පොදු දේපළ පනත යටතේ අත්අඩංගුවට ගන්නා අයට ඇප දෙන්න බැහැ.. ඒ බව දැනගෙනම අත්අඩංගුව ගැනීම් කරනවා.. නාමල් සමීක්ෂණයකින් ජනප්‍රියම පුද්ගලයා වෙලා හිටියේ.. - නීතිඥ සංජීව වීරවික්‍රමගෙන් හෙළිදරව්වක්

Oct 4, 2026 at 07:59 AM

|

Lanka Leader

පොදු දේපළ පනත යටතේ අත්අඩංගුවට ගෙන රඳවා තබාගන්නා පුද්ගලයන්ට ඇප ලබාදීම නොහැකි බවත්, විවිධ පුද්ගලයන් අත්අඩංගුවට ගැනීමේදී සැකකරුවන් ලෙස නම් නොකරමින් අත්අඩංගුවට ගැනීම් මේ වන විට සිදුවෙමින් පවතින බවත් නීතිඥ සංජීව වීරවික්‍රම මහතා පවසයි. 

සුරේෂ් සලේ, නාමල් රාජපක්ෂ, සුගීශ්වර බණ්ඩාර යන අයගේ අත්අඩංගුවට ගැසීම් දෙස බැලීමේ දී ද මෙම කරුණු අනාවරණය වන බවත් පවසන ඒ මහතා සුරේෂ් සලේ අත්අඩංගුවට ගෙන අධිකරණයට නොදා අපරාධ පරීක්ෂණ දෙපාර්තමේන්තුවේ රඳවාගෙන තිබූ බවත් සඳහන් කරයි.

නීතිය අනුව නම් පැය 48කට පෙර අධිකරණයට යොමුකිරීම සිදුවිය යුතු වුවත් මෙහිදී එසේ සිදුවී නැති බවත් ඒ මහතා පවසයි.

සුගීශ්වර බන්ඩාර අත්අඩංගුවට ගන්නා විටත් හිටපු ජනාධිපති ගෝඨාභය රාජපක්ෂ මතාගෙන් ඔහු වැටුප් දෙකක් ලබා තිබුනේද යන්න සම්බන්ධයෙන් සොයා බැලීමට ප්‍රකාශයක් ලබාගෙන නොතිබූ බවත් පවසන ඒ මහතා, නාමල් රාජපක්ෂ මහතාගේ අත්අඩංගුවට ගැනීම සම්බන්ධයෙන් ද කරුණු රැසක් අනාවරණය කරයි.

නාමල් රාජපක්ෂ මහතා අත්අඩංගුවට ගැනීමට කටයුතු කර ඇත්තේ රට පුරා මහත් ආන්දෝලනයක් ඇති කළ විශේෂ සමීක්ෂණ වාර්තාවක් එළිදැක්වීමෙන් පසුව බව ද නීතිඥ සංජීව වීරවික්‍රම මහතා පවසයි.

ජනමාධ්‍ය හමුවේ අදහස් දක්වමින් ඒ මහතා පෙන්වා දුන්නේ, අදාළ සමීක්ෂණ වාර්තාව හරහා රටේ දේශපාලනික වශයෙන් ජනප්‍රියම පුද්ගලයා සහ ඉදිරි 2029 ජනාධිපතිවරණයේ අපේක්ෂකත්වය සම්බන්ධයෙන් පැහැදිලි තොරතුරු අනාවරණය වී තිබූ බවයි. මෙම සමීක්ෂණ වාර්තාව එළිදැක්වීමත් සමඟ ඇති වූ දේශපාලන බලපෑම මත මෙම පියවර ගෙන ඇති බවට ඒ මහතා වැඩිදුරටත් චෝදනා කර සිටී.

වීඩියෝව නරඹන්න..