ජපානයේ "නිහඬ" ආර්ථික බෝම්බය: අනාගතයේ රටට මොකද වෙන්නේ?..

Aug 19, 2026 at 10:27 AM

|

Lanka Leader

ලෝකයම මැදපෙරදිග යුද්ධ සහ ඇමෙරිකානු ආර්ථිකය දෙස බලන් ඉද්දී, ආසියාවේ ප්‍රබලම රටක විශාල ආර්ථික අර්බුදයක් නිහඬව නිර්මාණය වෙමින් පවතිනවා. ඒ වෙන කිසිම රටක් නෙවෙයි, තාක්ෂණයෙන් සහ දියුණුවෙන් ලෝකයටම ආදර්ශයක් වූ ජපානයයි.

එදා ලෝකයේ 3 වෙනි විශාලතම ආර්ථිකයට හිමිකම් කී ජපානයට, අද ඒ ස්ථානය ජර්මනියට පවරා දෙන්න සිදුවෙලා. එපමණක් නොව, ඉන්දියාවත් ඉතා ඉක්මනින්ම ජපානය පසුකර යාමට ආසන්නයි.

ලෝකයේ සුපිරිම රටකට මෙහෙම වුණේ ඇයි?

මෙයට ප්‍රධාන හේතු 3ක් බලපා තිබෙනවා.

වයස්ගත වන ජනගහනය: ජපානයේ උපත් අනුපාතය දැඩි ලෙස පහළ බැස ඇති අතර (2024 දී 1.15 දක්වා), ජනගහනයෙන් 30% කට වඩා වයස අවුරුදු 65 ට වැඩි අයයි. වැඩකරන තරුණ පරපුර අඩුවීම නිසා බදු ආදායම අඩු වී, පෙන්ෂන් සහ සෞඛ්‍ය වියදම් අධික වී තිබේ.

වසර 30 ක් තිස්සේ වැඩි නොවූ වැටුප්: 1980 ගණන්වල පැවැති ඉඩම් සහ කොටස් වෙළඳපොළ බුබුල (Bubble Economy) පිපිරීමෙන් පසු, සමාගම් ස්ථිර සේවකයින් වෙනුවට තාවකාලික සේවකයින් ලබා ගැනීමට පටන් ගත්තේය. මෙයින් 1.4% ක වැනි ඉතා අඩු වැටුප් වර්ධනයක් පමණක් සිදු වූ අතර මිනිසුන්ගේ මිලදී ගැනීමේ හැකියාව පහත වැටුණි.

පහත වැටෙන 'යෙන්' මුදල් ඒකකය: තෙල්, ගෑස් සහ ආහාර ද්‍රව්‍යවලින් 60% කට වඩා පිටරටින් ගෙන්වන ජපානයට, ඩොලරයට සාපේක්ෂව 'යෙන්' අගය බැසීම නිසා බඩු බාහිරාදිය ගෙන්වීමේ වියදම අධික ලෙස ඉහළ ගොස් ඇත.

හිස් වෙන ගෙවල් (Akia) සහ ණය බර

පාළු වූ නිවාස: ජපානයේ සමස්ත නිවාසවලින් 14% ක් (මිලියන 9 ක් පමණ) කිසිවෙකු නොමැතිව පාළුවට ගොස් ඇත.

ණය ප්‍රමාණය: ජපානයේ ණය බර මුළු ආර්ථිකයෙන් 250% ක් වුවද, ණයවලින් 93% ක්ම ලබාගෙන ඇත්තේ තමන්ගේම රටේ ජනතාවගෙන් සහ බැංකුවලින් වන බැවින් රට එකපාරටම බංකොලොත් වන්නේ නැත.

ලෝක ආර්ථිකයට වන බලපෑම කුමක්ද?

ජපානය වසර 17 කට පසු තමන්ගේ පොලී අනුපාත වැඩි කිරීමට පටන් ගෙන ඇත. ජපාන ආයෝජකයින් විදේශයන්හි (විශේෂයෙන් ඇමෙරිකාවේ) ආයෝජනය කර ඇති මුදල් ආපසු ජපානයට ගෙන ඒමට පටන් ගතහොත්, එය සමස්ත ලෝක කොටස් වෙළඳපොළටම විශාල බලපෑමක් එල්ල කළ හැකිය!

ජපානය එකපාර කඩා වැටෙන්නේ නැති වුණත්, වයස්ගත වන ජනගහනයත් එක්ක හිමීට හැකිළෙමින් පවතිනවා. ඉදිරියේදී අපේ රටටත් මෙවැනි ජනගහන ප්‍රශ්නයකට මුහුණ දෙන්න සිදු වුණොත් මුහුණ දෙන්න වෙන්නේ කෙබඳු තත්ත්වයකටද?