ගලගොඩඅත්තේ ඤාණසාර හිමියන් ජනාධිපති සමාව අහිමි වීම දක්වා ආ ගමන ගැන කියන කතාව..

Sep 22, 2026 at 05:33 PM

|

Lanka Leader

රටේ පවතින නීතියට ගරු කිරීම භික්ෂූන් වහන්සේලා ඇතුළු සෑම පුරවැසියෙකුගේම වගකීමක් බැවින් තමන් වහන්සේ නීතියට හිස නමන බවත්, තමන් සිදුකළ අරගලය කිසිදු පෞද්ගලික හෝ දේශපාලනික න්‍යායපත්‍රයක් වෙනුවෙන් නොව ජාතියේ හා ශාසනයේ සුරක්ෂිතභාවය වෙනුවෙන් සිදුකළ එකක් බවත් පූජ්‍ය ගලගොඩඅත්තේ ඤාණසාර හිමියෝ පැවසූහ.

උන්වහන්සේ මේ බව ප්‍රකාශ කළේ තමන් වහන්සේ විසින් රචනා කරන ලද ‘9.5 විකෘතිය - ගෝලීය ඉස්ලාම් අන්තවාදී තර්ජන හමුවේ ජාතියේ ඉරණම’ කෘතිය ජනගත කිරීමේ අවස්ථාවට එක්වෙමිනි.

පසුගිය දිනවල මතුවූ විවිධ නීතිමය තත්ත්වයන් සහ අවිනිශ්චිතතාවයන් මධ්‍යයේ වුවද මෙම කෘතිය එළිදැක්වීමට ලැබීම ඓතිහාසික අවස්ථාවක් ලෙස හඳුන්වා දුන් උන්වහන්සේ, තමන් සැමවිටම උත්සාහ කළේ මතුවෙමින් පැවති අන්තවාදී තර්ජනයන් පිළිබඳ සමාජය සහ බලධාරීන් දැනුවත් කරමින් අවිහිංසාවාදී බෞද්ධ සමාජය ආරක්ෂා කරගැනීමට බව අවධාරණය කළහ. තමන් වහන්සේ කිසිවිටෙකත් ජනාධිපති සමාවක් ඉල්ලා නොසිටි අතර, ජනාධිපති සමාව ලබාදීමේ ක්‍රියාවලියේදී පාලකයින් හෝ නිලධාරීන් අතින් යම් වරදක් සිදුවී ඇත්නම් ඒ වෙනුවෙන් තමන්ගෙන් පළිගැනීම සාධාරණ නොවන බවත්, වත්මන් ජනාධිපතිවරයා හෝ රජය සමඟ තමන්ගේ පෞද්ගලික විරෝධයක් නොමැති බවත් උන්වහන්සේ මෙහිදී පැහැදිලි කළහ.

එසේම පාස්කු ප්‍රහාරයට පෙර සිටම සහරාන් වැනි අන්තවාදීන්ගේ ක්‍රියාකාරකම් පිළිබඳව ආරක්ෂක අංශ සහ පාලකයින් දැනුවත් කිරීමට කටයුතු කළ බව මතක් කර දුන් උන්වහන්සේ, ‘එක් රටක් එක නීතියක්’ කාර්ය සාධක බලකාය හරහා රට පුරා දිස්ත්‍රික්ක 22ක සංචාරය කරමින් ඒ පිළිබඳ නිර්දේශ ඇතුළත් වාර්තාවක්ද සකස් කර ලබාදුන් බව පැවසූහ. අවසාන වශයෙන් අදහස් දැක්වූ උන්වහන්සේ සඳහන් කළේ, තමන් වහන්සේ මුහුණ දෙන මෙම තත්ත්වයන් සහ නීතිමය බාධාවන් නිසා අනාගතයේදී රට සහ ජාතිය වෙනුවෙන් පෙනී සිටීමට පැමිණෙන භික්ෂු පරපුර අධෛර්යමත් නොවිය යුතු බවත්, ඓතිහාසික භික්ෂු භූමිකාව අඛණ්ඩව පෙරට ගෙන යා යුතු බවත්ය.

උන්වහන්සේ පැවැත්වූ කතාවේ සවිස්තරාත්මක වීඩියෝවක් ප්‍රවීන මාධ්‍යවේදී ධර්ම ශ්‍රී කාරයවසම් මහතාගේ 'කාරිගේ චැනල් එක' යූටියුබ් නාලිකාව හරහා  ඉදිරිපත් කර ඇති අතර එම වීඩියෝව පහළින්.

.