පඩි වැඩි කරගත් හැටි ගැන මහ බැංකුව නිවේදනයකින් පහදයි

Feb 26, 2024 at 07:59 AM

|

Lanka Leader

ශ්‍රී ලංකා මහ බැංකු සේවකයන්ගේ වැටුප් වැඩි කිරීම ශ්‍රී ලංකා මහ බැංකු පාලක මණ්ඩලයේ අනුමැතිය සහිතව වෘත්තිය සමිති හා එළැඹ ඇති එකඟතා ගිවිසුමට අනුකූලව සිදුකර ඇති බව මහ බැංකුව නිවේදනයක් නිකුත් කරමින් සඳහන් කරයි.

මේ සම්බන්ධයෙන් කරුණු පැහැදිලි කිරීම සඳහා ලිඛිතව අවස්ථාව ඉල්ලන ලෙස පාලක මණ්ඩලය කළ දැනුම්දීම අනුව මුදල් අමාත්‍යවරයා ලෙස ද කටයුතු කරන ජනාධිපතිවරයා වෙත ඉකුත් 22 වැනිදා මහ බැංකු අධිපති ලිපියක් යොමු කළ බව අදාළ නිවේදනයේ දැක්වෙයි.

එම අවස්ථාව ලැබුණු පසු සුදුසු පාර්ලිමේන්තු කමිටුවක් ඔස්සේ පාර්ලිමේන්තු මන්ත්‍රීවරුන්ව දැනුවත් කිරීමට මහ බැංකුව සූදානමින් පසුවන බව එම නිවේදනයේ සඳහන් වේ.

මේ අතර මහ බැංකුවේ වැටුප් වැඩි කිරීමේ සිද්ධිය පිළිබඳ මුදල් රාජ්‍ය අමාත්‍ය ෂෙහාන් සේමසිංහ මහතා කරුණු දක්වමින් සඳහන් කර ඇත්තේ ශ්‍රී ලංකා මහ බැංකුව, මහජන මුදල් පිළිබඳ කාරක සභාවට කැඳවීමට යෝජනා කරන බවත්, එසේ කැඳවා අදාළ වැටුප් වර්ධක සම්බන්ධව මෑත කාලීනව ඇති වූ මතභේදාත්මක තත්ත්වයන් පිළිබඳ පැහැදිලි කිරීමක් ලබා ගැනීම සුදුසු බවත් ය.

කෙසේ වුවද, රාජ්‍ය අංශයේ පටි තදකිරීමට අදාළ නියෝගය නොතකා තුන් අවුරුදු වැටුප් සංශෝධනය යටතේ 29.53% සිට 79.97% දක්වා අනුපාතයකින් මහ බැංකු සේවකයන්ගේ වැටුප් සකස් කිරීම සම්බන්ධයෙන් මේ වන විට දැඩි විවේචනවලට හේතු වී තිබේ.

මහ බැංකු නියෝජ්‍ය අධිපතිවරයාගේ මාසික වැටුප රුපියල් 974,965ක සිට රුපියල් ලක්ෂ 17 දක්වා වන පරාසයකින් ඉහළ නංවා ඇති බවත් කාර්යාල කාර්ය සහායකයන්ගේ වැටුප් ද සැළකිව යුතු ලෙස ඉහළ නංවා ඇති බවත් සඳහන්ය.

කාර්යාල කාර්ය සහායකයකුගේ මුළු වැටුප මේ වනවිට ආරම්භක මට්ටමේ වෛද්‍යවරයකුගේ වැටුපට වඩා ඉහළ ගොස් ඇතැයි ආරංචි මාර්ග පවසයි.

මෙවැනි විශාල වැටුප් වැඩිවීමක් සිදුකිරීමට මුදල් මණ්ඩලය තීරණය කර තිබුණේ මේ වන විට රටේ බහුතරය ආර්ථික දුෂ්කරතාවලට මුහුණ දී සිටින පසුබිමක් මධ්‍යයේය.