්වය ඇත්තේ  මහජනතාවටය.

ආන්ඩුවේ ප්‍රතිපත්ති  තීරණය කිරීමේ බලය කැබිනට් මන්ඩලයටද බදු පැනවීමේ හා මුල්‍ය පාලනය පාර්ලිමේන්තුවටද සතු වුනත් අතිගරු ජනාධිපති , කැබිනට් මන්ඩලය,පාර්ලිමේන්තු මන්ත්‍රීවරුන් හා  අමාත්‍යාංශ ලේකම්වරු තම බලය භාවිතා කළ යුත්තේ ජනතා සුභ සිද්ධිය පිනිස ආන්ඩුක්‍රම ව්‍යවස්ථාවට අනුව  පමණි. ඊට හේතුව ඔවුන් සියලු දෙනා විසින් මෙම බලය දරා සිටින්නේ ජනතාව වෙනුවෙන් දරන භාරයක් ලෙස පමනි.

එමනිසා ජනතාවට අයිති සේවා සපයන හෝ වානිජමය රාජ්‍ය ආයතන විකිනිමේදි හා අන්සතු කිරිමේදි ඒ සදහා ආන්ඩුක්‍රම ව්‍යවස්ථාවට අනුව  ජනතා නියෝජිතයන්ගේ අනුමැතිය ලබාගත යුතුය.

සදාචාර විරෝධී ලෙස  රජයේ විධායක ඒකකයක් වන කැබිනට් මණ්ඩල අනුමැතියෙන් පමණක් පොදු දේපල බැහැර කිරීම ජනතා පරමාධිපත්‍ය බලය  පාවාදීමක් හා ජනතා පරමාධිපත්‍යය අවතක්සේරු කිරීමක් වනබවත් එම ක්‍රියාව වියවස්තා විරෝධී වන බවත් පෙන්වාදීමට කැමැත්තෙමු.

ප්‍රතිව්‍යුහගත කිරිමේ මුවාවෙන් සම්පුර්ණයෙන්ම රජයේ අයිතියෙන් බැහැර කිරිමට සැලසුම් කර ඇති දේපලවල අයිතිය පාර්ලිමේන්තුවේ‍ අනුමැතියකින් තොරව විකිණීමට ගෙන ඇති පියවර සම්බන්යෙන් විරුද්ධ නොවි නිහඩව සිටිම මගින් ඔබ සියලු දෙනාම ජනතා පරමාදිපත්‍යට සහා ජනතා අපේක්ෂාවට පිටුපා තිබෙන බව අපගේ මතයයි.

මෙසේ රාජ්‍ය ආයතන හා සම්පත් විකිණීමට වත්මන් ආන්ඩුවට ජනතා වරමක් ලැබි නොමැති බව අවධාරණය කර සිටිමු.

රාජ්‍ය මුල්‍ය අරමුදල (IMF) විසින්ද නිර්දේශය කර ඇත්තේ ප්‍රතිව්‍යුහගත කිරිමට මිස විකිණීමට නොවන බව මෙහිලා සදහන් කරන අතර රාජ්‍ය වියාපාර බිද වැටිමට හේතුවි ඇත්තේ අප පාලකයන් විසින් දක්ෂතාවය හෝ සුදුසුකම් මත පත්වීම් ලබා නොදීමත්  දූෂණය,නාස්තිය අකාර්යක්ෂමතාවය අවම කරමින්  ආයතනයේ  උන්නතිය උදෙසා තීරණ නොගැනීම, දේශපාලන හිතවත්කම් මත අධික සේවකයෙන් බඳවා ගැනීම වැනි කරුණු නිසා බව  රාජ්‍ය මූල්‍ය ආයතනය විසින් ශ්‍රි ලංකාව සම්බන්දයෙන් නිකුත් කර ඇති තාක්ෂණික වාර්තාවේ සදහන් කර ඇත.

තව දුරටත් IMF නිර්දේශ මගින් පෙන්වා දි ඇත්තේ  රජය සතු වියවස්තාපිත ආයතනයන් නිසි පාලන ක්‍රමවේදයන් අනුව පවත්වාගෙන යෑම සහා පාර්ලිමේන්තු කෝප් කමිටුවට වග වීමට යටත් කිරීම සදහා රාජ්‍ය ආයතන ප්‍රතිව්‍යුහගත කරනය සදහා නව පනතක් ගෙන එන ලෙසය.

වර්තමාන ජනාධිපතිතුමන් පත්වීමෙන් අනතුරුව ගෙන එන ලද අතුරු අයවැයෙන් ව්‍යවස්ථාදායකය අවසර දී ඇත්තේ පාඩු ලබන ආයතන ප්‍රතිව්‍යුහ ගතකිරීමට කමිටුවක් පත් කිරීමට වන අතර 2022.08.31 රජය සතු ව්‍යවසායන් ප්‍රතිව්‍යුහගත කිරීමට ඒකකයක් ස්ථාපිත කිරීමට අනුමැතිය ලබාගෙන ඇත, පසුව 2022. 09.13  කමිටුවක් පත් කර ගැනීමට කැබිනට් අනුමැතිය ලබා ගන්නා ලදී.

ආණ්ඩුක්‍රම ව්‍යවස්ථාවේ 148 වන වගන්තියට පටහැනිව ආර්ථික ස්ථායීකරණ හා  ජාතික ප්‍රතිපත්ති අමාත්‍යාංශය මගින් ඉදිරිපත් කරනු ලබන කැබිනට් පත්‍රිකාවක් මෙම කමිටුවේ වගකීම් සඳහන් කරමින් එක් වගන්තියක් තුළින්  " ව්‍යාපාර SOE's ප්‍රමුඛතා පදනම මත ඉවත් කිරීමට හඳුනාගෙන ඇත " ලෙස සඳහන් කර ඇත. මෙම  " ඉවත් කිරීම " යන වචනය ඉතාමත් කූට ලෙස මෙම කැබිනට් පත්‍රිකාවට ඇතුළත් කර ඇත .

පාඩු ලබන ආයතන ප්‍රතිව්‍යුහකරණය කිරීමට යැයි පවසමින් රටේ ආරක්ෂාවට හා  ස්වෛරීත්වයට බලපාන ඇතැම් පොදු දේපොළද ශක්තිමත් රාජ්‍යයන්හි භූදේශපාලනික අවශ්‍යතාවයන් ඉටු කිරීම සදහා ලබාදෙමින් අප රටේ ස්වෛරීත්වය අනතුරේ නොදමන ලෙසත් වගකිවයුතු ජනතා නියෝජිතයකු ලෙස ව්‍යවස්ථාදායකයට පිටින් සිදුවන මෙම ක්‍රියාවලියට එරෙහි වන ලෙසත් ඔබගෙන් මෙසේ ඉල්ලා සිටිමු.

මෙයට
ශර්මිලා ගෝනවෙල 
සභාපති අර්බන් සිටිසන් සංවිධානය