22 වැනි සංශෝධනය සම්මත කිරීමෙන් පසු ජනාධිපතිගේ පොරොන්දුවලට සහ ආණ්ඩුවට අත් වන ඉරණම ගැන අනාවරණයක්..

Sep 24, 2026 at 10:17 AM

|

Lanka Leader

22 වැනි ආණ්ඩුක්‍රම ව්‍යවස්ථා සංශෝධනය පාර්ලිමේන්තුවේදී තුනෙන් දෙකක බහුතර ඡන්දයෙන් සම්මත කරගැනීමට හැකි වීම ආණ්ඩුවේ ජයග්‍රහණයක් ලෙස සැලකිය හැකි වුවද, එමගින් ජනතාව මුහුණ දෙන සැබෑ ආර්ථික හෝ සමාජීය ගැටලුවලට විසඳුම් නොලැබෙන බව ජ්‍යෙෂ්ඨ මාධ්‍යවේදී ධර්මශ්‍රී කාරියවසම් මහතා පවසයි. 

ඔහු සිය Kaarige Channel Eka යූටියුබ් නාලිකාව ඔස්සේ පෙන්වා දෙන්නේ මැතිවරණ සමයක් නොවන වකවානුවක ජනාධිපතිවරයා රට පුරා යමින් ජනරැලී පැවැත්වීමට තීරණය කර ඇත්තේ ආණ්ඩුවේ සහ ජනාධිපතිවරයාගේ ජනප්‍රියතාවය පහත වැටීම නිසා බවයි.

එමෙන්ම ජනාධිපතිවරයා මෑතකදී කළ කතාවලදී විශ්වවිද්‍යාල 50 ක් තැනීම, වැව් 350 ක් සෑදීම, 4G කුළුණු 1000 ක් පිහිටුවීම සහ රාජ්‍ය සේවයට 21,000 ක් අලුතින් බඳවා ගැනීම වැනි ඉටු කිරීමට අපහසු මනෝලෝක පොරොන්දු ලබා දෙන බවටද ඔහු විවේචනය කරයි. 

විශේෂයෙන්ම විදුලි දුම්රිය පිළිබඳ සිහින මවනවාට වඩා පසුගිය ආපදා තත්ත්වයන් නිසා හානියට පත් වූ උඩරට දුම්රිය මාර්ගය යථා තත්ත්වයට පත් කිරීමත්, අමතර කොටස් නොමැතිකමින් ධාවනයෙන් ඉවත් කර ඇති දුම්රිය එන්ජින් අලුත්වැඩියා කිරීමත් වහා කළ යුතු බව ඔහු සඳහන් කරයි. 

ලෝක බැංකු දත්ත උපුටා දක්වමින් මෙරට ජනගහනයෙන් 16.5% ක් තවමත් දරිද්‍රතා සීමාවෙන් පහළ ජීවත් වන බවත්, ජනතාවගේ ආහාර වේල් පවා සීමා වී ඇති පසුබිමක ආණ්ඩුවේ ආර්ථික වැඩපිළිවෙල සාර්ථක එකක් නොවන බවත් කාරියවසම් මහතා අවධාරණය කරයි. 

ජනතාවට අවශ්‍ය වන්නේ සැබෑ ලෙසම රටේ ප්‍රශ්න විසඳන රාජ්‍යනායකයෙකු මිස, සියල්ල එක රැයකින් කළ හැකි බව කියන කල්පිත චරිතයක් නොවන බවත්, ජනාධිපති ලේකම් කාර්යාලයේ සිට මුළු රටම ඇමතීමේ හැකියාව තිබියදී මෙලෙස ජනරැලී පවත්වමින් පැලැස්තර විසඳුම් සෙවීමෙන් පලක් නොවන බවත් ඔහු වැඩිදුරටත් පෙන්වා දෙයි.