තවත් IMF වැඩසටහනකට යන්න රජය සූදානම්.. මේ දිනවල එය සාකච්ඡා කරනවා.. - ජනපති

Oct 13, 2026 at 07:12 AM

|

Lanka Leader

ජාත්‍යන්තර මූල්‍ය අරමුදල (IMF) සමඟ දැනට ක්‍රියාත්මක වන වැඩසටහන මඟින් සාර්ථකව අත්පත් කරගත් ආර්ථික ස්ථායීතාව අඛණ්ඩව ආරක්ෂා කරගනිමින්, රටේ ඉදිරි ආර්ථික වර්ධනය තවදුරටත් වේගවත් කිරීම උදෙසා ඉදිරියේදී තවත් නව එකඟතාවකට එළඹීමට රජය සූදානම් බව ජනාධිපති අනුර කුමාර දිසානායක මහතා ප්‍රකාශ කළේය.

ජනාධිපතිවරයා මෙම අදහස් පළ කළේ 'ශ්‍රී ලංකා ආර්ථික සහ ආයෝජන සමුළුව' (Sri Lanka Economic and Investment Summit) අමතමිනි. 

එහිදී වැඩිදුරටත් අදහස් දැක්වූ ඒ මහතා පෙන්වා දුන්නේ, ජාත්‍යන්තර මූල්‍ය අරමුදලේ සිව්වසරක විස්තීර්ණ ණය පහසුකම් වැඩසටහනේ මූලික සහ ප්‍රධාන ඉලක්කය වූ ආර්ථිකය ස්ථාවර කරගැනීම මේ වන විට සෑම අතින්ම පාහේ සැලකිය යුතු මට්ටමකින් ළඟා කරගෙන ඇති බවයි. 

රජයේ මීළඟ සැලසුම සහ ප්‍රමුඛතාව වන්නේ එම ස්ථායීතාව තවදුරටත් සුරකිමින් රටට අත්‍යවශ්‍ය වන ආර්ථික වර්ධනය සාක්ෂාත් කර ගැනීම බව ද හෙතෙම පෙන්වා දුන්නේය.

රජය බලයට පත්වීමෙන් පසු අපේක්ෂා කළ අරමුණු සාක්ෂාත් කරගැනීමේ ක්‍රියාවලියේදී ජාත්‍යන්තර මූල්‍ය අරමුදලේ කොන්දේසි හා එකඟතා බාධාවක්වී ඇත්තේ ඉතා අල්ප වශයෙන් බව ජනාධිපතිවරයා මෙහිදී සිහිපත් කළේය. ආර්ථිකය ස්ථාවර කිරීම උදෙසා රජයේ දැක්ම සහ මූල්‍ය අරමුදලේ වැඩපිළිවෙළ අතර විශාල පරස්පරතාවක් හෝ ගැටුමක් නොතිබීම හේතුවෙන් මෙම වැඩසටහන කිසිදු බාධාවකින් තොරව ඉදිරියට මෙහෙයවීමට හැකියාව ලැබුණු බව ද ඔහු සඳහන් කළේය.

වත්මන් මූල්‍ය අරමුදල් වැඩසටහන අවසන් වීමට තවත් මාස හයක පමණ කාලයක් ඉතිරිව ඇති පසුබිමක් තුළ, මීළඟ අදියරේ වැඩසටහනේ ස්වභාවය සහ දිශානතිය කෙබඳු විය යුතුද යන්න පිළිබඳව මුදල් අමාත්‍යාංශය සහ ශ්‍රී ලංකා මහ බැංකු අධිපතිවරයා ඇතුළු ආර්ථික විශේෂඥ කණ්ඩායම සමඟ මේ වන විටත් පුළුල් සාකච්ඡා පවත්වමින් සිටින බව ජනාධිපතිවරයා ප්‍රකාශ කළේය. 

මූල්‍ය අරමුදල සම්පූර්ණයෙන්ම අත්හැර දැමීමක් හෝ එහි පවතින එකඟතාවලට පමණක් දැඩිව සීමා වීමක් වෙනුවෙන් රජය පෙනී නොසිටින අතර, මේ දෙස ඉතා විවෘත මනසකින් යුතුව බලමින් ඉදිරියේදී එල්ල විය හැකි බාහිර ආර්ථික කම්පනයන්ට සාර්ථකව ඔරොත්තු දිය හැකි ශක්තිමත් ආර්ථිකයක් නිර්මාණය කිරීමට අවශ්‍ය ඉදිරි තීන්දු තීරණ නිසි පරිදි ගන්නා බවද ජනාධිපති අනුර කුමාර දිසානායක මහතා වැඩිදුරටත් අවධාරණය කළේය.