පාස්කු මහ නඩුවේ තීන්දුව සැප්තැම්බර් 22 දා..

Aug 25, 2026 at 05:13 AM

|

Lanka Leader

පාස්කු ඉරිදා ත්‍රස්ත ප්‍රහාරය සම්බන්ධයෙන් වන නඩුවේ තීන්දුව ලබන සැප්තැම්බර් මස 22 වැනිදා ප්‍රකාශයට පත්කරන බව කොළඹ විශේෂ ත්‍රිපුද්ගල මහාධිකරණය ඊයේ (24) දින නියම කළේය.

පාස්කු නඩුවේ විත්තියේ දේශණ ඊයේ (24) සවස 6.00ට පමණ අවසන් කර ඇති අතර, දෙපාර්ශවයේ ලිඛිත දේශන ලබන සැප්තැම්බර් මස 08 වැනිදාට ලබා දෙන ලෙසට මෙහිදී අධිකරණය නියම කර තිබේ.

කොළඹ විශේෂ ත්‍රිපුද්ගල මහාධිකරණ විනිසුරුවරුන් වන නවරත්න මාරසිංහ (සභාපති විනිසුරු), සුජීව නිශ්ශංක, රාමනාදන් කන්නන් යන විනිසුරුවරුන් ඉදිරියේදී ඊයේ (24) මෙම නඩුව කැඳවුණු අවස්ථාවේදී මේ බව අනාවරණය විය.

මෙහි පැමිණිල්ලේ නඩුව අවසන් වූයේ ඉකුත් (13) වැනිදා පස්වරුවේ දීයි.

පාස්කු ඉරිදා ත්‍රස්ත ප්‍රහාරයන්ට කුමන්ත්‍රණය කිරීමේ ප්‍රධාන චෝදනාව ඇතුළු චෝදනා 23270ක් මෙහි විත්තිකරුවන් 24 දෙනාට එරෙහිව නිතිපතිවරයා විසින් චෝදනා නගා තිබුණි.

මෙම නඩුවේ අධිකරණය විසින් චූදිතයින්ගේ පාපොච්චාරණ 10ක් සාක්ෂි ලෙස පිළිගෙන ඇති අතර, සඟවා තිබූ බෝම්බ පුපුරන ද්‍රව්‍ය , කඩු, ගිනි අවි, බෝම්බ සෑදීමට ගන්නා රසායනික ද්‍රව්‍ය ආදී නඩු භාණ්ඩ 2076ක් නඩු විභාගයේ දී ලකුණු කර ඇති බවයි අධිකරණයේදී හෙළි වුණේ.

රජයේ රස පරික්ෂක වාර්තා ගණනාවක් සහ ඩී.එන්.ඒ වාර්තා සහ වෛද්‍ය වාර්තා සහ පශ්චාත් මරණ පරික්ෂණ වාර්තා විශාල ප්‍රමාණයක් ලකුණු කර ඇති බවද අධිකරණයේදී හෙළි විය.

නවුෆර් මවුලවී ඇතුළු මෙම චුදිතයින් 24 දෙනාට එරෙහිවයි නිතිපතිවරයා විසින් පාස්කු ඉරිදා ත්‍රස්ත ප්‍රහාරයේ චෝදනා 23270 ගොනු කර ඇත්තේ.