ෆේස්බුක් සටහනකින් ආගමික අපහාසයක් සිදුකළා යැයි සෞදියේදී ලාංකිකයෙකුට මරණ දඬුවම..

Sep 19, 2026 at 04:23 AM

|

Lanka Leader

ආගමික අපහාසයක් සිදු කළ බවට චෝදනා කරමින් සෞදි අරාබියේදී අත්අඩංගුවට ගෙන මරණ දඬුවම නියම වී සිටින ශ්‍රී ලාංකික තරුණයාගේ ජීවිතය බේරාගැනීම සඳහා විදේශ කටයුතු අමාත්‍යාංශය හරහා රාජ්‍ය තාන්ත්‍රික මට්ටමින් උපරිම මැදිහත්වීමක් සිදු කරමින් සිටින බව රජය පවසයි.

මෙලෙස බරපතළ නීතිමය අර්බුදයකට මුහුණ දී සිටින්නේ අම්පාර - කල්මුණේ ප්‍රදේශයේ පදිංචිකරුවෙකු වන 24 හැවිරිදි සිවරාසා අනෝජන් නමැති තරුණයෙකි.

යාපනයේ සිට කතරගම බලා ගමන් කළ පාද යාත්‍රාවකදී සුනඛයෙකුට සිදුවූ පහරදීමක් මුල් කරගනිමින්, සෞදි අරාබියේ සේවය කරමින් සිටි මෙම තරුණයා සිය සමාජ මාධ්‍ය ගිණුම හරහා වීඩියෝවක් පළ කර තිබූ අතර, එමඟින් ඉස්ලාම් දහමට අපහාසයක් සිදුවූ බවට චෝදනා කරමින් සෞදි පොලිසිය විසින් ඔහුව අත්අඩංගුවට ගන්නා ලදී. 

පසුව සෞදි අධිකරණය මඟින් ඔහුට වසර පහක සිරදඬුවමක් සහ සෞදි රියාල් මිලියන තුනක දඩයක් නියම කළ අතර, එම තීන්දුවට එරෙහිව ශ්‍රී ලංකා විදේශ කටයුතු අමාත්‍යාංශයේ මඟපෙන්වීම යටතේ සෞදි නැගෙනහිර කලාපීය අභියාචනාධිකරණයට අභියාචනයක් ඉදිරිපත් කෙරිණි. 

කෙසේ වෙතත්, එම අභියාචනය විභාග කිරීමෙන් අනතුරුව පෙර පැවති සිරදඬුවම වෙනුවට ඔහුට මරණ දඬුවම නියම කර ඇති බවට නීතිඥවරයා විසින් රියාද්හි ශ්‍රී ලංකා තානාපති කාර්යාලය දැනුවත් කර ඇත.

මෙම තීන්දුවේ නෛතික පදනම පිළිබඳ නිල ලිඛිත තීන්දුව ලබා ගැනීමට ශ්‍රී ලංකා තානාපති කාර්යාලය කටයුතු කරමින් සිටින අතර, කොළඹ පිහිටි සෞදි තානාපති කාර්යාලයේ නිලධාරීන් සමඟ ද මේ පිළිබඳව සාකච්ඡා කර දඬුවම දැඩි කිරීම සම්බන්ධයෙන් රජයේ සහ පවුලේ කනස්සල්ල පළ කර තිබේ. 

සෞදි නීතියට අනුව මෙම තීන්දුවට එරෙහිව දින 30ක් ඇතුළත සෞදි ශ්‍රේෂ්ඨාධිකරණය හමුවේ නැවත අභියාචනයක් ඉදිරිපත් කිරීමට අවස්ථාව පවතින බැවින්, අනෝජන්ගේ ඥාතීන් සමඟ එක්ව ඉදිරි නීතිමය පියවර ගැනීමට තානාපති කාර්යාලය සූදානම් වෙයි.

විදේශ කටයුතු අමාත්‍ය විජිත හේරත් මහතා සඳහන් කළේ අදාළ තරුණයා ශ්‍රී ලාංකිකයෙකු බැවින් ඔහුව බේරාගැනීම රජයේ වගකීමක් ලෙස සලකා, සෞදි රජය සමඟ සාකච්ඡා කර සමාව ලබාගැනීමට රාජ්‍ය තාන්ත්‍රික ප්‍රයත්නයක නිරත වන බවයි. 

එමෙන්ම, මෙම සිදුවීම පදනම් කරගනිමින් මෙරට තුළ කිසිදු පාර්ශ්වයක් ආගමික හෝ වාර්ගික නොසන්සුන්තාවයක් ඇති කිරීමට උත්සාහ නොකළ යුතු බවත්, ජාතික සමගිය ආරක්ෂා කරගත යුතු බවත් අමාත්‍යවරයා අවධාරණය කළේය. 

මේ අතර, පාර්ලිමේන්තු මන්ත්‍රී ශානක්කියන් රාසමානික්කම් පවසන්නේ තරුණයාගේ පවුලේ ඥාතීන් රුපියල් ලක්ෂ 19ක මුදලක් ගෙවා නීතිඥ සහාය ලබාගෙන අභියාචනය ඉදිරිපත් කළද මෙවැනි තත්ත්වයක් උද්ගත වූ බවත්, ලබන සතියේ පාර්ලිමේන්තුවේදී මේ පිළිබඳ කරුණු විමසන බවත්ය.

සිය පුතු අතින් වරදක් සිදුව ඇති බව පිළිගන්නා නමුත්, ඔහුට සමාව ලබා දී ජීවිතය බේරා දෙන ලෙස අනෝජන්ගේ මව ජනාධිපතිවරයා ඇතුළු බලධාරීන්ගෙන් හඬා වැටෙමින් ආයාචනා කර සිටියි.