87-89 භීෂණ සමයේ සත්‍ය සොයා පාර්ලිමේන්තු තේරීම් කාරක සභාවක් සහ ස්වාධීන කොමිසමක් පත් කරන්න..- උවිඳු විජේවීර ජනපති අනුරගෙන් ඉල්ලයි..

Aug 15, 2026 at 06:17 AM

|

Lanka Leader

1980 දශකයේ අගභාගයේදී (1987-1989) මෙරට ඇති වූ දේශපාලන අර්බුදය හා භීෂණකාරී යුගය පිළිබඳ සම්පූර්ණ සත්‍ය හෙළිදරව් කර ගැනීමටත්, ඒ හරහා අගතියට පත් සියලු පාර්ශ්වයන්ට හා විපතට පත් වූවන්ට සාධාරණය ඉටු කිරීමටත් ස්වාධීන හා අපක්ෂපාතී කොමිෂන් සභාවක් පත් කරන ලෙස ඉල්ලමින් ජනාධිපති අනුර කුමාර දිසානායක වෙත ලිපියක් යොමු කර ඇත.  

උවිඳු විජේවීර මහතා විසින් මෙම ලිපිය යොමු කර ඇති අතර, 1982 පැවැත්වූ ප්‍රථම ජනමත විචාරණයට එරෙහිව ජනතා විමුක්ති පෙරමුණේ නායක රෝහණ විජේවීර මහතා ඉදිරිපත් කළ මැතිවරණ පෙත්සම/නඩුව සම්බන්ධයෙන් නැවත පරීක්ෂණයක් කිරීමට ස්වාධීන කොමිසමක් හෝ කාරක සභාවක් පත් කිරීම මෙන්ම එහිදී සිදුවූ වංචා හෙළි වුවහොත්, 1982-1989 දක්වා පැවැති පාර්ලිමේන්තුවේ නෛතික බලය අහෝසි කිරීමට අදාළ පියවර ගැනීම යන ඉල්ලීම් මෙම ලිපියේ අන්තර්ගත ය.

1983 කළු ජූලි සංහාරය නිර්මාණය කිරීමට සහ දෙමළ ජනතාවට හිංසා කිරීමට වගකිව යුත්තන්ට එරෙහිව නීතිමය පියවර ගැනීම මෙන්ම, කළු ජූලිය පදනම් කරගෙන ජනතා විමුක්ති පෙරමුණ ඇතුළු දේශපාලන පක්ෂ තහනම් කිරීම ප්‍රජාතන්ත්‍ර විරෝධී බව තහවුරු වන්නේ නම්, එම තහනමෙන් ජවිපෙ නිදොස් කොට නිදහස් කිරීම මෙන්ම, 88/89 යුගය හුදකලා නොකොට, එම වකවානුවේ සිදුවූ සමස්ත ක්‍රියාවලිය ආරම්භයේ සිට අවසානය දක්වා පූර්ණ ස්වාධීන කොමිෂන් සභාවක් හරහා විමර්ශනය කර සත්‍ය තොරතුරු ජනතාවට අනාවරණය කිරීම සහ විපතට පත් සියලු පුරවැසියන්ට සාධාරණය ඉටුකිරීම මෙමගින් ඉල්ලා තිබේ.

දේශපාලන පක්ෂ භේදයකින් තොරව, එකල අතුරුදහන් වූ, ඝාතනය වූ සහ වධබන්ධනවලට ලක්වූ සියලුම ශ්‍රී ලාංකික පුරවැසියන් වෙනුවෙන් සාධාරණය ඉටු කිරීම සහ  1989 දී රාජ්‍ය ආරක්ෂක අංශ භාරයට ගැනීමෙන් පසු අඩස්සියේදී ඝාතනය කරන ලද රෝහණ විජේවීර, උපතිස්ස ගමනායක ඇතුළු ජනතා විමුක්ති පෙරමුණේ සියලු නායකයින්ගේ සහ ක්‍රියාකාරීන්ගේ ඝාතන සම්බන්ධයෙන් ස්වාධීන පරීක්ෂණයක් පවත්වා යුක්තිය ඉටුකිරීම ද මෙමගින් ඉල්ලා තිබේ.

අදාළ ලිපිය පහළින්..