නිකිණි පුර පසළොස්වක පොහොය අදයි..

Aug 27, 2026 at 06:10 AM

|

Lanka Leader

ශාසනික වශයෙන් වැදගත් සිදුවීම් රැසක් සිදුවූ නිකිණි පුර පසළොස්වක පොහොය අද දිනට යෙදී තිබේ.

ඇසළ පුර පසළොස්වක පෝහෝ දින පෙර වස් එළැඹීමට නොහැකි වූ භික්ෂූන් වහන්සේලාට පසුවස් එළැඹීම පිණිස මෙම නිකිණි පොහොය වෙන් කර ඇති අතර, වස් සීමාවෙන් පිටතට යන භික්ෂූන් වහන්සේලාට සතියක් ඇතුළත යළි පැමිණෙන බවට අදිටන් කර පිටව යාමට අවසර හිමිවූයේ ද මෙම පෝහෝ දිනකය.

මෙම උතුම් දිනය ශාසනික මෙන්ම ඉතිහාසමය වශයෙන් ද අතිශය වැදගත් සිදුවීම් රැසකට හිමිකම් කියයි. 

බුද්ධ පරිනිර්වාණයෙන් තෙමසකට පසුව, මහා කාශ්‍යප හිමියන්ගේ මූලිකත්වයෙන් සහ අජාසත් රජුගේ දායකත්වයෙන් රජගහනුවර සප්තපර්ණි ගුහා ද්වාරයේදී ප්‍රථම ධර්ම සංගායනාව පැවැත්වීම සිදුවූයේ ද නිකිණි පෝහෝ දිනකය. 

ධර්ම භාණ්ඩාගාරික ආනන්ද හිමියන් රහත් භාවයට පත්වීම මෙන්ම අරියවංශ දේශනාව පැවැත්වීම ආරම්භ වීම ද මෙදින සිදුවූ විශේෂ ශාසනික සිදුවීම් වේ. ඊට අමතරව බුදුරජාණන් වහන්සේගේ ලලාට ධාතූන් වහන්සේ තැන්පත් කරමින් සේරුවිල මංගල චෛත්‍ය රාජයාණන් වහන්සේ ඉදිකිරීම ආරම්භ කර ඇත්තේ ද අද වැනි නිකිණි පෝහෝ දිනකය.

අතීතයේදී නිකිණි මාසයේ පවතින වියළි කාලගුණය නිසා ශ්‍රී මහා බෝධීන් වහන්සේට එල්ල වන වන අලි තර්ජනවලින් බෝධිය ආරක්ෂා කිරීමට ජනතාව ගිනි මැල ගසා රැකවල් ලෑ නිසාත්, ගොවි ජනතාව සිය හේන් වගාවන් සඳහා බිම් සකස් කිරීමට ගිනි තැබීම සිදු කරන නිසාත් අතීත මුතුන් මිත්තන් විසින් මෙම පෝය "දරමිටි පෝය" සහ "හේන් ගිනිලන පෝය" ලෙස ද හඳුන්වා ඇත. 

එමෙන්ම ඓතිහාසික මහනුවර ඇසළ මහ පෙරහැර මංගල්‍යයේ අවසන් රන්දෝලි මහ පෙරහැර පැවැත්වීම ද නිකිණි පොහොය මූලික කරගනිමින් සිදු කෙරෙන අතර, මෙදින දිවයින පුරා පිහිටි වෙහෙර විහාරස්ථාන වෙත පැමිණෙන බෞද්ධ ජනතාව දාන, සීල, භාවනා ඇතුළු ආගමික වතාවත්වල නිරත වෙති.