ඒකීය ශ්‍රී ලංකාවක් තුළ සවිමත් ජාතික ව්‍යාපාරයක් බිහි කිරීමට ‘ජාතික උපදේශක සභාව’ එළිදකී

Mar 13, 2024 at 07:32 AM

|

Lanka Leader

සියලු ජාතික බලවේග ඒකරාශී කොට ඒකීය ශ්‍රී ලංකාවක් තුළ බුද්ධ ශාසනයේ සහ රටේ ඉදිරි පැවැත්ම උදෙසා සවිමත් ජාතික ව්‍යාපාරයක් බිහි කිරීමට ‘ජාතික උපදේශක සභාව’ නමින් ජාතික ව්‍යාපාරයක් සමස්ත ලංකා බෞද්ධ මහා සම්මේලනයේ මූලිකත්වයෙන් පිහිටුවන ලද අතර මෙහි හතර වන රැස්වීම පසුගිය මාර්තු 08 වැනිදා පවත්වන ලදී.

රටටත් බුද්ධ ශාසනයටත් ඇති අභියෝග ජය ගැනීම සඳහා මෙරට මහසඟරුවන දැනුවත් කර රාජ්‍ය පාලනයට අවශ්‍ය මඟපෙන්වීම සිදු කිරීමට සාමග්‍රී මහ සඟ සමුළුවක් පැවැත්වීමට තීරණය කළ බව මහාචාර්ය මැදගොඩ අභයතිස්ස හිමියෝ ප්‍රකාශ කළහ. රටට සහ බුදු දහමට ඇති එම අභියෝග ජය ගැනීම සඳහා මේ මහ සඟ සමුළුව හරහා රජයට යෝජනා ඉදිරිපත් කළ යුතු බව ද, එමගින් සකස් කරන වැඩපිළිවෙළ ඉදිරියේ මහ සඟ සමුළුව හරහා රටට ජනගත කරන බව ද උන්වහන්සේ පැවසූහ.

මහාචාර්ය මැදගොඩ අභයතිස්ස හිමියන් මේ බව පැවසුවේ සමස්ත ලංකා බෞද්ධ මහා සම්මේලනයේදී පසුගියදා රැස් වූ ජාතික උපදේශක සභා රැස්වීමේදීය.

ඕමාරේ කස්සප සහ බෙංගමුවේ නාලක හිමිවරුන් ප්‍රමුඛ මහා සංඝරත්නය ද සමස්ත ලංකා බෞද්ධ මහා සම්මේලනයේ සභාපති චන්ද්‍ර නිමල් වාකිෂ්ඨ මහතා ඇතුළු පැවිදි සහ ගිහි පිරිස් ද මෙහිදී අදහස් දැක්වූහ.

ඉන්දියාව සහ ශ්‍රී ලංකාව අත්සන් කිරීමට නියමිත එක්ටා ගිවිසුම මගින් ශ්‍රී ලංකාවට බලවත් ආර්ථික, සමාජ, සංස්කෘතික හා දේශපාලන ආරවුල් ඇති විය හැකි බවට මෙහිදී අදහස් පළ විය. ඒ පිළිබඳව විරෝධය දැක්වීම සඳහා අද (13දා) සිට 20 දා දක්වා සමස්ත ලංකා බෞද්ධ මහා සම්මේලන මූලස්ථාන පරිශ්‍රයේදී ජනතාවගේ අත්සන් ලබා ගැනීමටද නියමිතය.

මෙම ජාතික උපදේශක සභා රැස්වීමට වටිනාපහ සෝමානන්ද, අගුලුගල්ලේ සිරි ජිනානන්ද, කෝන්ගස්තැන්නේ ආනන්ද, වත්තේවැවේ ධම්මානන්ද සහ කොටහේනේ නාලක හිමිවරුන් ඇතුළු මහසඟරුවන වැඩම කර සිටියහ. සමස්ත ලංකා බෞද්ධ මහා සම්මේලනයේ සභාපති චන්ද්‍ර නිමල් වාකිෂ්ඨ, භාණ්ඩාගාරික වසන්ත ද සිල්වා, නැගෙනහිර පළාතේ හිටපු ආණ්ඩුකාර අනුරාධා යහම්පත් සහ මේජර් ජෙනරාල් විජිත් රවිප්‍රිය මහතා ඇතුළු මහත්ම මහත්මීහු ද සහභාගී වී සිටියහ.

- දිවයින -